ಸಾಂಗ್ಲಿಯಾನರ ಕೈ ಬಲಪಡಿಸಲು ಶಂಕರ್‌ ಬಿದರಿ,ಕೆಂಪಯ್ಯ ಸೇರ್ಪಡೆ

ಬೆಂಗಳೂರು : ವೀರಪ್ಪನ್‌ ವಿರುದ್ಧದ ವಿಶೇಷ ಕಾರ್ಯಾಚರಣೆ ಪಡೆಯ ಬಲ ಹೆಚ್ಚಿಸಿರುವ ಕರ್ನಾಟಕ ಸರಕಾರ, ಕಾರ್ಯಾಚರಣೆಯ ಸಂಪೂರ್ಣ ಉಸ್ತುವಾರಿಯನ್ನು ಹೊತ್ತಿರುವ ಹೆಚ್ಚುವರಿ ಪೊಲೀಸ್‌ ಮಹಾ ನಿರ್ದೇಶಕ ಎಚ್‌. ಟಿ. ಸಾಂಗ್ಲಿಯಾನ ಅವರ ಕೈ ಬಲಪಡಿಸಿದೆ. ಈ ಸಂಬಂಧ ವೀರಪ್ಪನ್‌ ವಿರುದ್ಧದ ಕಾರ್ಯಾಚರಣೆಯಲ್ಲಿ ಅನುಭವ ಹೊಂದಿರುವ ಐಜಿಪಿ ಶಂಕರ ಬಿದರಿ ಹಾಗೂ ಉಪ ಐಜಿಪಿ ಕೆಂಪಯ್ಯ ಅವರನ್ನು ಕಾರ್ಯಾಚರಣೆ ಪಡೆಗೆ ಸೇರ್ಪಡೆ ಮಾಡಿದೆ.

ಕಾರ್ಯಾಚರಣೆ ಪಡೆಯಲ್ಲಿ ಹಾಲಿ ಮುಖ್ಯಸ್ಥರಾಗಿರುವ ಹರ್ಷವರ್ಧನರಾಜು ಅವರು ಸಹ ತಮ್ಮ ಹುದ್ದೆಯಲ್ಲೇ ಮುಂದುವರಿಯಲಿದ್ದಾರೆ ಎಂದು ಅಧಿಕೃತ ಮೂಲಗಳು ತಿಳಿಸಿವೆ. ವೀರಪ್ಪನ್‌ ವಿರುದ್ಧದ ಕಾರ್ಯಾಚರಣೆಯಲ್ಲಿ ಈ ಹಿಂದೆ ಪ್ರಮುಖ ಪಾತ್ರ ವಹಿಸಿದ್ದ ಶಂಕರಬಿದರಿ ವೀರಪ್ಪನ್‌ ಸಹಚರರ ಸಂಖ್ಯೆ ಗಣನೀಯವಾಗಿ ಇಳಿಮುಖವಾಗಲು ಕಾರಣರಾಗಿದ್ದರು.

14 ವರ್ಷಗಳ ವೀರಪ್ಪನ್‌ ವಿಕಟಾಟ್ಟಹಾಸ ಹತ್ತಿಕ್ಕಲು ಕರ್ನಾಟಕ ಸರಕಾರ ಹಾಗೂ ತಮಿಳುನಾಡು ಸರಕಾರಗಳು ವಿಫಲವಾಗಿವೆ ಎಂದು ಸರ್ವೋನ್ನತ ನ್ಯಾಯಾಲಯ ತರಾಟೆಗೆ ತೆಗೆದುಕೊಂಡಿತ್ತು. ಈಗ ಕನ್ನಡದ ಮೇರು ನಟ ರಾಜ್‌ಕುಮಾರ್‌ ಸುರಕ್ಷಿತವಾಗಿ ಬಿಡುಗಡೆಯಾಗುತ್ತಿದ್ದಂತೆ, ವೀರಪ್ಪನ್‌ ಶಿಕಾರಿಗೆ ವಿರೋಧ ಪಕ್ಷಗಳು ಒತ್ತಾಯಿಸಿದ್ದವು. ಜನಸಾಮಾನ್ಯರ ವಿಶ್ವಾಸಕ್ಕೆ ಪಾತ್ರವಾಗಲು ರಾಜ್ಯ ಸರಕಾರಕ್ಕೆ ಈ ಕಾರ್ಯಾಚರಣೆ ಅನಿವಾರ್ಯವಾಗಿದೆ.

ವಾರ್ತಾ ಸಂಚಯ
ಮುಖಪುಟ / ವೀರಪ್ಪನ್‌ ಶಿಕಾರಿ