‘ಮುಚ್ಚಿರುವ ಹತ್ತಿ ಗಿರಣಿಗಳ ಪುನಶ್ಚೇತನಕ್ಕೆ ಕೇಂದ್ರದ 700 ಕೋಟಿ ನೆರವು’

ಮೈಸೂರು : ಮುಚ್ಚಿರುವ ಹತ್ತಿ ಗಿರಣಿಗಳ ಪುನಶ್ಚೇತನಕ್ಕೆ ದೀನ್‌ದಯಾಳ್‌ ಹೆಸರಿನಲ್ಲಿ ಕೇಂದ್ರ ಸರ್ಕಾರ ಇನ್ನು 7 ವರ್ಷಗಳ ಅವಧಿಯಲ್ಲಿ 700 ಕೋಟಿ ರುಪಾಯಿಗಳ ನೆರವನ್ನು ನೀಡಲಿದೆ ಎಂದು ಜವಳಿ ಸಚಿವ ವಿ.ಧನಂಜಯಕುಮಾರ್‌ ಗುರುವಾರ ಹೇಳಿದ್ದಾರೆ.

ಸುದ್ದಿಗೋಷ್ಠಿಯಲ್ಲಿ ಮಾತನಾಡುತ್ತಿದ್ದ ಸಚಿವರು, ಹುಬ್ಬಳ್ಳಿಯ ಮಹದೇವ ಹತ್ತಿ ಗಿರಣಿ ಸೇರಿದಂತೆ ರಾಜ್ಯಾದ್ಯಂತ ಮುಚ್ಚಿರುವ ಹತ್ತಿ ಗಿರಣಿಗಳ ಪುನಶ್ಚೇತನಕ್ಕೆ ರಾಜ್ಯ ಸರ್ಕಾರವು ಕೂಡ ನೆರವು ನೀಡಬೇಕು. 2004ರ ಹೊತ್ತಿಗೆ ಮುಕ್ತ ವ್ಯಾಪಾರಕ್ಕೆ ಅವಕಾಶ ನೀಡುವಂಥ ಜವಳಿ ನೀತಿ ಜಾರಿಗೆ ಬರಲಿದ್ದು, ಅಂತರರಾಷ್ಟ್ರೀಯ ಮಾರುಕಟ್ಟೆಯನ್ನು ದೃಷ್ಟಿಯಲ್ಲಿಟ್ಟುಕೊಂಡು ಉತ್ತಮ ಗುಣ ಮಟ್ಟದ ಜವಳಿಯನ್ನು ಉತ್ಪಾದಿಸಬೇಕು. ಪ್ರಸ್ತುತ 4.8 ಶತಕೋಟಿ ಡಾಲರ್‌ ಮೌಲ್ಯದ ಜವಳಿ ರಪ್ತು ಮಾಡಲಾಗಿದ್ದು, 2010ರ ವೇಳೆಗೆ 10 ಶತಕೋಟಿ ಡಾಲರ್‌ ಮೌಲ್ಯದ ಜವಳಿ ರಫ್ತು ಮಾಡುವ ಗುರಿ ಇದೆ ಎಂದರು.

ಹತ್ತಿ ಉದ್ದಿಮೆಗಳ ಅಭಿವೃದ್ಧಿಗೆ ಕಾಟನ್‌ ಮಿಷನ್‌ ಎಂಬ ಕಾರ್ಯಕ್ರಮ ರೂಪಿಸಲಾಗಿದೆ. ರೇಷ್ಮೆ ಉತ್ಪನ್ನ ಹೆಚ್ಚಿಸುವ ನಿಟ್ಟಿನಲ್ಲಿ ಕ್ರಮಗಳನ್ನು ಕೈಗೊಳ್ಳಲಾಗಿದ್ದು, ಇದಕ್ಕಾಗಿ ವಿಶ್ವಬ್ಯಾಂಕ್‌ ನೆರವು ನೀಡುತ್ತಿದೆ. ವಿದೇಶೀ ಮಾರುಕಟ್ಟೆಗಳ ಅಗತ್ಯಕ್ಕೆ ಸ್ಪಂದಿಸುವ ನಿಟ್ಟಿನಲ್ಲಿ ನಾವು ಯೋಚಿಸಬೇಕಿದೆ. ಜವಳಿ ರಫ್ತಿನಿಂದ ಮಾಹಿತಿ ತಂತ್ರಜ್ಞಾನಕ್ಕಿಂತ ಹೆಚ್ಚಿನ ವಿದೇಶೀ ವಿನಿಮಯ ಸಾಧ್ಯವಾಗಿದೆ ಎಂದು ಹೇಳಿದರು.

(ಮೈಸೂರು ಪ್ರತಿನಿಧಿಯಿಂದ)