ನವೆಂಬರ್‌ 9ರಿಂದ ಬೆಂಗಳೂರಲ್ಲಿ ಹಳೆ ಹುಲಿಗಳ ಟೆನಿಸ್‌ ಕಾಳಗ

* ರಾಂ ರಾಜ್‌

ಬೆಂಗಳೂರು : ಹದಿನೈದು ವರ್ಷಗಳ ಹಿಂದೆ ಡೇವಿಸ್‌ ಕಪ್‌ ಟೂರ್ನಿಯನ್ನು ನಡೆಸಿದ ನಂತರ ಮತ್ತೀಗ ದೊಡ್ಡ ಟೂರ್ನಿಯಾಂದರ ಸಿದ್ಧತೆ ನಗರದಲ್ಲಿ ಸಮರೋಪಾದಿಯಲ್ಲಿ ನಡೆದಿದೆ. ಡಿಸೆಂಬರ್‌ 2ನೇ ವಾರ ಶುರುವಾಗುವ ಎಟಿಪಿ ಡಬಲ್ಸ್‌ಗೆ ಮುನ್ನ ನವೆಂಬರ್‌ 9ರಿಂದ ಹಳೆಯ ಹುಲಿಗಳ ಟೆನಿಸ್‌ ಕಾಳಗ ರಾಜ್ಯ ಲಾನ್‌ ಟೆನಿಸ್‌ ಒಕ್ಕೂಟದ ಕ್ರೀಡಾಂಗಣ (ಕೆ ಎಸ್‌ ಎಲ್‌ ಟಿ ಎ) ದಲ್ಲಿ ನಡೆಯಲಿದೆ.

ವಿಶ್ವದ 8 ಹಳೆಯ ಟೆನಿಸ್‌ ದಿಗ್ಗಜಗಳು ಬುಧವಾರ ನಗರದಲ್ಲಿ ಬಂದಿಳಿಯುವ ಹೊತ್ತಿಗೆ ಪ್ಲೆಕ್ಸಿಪ್ಲಾವ್‌ ಕೃತಕ ಪದರವನ್ನು ಸಿದ್ಧ ಮಾಡುವ ಕಾರ್ಯ ಕಬ್ಬನ್‌ ಉದ್ಯಾನದಲ್ಲಿರುವ ಕ್ರೀಡಾಂಗಣದಲ್ಲಿ ಭರದಿಂದ ಸಾಗಿದೆ. ಎಟಿಪಿ ವಿಶ್ವ ಡಬಲ್ಸ್‌ಗೂ ಅಂಕಣವನ್ನು ಅಭಿವೃದ್ಧಿಗೊಳಿಸುವ ಕಾರ್ಯಗಳು ನಡೆದಿವೆಯಾದರೂ ನವೆಂಬರ್‌ 9ರ ಹೊತ್ತಿಗೇ ಈ ಕಾರ್ಯ ಪೂರ್ಣವಾಗದು.

ಬೋನ್‌ ಬೊರ್ಗ್‌, ಗಿಲ್ಲರ್ಮೊ ವಿಲಾಸ್‌, ಹೆನ್ರಿ ಲೆಕೋಂಟೆ, ಪ್ಯಾಟ್‌ ಕ್ಯಾಷ್‌, ರಾಸ್‌ ಕೇಸ್‌, ಮನ್ಸೂರ್‌ ಬಹರಾಮಿ, ವಿಜಯ್‌ ಅಮೃತ್‌ ರಾಜ್‌ ಹಾಗೂ ಆನಂದ್‌ ಅಮೃತ್‌ರಾಜ್‌ ಟೂರ್ನಿಯಲ್ಲಿ ಸೆಣೆಸಲಿರುವ ಹಳೆಯ ಹುಲಿಗಳು.

ಸಾಕಷ್ಟು ಕಿರಿಕಿರಿಗೆ ಒಳಗಾಗಿರುವ ಕೆಎಸ್‌ಎಲ್‌ಟಿಎ ಕಾರ್ಯದರ್ಶಿ ಅಂತಿಮ ಸಿದ್ಧತೆಯಲ್ಲಿ ಮುಳುಗಿದ್ದಾರೆ. ಒಕ್ಕೂಟದ ಇತರೆ ಅಧಿಕಾರಿಗಳು ಆಗಾಗ ಪ್ರತ್ಯಕ್ಷರಾಗಿ ಹಳೆ ದಿಗ್ಗಜಗಳು ಸೆಣೆಸುವ ಕಣದಲ್ಲಿನ ಸಿದ್ಧತೆಗಳನ್ನು ಪರಿಶೀಲಿಸುತ್ತಿದ್ದಾರೆ. ಬೊರ್ಗ್‌ ಸೇರಿದಂತೆ ಈಗಾಗಲೇ ಭಾರತಕ್ಕೆ ಕೆಲವು ಟೆನಿಸ್‌ ದಿಗ್ಗಜಗಳು ಬಂದಿದ್ದಾರೆ. ಚೆನ್ನೈ ಮಾರ್ಗವಾಗಿ ಬುಧವಾರ ನಗರಕ್ಕೆ ತಲುಪಲಿರುವ ಈ ಕ್ರೀಡಾ ಪಟುಗಳು ಡಿಸೆಂಬರ್‌ನಲ್ಲಿ ನಡೆಯಲಿರುವ ವಿಶ್ವ ಎಟಿಪಿ ಡಬಲ್ಸ್‌ಗೆ ಮುನ್ನ ಟೆನಿಸ್‌ ಅಭಿಮಾನಿಗಳನ್ನು ಹುರಿದುಂಬಿಸಲಿದ್ದಾರೆ.

ತಮ್ಮದೇ ಆದ ಫ್ಯಾನ್‌ಗಳನ್ನು ಹುಟ್ಟು ಹಾಕಿದ್ದ ಟೆನಿಸ್‌ ಲೆಜೆಂಡ್‌ಗಳನ್ನು ಇದಿರುಗೊಳ್ಳಲು ಮಾಲಿನ್ಯ ನಗರಿ ಸಜ್ಜಾಗಿದೆ.

(ಇನ್ಫೋ ವಾರ್ತೆ)