ಮಂಗಳೂರು : ಟ್ರಾಫಿಕ್‌ ಸಮಸ್ಯೆ ನಿವಾರಣೆಗೆ ಎರಡು ಫ್ಲೈ ಓವರ್‌

ಮಂಗಳೂರು : ನಗರದಲ್ಲಿ ಅತೀ ಹೆಚ್ಚು ಟ್ರಾಫಿಕ್‌ ಇರುವ ಹಂಪನ ಕಟ್ಟೆ ಮತ್ತು ಜ್ಯೋತಿ ಸರ್ಕಲ್‌ ಬಳಿ ಎರಡು ಫ್ಲೈ ಓವರ್‌ಗಳನ್ನು ನಿರ್ಮಿಸಲು ನಿರ್ಧರಿಸಲಾಗಿದೆ ಎಂದು ಮಂಗಳೂರು ನಗರಾಭಿವೃದ್ಧಿ ಪ್ರಾಧಿಕಾರದ ಅಧ್ಯಕ್ಷ ಕೆ. ತೇಜೋಮಯ ಹೇಳಿದ್ದಾರೆ.

ಫ್ಲೈ ಓವರ್‌ಗಳ ನಿರ್ಮಾಣಕ್ಕೆ ಸುಮಾರು 20.4 ಕೋಟಿ ರೂಪಾಯಿ ಯೋಜನೆಯನ್ನು ರೂಪಿಸಲಾಗಿದ್ದು, ಏಷ್ಯನ್‌ ಅಭಿವೃದ್ಧಿ ಬ್ಯಾಂಕ್‌ ಮತ್ತು ಕರ್ನಾಟಕ ರಸ್ತೆ ಅಭಿವೃದ್ಧಿ ನಿಗಮದಿಂದ ಆರ್ಥಿಕ ಸಹಾಯ ಕೋರಿ ಪ್ರಸ್ತಾವನೆಯನ್ನು ಕಳುಹಿಸಲಾಗಿದೆ. ನವೆಂಬರ್‌ 30ರಂದು ಫ್ಲೈ ಓವರ್‌ ಬಗ್ಗೆ ಪರಿಶೀಲನೆ ನಡೆಸಲು ಕರ್ನಾಟಕ ರಸ್ತೆ ಅಭಿವೃದ್ಧಿ ನಿಗಮದ ನಿರ್ದೇಶಕರು ನಗರಕ್ಕಾಗಮಿಸಲಿದ್ದಾರೆ ಎಂದು ತೇಜೋಮಯ ಪತ್ರಿಕಾ ಗೋಷ್ಠಿಯಲ್ಲಿ ಮಂಗಳವಾರ ತಿಳಿಸಿದರು.

ಹಂಪನ ಕಟ್ಟೆ ಮತ್ತು ಜ್ಯೋತಿ ಥಿಯೇಟರಿನ ಬಳಿ ಫ್ಲೈ ಓವರ್‌ ನಿರ್ಮಿಸುವ ಕುರಿತು ಚೆನ್ನೈಯ ಕಮ್ಸಸ್‌ ಸಂಸ್ಥೆ ಪರಿಶೀಲನೆ ನಡೆಸಿದೆ. ಹಂಪನ ಕಟ್ಟೆಯಲ್ಲಿರುವ ವಿಶ್ವ ವಿದ್ಯಾಲಯ ಕಾಲೇಜು ಬಳಿಯಿಂದ ಬಾವುಟ ಗುಡ್ಡದ ಎಂಸಿಸಿ ಬ್ಯಾಂಕ್‌ವರೆಗೆ ಮತ್ತು ಲೇಡಿ ಗೋಶನ್‌ ಆಸ್ಪತ್ರೆಯಿಂದ ಬಲ್ಮಠ ರಸ್ತೆಯ ಮಧ್ಯ ಭಾಗದ ವರೆಗೆ ಫ್ಲೈಓವರ್‌ ನಿರ್ಮಿಸಲಾಗುವುದು. ಉರ್ವ ಸ್ಟೋರ್‌ನಲ್ಲಿರುವ ಮೂಡ ಕಚೇರಿಯಿಂದ ಕೊಟ್ಟಾರವರೆಗಿನ ರಸ್ತೆಯನ್ನು ಚತುಷ್ಪಥ ರಸ್ತೆಯನ್ನಾಗಿ ಪರಿವರ್ತಿಸಲಾಗುವುದು ಎಂದು ತೇಜೋಮಯ ಹೇಳಿದರು.

(ಇನ್ಫೋ ವಾರ್ತೆ)