ಹೆದ್ದಾರಿ ದರೋಡೆ: 10 ಮಂದಿ ಡಕಾಯಿತರ ತಂಡದ ಬಂಧನ

ಬೆಂಗಳೂರು : ನಗರದ ಅಪರಾಧ ಶೋಧ ದಳದ ಪೊಲೀಸರು 10 ಮಂದಿಯ ಅಂತರರಾಜ್ಯ ಡಕಾಯಿತರ ತಂಡವನ್ನು ಬಂಧಿಸಿದೆ. ಆರೋಪಿಗಳಿಂದ 40 ಲಕ್ಷ ರುಪಾಯಿ ಮೌಲ್ಯದ ಸಿಗರೇಟು ಪೆಟ್ಟಿಗೆ, ಕಾಫಿ ಮುಂತಾದ ಗ್ರಾಹಕ ವಸ್ತುಗಳನ್ನು ಪೊಲೀಸರು ವಶಪಡಿಸಿಕೊಂಡಿದ್ದಾರೆ.

ಕರ್ನಾಟಕ ಹಾಗೂ ಆಂಧ್ರ ಪ್ರದೇಶ ಪೊಲೀಸರ ವ್ಯಾಪಕ ತನಿಖೆಯ ನಂತರ ದರೋಡೆಕೋರರನ್ನು ಬಂಧಿಸಲಾಗಿದೆ ಎಂದು ಮಂಗಳವಾರ ಇಲ್ಲಿ ಪೊಲೀಸರು ಬಿಡುಗಡೆ ಮಾಡಿರುವ ಪ್ರಕಟಣೆ ತಿಳಿಸಿದೆ. ತಂಡದ ಸದಸ್ಯರು ಟ್ರಕ್‌ ಮತ್ತು ಲಾರಿಗಳ ಚಾಲಕರು, ಕ್ಲೀನರ್‌ಗಳ ಮೇಲೆ ಹಲ್ಲೆ ನಡೆಸಿ, ವಸ್ತುಗಳನ್ನು ದೋಚಿ ಆನಂತರ ಮಾರಿಕೊಳ್ಳುತ್ತಿದ್ದರು ಎಂದು ಪ್ರಕಟಣೆ ತಿಳಿಸಿದೆ.

ಇತ್ತೀಚೆಗೆ ತಾನೇ ಆಂಧ್ರ ಪ್ರದೇಶದ ಪೆನುಕೊಂಡ ಸಮೀಪ ನಡೆದ ಹೆದ್ದಾರಿ ದರೋಡೆಯಲ್ಲಿ ಐಟಿಸಿ ಕಂಪನಿಯ ಸಿಗರೇಟುಗಳನ್ನು ಸಾಗಿಸುತ್ತಿದ್ದ ಲಾರಿಯನ್ನು ದರೋಡೆಕೋರರು ದೋಚಿದ್ದರು. ಅಪರಾಧಿಗಳನ್ನು ಬಂಧಿಸುವ ಬಗ್ಗೆ ಸುಳಿವು ನೀಡಿದವರಿಗೆ 1 ಲಕ್ಷ ರು. ಬಹುಮಾನವನ್ನು ಐಟಿಸಿ ಕಂಪನಿ ಪ್ರಕಟಿಸಿತ್ತು .

ಸಾಮಗ್ರಿಗಳನ್ನು ಸಾಗಿಸಲು ದರೋಡೆಕೋರರು ಬಳಸುತ್ತಿದ್ದ ಎರಡು ಲಾರಿಗಳನ್ನೂ ಪೊಲೀಸರು ವಶಪಡಿಸಿಕೊಂಡಿದ್ದಾರೆ. ಗುಂಪಿನ ಸದಸ್ಯರು ಇನ್ನೂ ಹೆಚ್ಚಿರಬಹುದೆಂದು ಶಂಕಿಸಿರುವ ಪೊಲೀಸರು, ತಂಡಕ್ಕೆ ಸೇರಿದ ಇತರ ದರೋಡೆಕೋರರ ಶೋಧದ ಪ್ರಯತ್ನದಲ್ಲಿದ್ದಾರೆ.

(ಯುಎನ್‌ಐ)