ಮಂಗಳೂರು : ರೈಲ್ವೇ ಕ್ರಾಸಿಂಗ್‌ ಬಳಿ ಹತ್ತು ಮೇಲ್ಸೇತುವೆ ನಿರ್ಮಾಣ

ಮಂಗಳೂರು : ಮಂಗಳೂರು ------ ಕೋಜಿಕ್ಕೋಡ್‌ ರಾಷ್ಟ್ರೀಯ ಹೆದ್ದಾರಿಯಲ್ಲಿ ಬರುವ ಹತ್ತು ರೈಲ್ವೇ ಕ್ರಾಸಿಂಗ್‌ಗಳಲ್ಲಿ ಮೇಲು ಸೇತುವೆಗಳನ್ನು ನಿರ್ಮಿಸಲಾಗುವುದು ಎಂದು ಕೇಂದ್ರ ರೈಲ್ವೇ ಖಾತೆ ಸಹಾಯಕ ಸಚಿವ ಓ. ರಾಜಗೋಪಾಲ್‌ ಹೇಳಿದ್ದಾರೆ.

ಅವರು ಭಾನುವಾರ ಇಲ್ಲಿ ಸುದ್ದಿಗಾರರೊಂದಿಗೆ ಮಾತನಾಡುತ್ತಾ, ಈ ಹತ್ತು ಸೇತುವೆಗಳಲ್ಲಿ ಐದನ್ನು ರೈಲ್ವೇ ಇಲಾಖೆ ನಿರ್ಮಿಸಲಿದೆ, ಉಳಿದ ಐದು ಮೇಲು ಸೇತುವೆಗಳನ್ನು - ಸೇತುವೆ ನಿರ್ಮಾಣ ನಿಗಮ ನಿರ್ಮಿಸುವುದು ಎಂದು ಹೇಳಿದರು.

ಪ್ರಸ್ತುತ ಮಂಗಳೂರು- ಶೋರನೂರು ನಡುವೆ ಜೋಡಿ ರೈಲು ಮಾರ್ಗ ನಿರ್ಮಾಣ ಕಾರ್ಯ ಸಾಗುತ್ತಿದೆ. ಈ ರೈಲು ಮಾರ್ಗ ನಿರ್ಮಾಣ ಕಾರ್ಯ ಮುಗಿದಾಗ ರಾಜ್ಯ ಕೊಂಕಣ ರೈಲ್ವೇ ಮಾರ್ಗದ ಸಂಪೂರ್ಣ ಪ್ರಯೋಜನ ಪಡೆಯುವುದು ಸಾಧ್ಯವಾಗುತ್ತದೆ. ಆದ್ದರಿಂದ ಈ ರೈಲ್ವೇ ಮಾರ್ಗ ನಿರ್ಮಾಣ ಕಾರ್ಯ ಮುಕ್ತಾಯವಾಗುತ್ತಿದ್ದಂತೆಯೇ ಇಲಾಖೆಯು ಮೇಲು ಸೇತುವೆ ಕಾಮಗಾರಿಯನ್ನು ಕೈಗೆತ್ತಿಕೊಳ್ಳುವುದು ಎಂದು ರಾಜಗೋಪಾಲ್‌ ಹೇಳಿದರು.

(ಇನ್ಫೋ ವಾರ್ತೆ)