ಹಸಿದ ಮಕ್ಕಳಿಗೆ ತುತ್ತು ಕೊಡಿ : ಸಂಘ ಸಂಸ್ಥೆಗಳಿಗೆ ಪ್ರಧಾನಿ ಮನವಿ

ಬೆಂಗಳೂರು : ಎಲ್ಲರಿಗೂ ಆಹಾರ ಅನ್ನುವ ಸರ್ಕಾರದ ಗುರಿಯನ್ನು ತಲುಪಲು ಸಾರ್ವಜನಿಕ ಸಂಘ ಸಂಸ್ಥೆಗಳು ಸರ್ಕಾರದೊಂದಿಗೆ ಕೈ ಜೋಡಿಸಬೇಕು ಎಂದು ಪ್ರಧಾನಿ ವಾಜಪೇಯಿ ಮನವಿ ಮಾಡಿದ್ದಾರೆ.

ಅಂತರರಾಷ್ಟ್ರೀಯ ಕೃಷ್ಣ ಪ್ರಜ್ಞೆ ಸಮಾಜ ಕೇಂದ್ರ(ಇಸ್ಕಾನ್‌) ರೂಪಿಸಿರುವ, 40 ಶಾಲೆಗಳ ಸುಮಾರು 30 ಸಾವಿರ ವಿದ್ಯಾರ್ಥಿಗಳಿಗೆ ಉಚಿತ ಆಹಾರ ಒದಗಿಸುವ ಅಕ್ಷಯಪಾತ್ರೆ ಯೋಜನೆಗೆ ಶುಭ ಹಾರೈಸಿ ವಾಜಪೇಯಿ ಕಳುಹಿಸಿರುವ ಸಂದೇಶದಲ್ಲಿ ಈ ಮನವಿ ಮಾಡಲಾಗಿದೆ. ಶನಿವಾರ ನಡೆದ ಯೋಜನೆಯ ಉದ್ಘಾಟನೆ ಸಮಾರಂಭದಲ್ಲಿ ಪ್ರಧಾನಿ ಅವರ ಸಂದೇಶವನ್ನು ಇಸ್ಕಾನ್‌ನ ಅಧ್ಯಕ್ಷ ಮಧು ಪಂಡಿತ್‌ ದಾಸ ಓದಿದರು.

ಹಸಿವಿನ ನಿರ್ಮೂಲನೆ ದೇಶ ಎದುರಿಸುತ್ತಿರುವ ಪ್ರಮುಖ ಸವಾಲುಗಳಲ್ಲಿ ಒಂದಾಗಿದೆ. ಈಚಿನ ವರ್ಷಗಳಲ್ಲಿ ಆಹಾರದ ಉತ್ಪಾದನೆ ಹೆಚ್ಚಾಗಿದ್ದರೂ, ಹಸಿವಿನ ಸಮಸ್ಯೆ ನಿವಾರಣೆಯಾಗಿಲ್ಲ ಎಂದು ವಿಷಾದಿಸಿರುವ ಪ್ರಧಾನಿ, ಹಸಿವಿನ ನಿರ್ಮೂಲನೆ ಕೇವಲ ಸರ್ಕಾರದಿಂದ ಮಾತ್ರ ಸಾಧ್ಯವಿಲ್ಲ , ಈ ನಿಟ್ಟಿನಲ್ಲಿ ಸಂಘ ಸಂಸ್ಥೆಗಳು ಸರ್ಕಾರದೊಂದಿಗೆ ಕೈ ಜೋಡಿಸಬೇಕು ಎಂದು ತಮ್ಮ ಸಂದೇಶದಲ್ಲಿ ತಿಳಿಸಿದ್ದಾರೆ.

ಪೌಷ್ಟಿಕ ಆಹಾರದ ಕೊರತೆಯಿಂದ ಬಡ ಕುಟುಂಬಗಳ ಮಕ್ಕಳು ಬಳಲುತ್ತಿವೆ. ಶಾಲೆಗಳಲ್ಲಿ ಹಾಜರಾತಿಯ ಪ್ರಮಾಣ ಕುಸಿಯಲು ಆಹಾರದ ಕೊರತೆ ಕೂಡ ಕಾರಣವಾಗಿದೆ. ಇದು ವೈಯಕ್ತಿಕ ನಷ್ಟ ಎಂದು ಭಾವಿಸಲಾಗದು. ಬದಲಿಗೆ ಇದು ದೇಶಕ್ಕಾದ ಹಾಗೂ ಮಾನವೀಯತೆಗಾದ ಸೋಲು ಎಂದು ಪ್ರಧಾನಿ ಬಣ್ಣಿಸಿದ್ದಾರೆ.

ಸಮಾಜ ಸೇವೆಯಲ್ಲಿ ತೊಡಗಿಕೊಂಡಿರುವ ಇತರ ಸಂಸ್ಥೆಗಳಿಗೆ, ಪ್ರಸ್ತುತ ಇಸ್ಕಾನ್‌ ಹಮ್ಮಿಕೊಂಡಿರುವ ಅಕ್ಷಯಪಾತ್ರೆ ಕಾರ್ಯಕ್ರಮ ಸ್ಫೂರ್ತಿಯಾಗಲಿ ಎಂದು ವಾಜಪೇಯಿ ಆಶಿಸಿದ್ದಾರೆ. ಕೇಂದ್ರ ಮಾನವ ಸಂಪನ್ಮೂಲ ಸಚಿವ ಮುರಳಿ ಮನೋಹರ ಜೋಶಿ ಕಾರ್ಯಕ್ರಮದಲ್ಲಿ ಹಾಜರಿದ್ದರು.

(ಯುಎನ್‌ಐ)