ಮುಕ್ತ ವಿವಿಯಿಂದ ಉದ್ಯೋಗಸ್ಥರಿಗಾಗಿಕಂಪ್ಯೂಟರ್‌ ಹಾಗೂ ಐಟಿ ಕೋರ್ಸ್‌

ಮೈಸೂರು : ಕಲಿಯಲು ಆಸಕ್ತಿ ಹೊಂದಿರುವ ಉದ್ಯೋಗಸ್ಥರಿಗಾಗಿ ಕರ್ನಾಟಕ ರಾಜ್ಯ ಮುಕ್ತ ವಿಶ್ವ ವಿದ್ಯಾನಿಲಯವು ಮೊದಲ ಬಾರಿಗೆ ಕಂಪ್ಯೂಟರ್‌ ಹಾಗೂ ಮಾಹಿತಿ ತಂತ್ರಜ್ಞಾನದ ಸಂಜೆ ತರಗತಿಗಳನ್ನು ಪ್ರಾರಂಭಿಸಿದೆ.

ಬೆಂಗಳೂರಿನ ವರ್ಚುಯಲ್‌ ಎಜುಕೇಷನ್‌ ಸಂಸ್ಥೆ ಮತ್ತು ಮಣಿಪಾಲದ ಮಾಹೆ (ಮಣಿಪಾಲ್‌ ಅಕಾಡೆಮಿ ಆಫ್‌ ಹೈಯರ್‌ ಎಜುಕೇಷನ್‌)ಯ ಜಂಟಿ ಸಹಯೋಗದೊಂದಿಗೆ ಈ ತರಗತಿಗಳು ಫೆಬ್ರವರಿ 2001 ರಿಂದ ಪ್ರಾರಂಭವಾಗುತ್ತವೆ. ಕೋರ್ಸ್‌ಗೆ ಸಂಬಂಧಿಸಿದ ವಸ್ತುಗಳನ್ನು ಮಣಿಪಾಲ್‌ ಅಕಾಡೆಮಿ ಪೂರೈಸುವುದು.

ಮಾಹಿತಿ ತಂತ್ರಜ್ಞಾನದಲ್ಲಿ ಡಿಪ್ಲೊಮ, ಟೆಲಿ ಕಮ್ಯುನಿಕೇಷನ್‌ ತಂತ್ರಜ್ಞಾನದಲ್ಲಿ ಪಿಜಿ ಡಿಪ್ಲೊಮ, ಮಾಹಿತಿ ತಂತ್ರಜ್ಞಾನದಲ್ಲಿ ಪದವಿ ಮತ್ತು ಸ್ನಾತಕೋತ್ತರ ಪದವಿ ಶಿಕ್ಷಣಗಳು ಈ ಯೋಜನೆಯಡಿ ಅರ್ಹ ಅಭ್ಯರ್ಥಿಗಳಿಗೆ ಕಲಿಯಲಿಕ್ಕೆ ಲಭ್ಯವಿವೆ ಎಂದು ಮುಕ್ತ ವಿಶ್ವ ವಿದ್ಯಾಲಯದ ಉಪ ಕುಲಪತಿ ಡಾ. ಎನ್‌.ಎಸ್‌. ರಾಮೇಗೌಡ ಅವರು ಬಿಡುಗಡೆ ಮಾಡಿರುವ ಪ್ರಕಟಣೆಯಲ್ಲಿ ತಿಳಿಸಲಾಗಿದೆ. ಪ್ರತಿಯಾಂದು ಕೋರ್ಸ್‌ 5 ಸೆಮಿಸ್ಟರ್‌ಗಳನ್ನು ಹೊಂದಿದ್ದು, ಪ್ರತಿ ಸೆಮಿಸ್ಟರ್‌ಗೆ 6 ಸಾವಿರ ರುಪಾಯಿ ಶುಲ್ಕ ನಿಗದಿಪಡಿಸಲಾಗಿದೆ ಎಂದು ಪ್ರಕಟಣೆ ತಿಳಿಸಿದೆ.

ವಿಶ್ವ ವಿದ್ಯಾಲಯದ ಎಲ್ಲಾ ಕೋರ್ಸ್‌ಗಳನ್ನು ಇಂಟರ್ನೆಟ್‌ ಜಾಲದಲ್ಲಿ ತರಲು ವಿವಿ ಯೋಚಿಸಿದೆ. ಕಂಪ್ಯೂಟರ್‌ ಹಾಗೂ ಐಟಿ ಶಿಕ್ಷಣ ಕುರಿತ ಹೊಸ ಕೋರ್ಸ್‌ಗಳ ಹೆಚ್ಚಿನ ವಿವರಗಳಿಗಾಗಿ ವಿಶ್ವ ವಿದ್ಯಾಲಯದ ಅಧ್ಯಯನ ಕೇಂದ್ರಗಳನ್ನು ಸಂಪರ್ಕಿಸಬಹುದು ಎಂದು ಪ್ರಕಟಣೆ ತಿಳಿಸಿದೆ.

(ಯುಎನ್‌ಐ)