ಮಾಧವನ್‌ರಿಂದ ಜಡೇಜ, ಮೊಂಗಿಯಾ, ಇರಾನಿ ವಿಚಾರಣೆ

ಚೆನ್ನೈ : ಸಿಬಿಐನ ಮಾಜಿ ಜಂಟಿ ನಿರ್ದೇಶಕ ಆರ್‌.ಮಾಧವನ್‌ ಭಾನುವಾರ ಮ್ಯಾಚ್‌ಫಿಕ್ಸಿಂಗ್‌ ಆರೋಪಿಗಳಾದ ಅಜಯ್‌ ಜಡೇಜ, ನಯನ್‌ ಮೊಂಗಿಯಾ ಹಾಗೂ ಅಲಿ ಇರಾನಿ ಅವರನ್ನು ಪ್ರಶ್ನಿಸಿದ್ದಾರೆ.

ಸಿಬಿಐನ ಮ್ಯಾಚ್‌ಫಿಕ್ಸಿಂಗ್‌ ವರದಿಯ ಹಿನ್ನೆಲೆಯಲ್ಲಿ ಅಂತಿಮ ತನಿಖೆ ನಡೆಸಿ ವರದಿ ಸಲ್ಲಿಸುವಂತೆ ಬಿಸಿಸಿಐ ಮಾಧವನ್‌ ಅವರನ್ನು ವಿಶೇಷ ಆಯುಕ್ತರನ್ನಾಗಿ ನೇಮಿಸಿದೆ. ವಿಚಾರಣೆಗೆ ಶನಿವಾರವೇ ಬರುವಂತೆ ಕರೆ ಕೊಟ್ಟಿದ್ದರೂ ಕೈಕೊಟ್ಟಿದ್ದ ಅಜರ್‌, ಭಾನುವಾರವೂ ಮುಖ ತೋರಲಿಲ್ಲ. ಅಜರ್‌ ವರ್ತನೆಯಿಂದ ಹತಾಶರಾಗಿರುವಂತೆ ಕಂಡು ಬಂದ ಮಾಧವನ್‌, ಇನ್ನು ಅವರೇ ಖುದ್ದು ಬಂದರೂ ತಾವು ವಿಚಾರಣೆ ಮಾಡುವುದಿಲ್ಲ ಎಂದು ಖಂಡಾತುಂಡಾಗಿ ಹೇಳಿಬಿಟ್ಟರು.

ಬಿಗಿ ಪೊಲೀಸ್‌ ಪಹರೆಯ ನಡುವೆ ಸ್ಟಾರ್‌ ಹೊಟೇಲೊಂದರಲ್ಲಿ ವಿಚಾರಣೆ ನಡೆಯಿತು. ಮಾಧ್ಯಮದವರ ಮುಂದೆ ಬಾಯಿ ಬಿಡಲು ಇಚ್ಛಿಸದ ಆರೋಪ ಹೊತ್ತಿರುವ ಕ್ರಿಕೆಟಿಗರು ಹಾಗೂ ದೈಹಿಕ ತಜ್ಞ ಹೊಟೇಲಿನ ಹಿಂಬಾಗಿಲಿನಿಂದ ವಿಚಾರಣೆಗಾಗಿ ಒಳಹೊಕ್ಕರು. ಮ್ಯಾಚ್‌ಫಿಕ್ಸಿಂಗ್‌ ಕುರಿತು ನವೆಂಬರ್‌ 29ರಂದು ತನ್ನ ಸಾಮಾನ್ಯ ಸಭೆಯಲ್ಲಿ ಬಿಸಿಸಿಐ ಚರ್ಚಿಸಲಿದ್ದು, ಅಷ್ಟರೊಳಗೆ ಮಾಧವನ್‌ ತಮ್ಮ ವರದಿ ಸಲ್ಲಿಸಲಿದ್ದಾರೆ.

ಸಿಬಿಐ ವರದಿ ಹುರುಳಿಲ್ಲದ್ದು. ನಾನು ಒದಗಿಸಿರುವ ಸಾಕ್ಷ್ಯಗಳನ್ನು ಅದು ಸರಿಯಾಗಿ ಉಪಯೋಗಿಸಿಕೊಂಡೇ ಇಲ್ಲ. ಕೆಲವೊಂದು ಟೇಪ್‌ಗಳನ್ನೂ ಬಳಸಿಕೊಂಡಿಲ್ಲ. ಸಿಬಿಐ ಮಾಡಿರುವ ತಪ್ಪನ್ನು ಮಾಧವನ್‌ ಅವರಾದರೂ ತಿದ್ದಲಿ ಎಂಬುದು ನನ್ನ ಆಶಯ ಎಂದು ಶನಿವಾರ ವಿಚಾರಣೆಗೆ ಒಳಪಟ್ಟ ಪ್ರಭಾಕರ್‌ ಪ್ರತಿಕ್ರಿಯಿಸಿದ್ದಾರೆ.

(ಯುಎನ್‌ಐ)

ವಾರ್ತಾ ಸಂಚಯ
ಮುಖಪುಟ / ಆಟದ ಅಂಗಳ