ಹೈದರಾಬಾದ್‌ಗೆ ಫಾಲೋಆನ್‌:ರಾಜ್ಯ ತಂಡಕ್ಕೆ ಇನಿಂಗ್ಸ್‌ ಮುನ್ನಡೆ

ಬೆಂಗಳೂರು : ಮೊದಲ ಇನಿಂಗ್ಸ್‌ನಲ್ಲಿ 254 ರನ್‌ಗಳ ಹಿನ್ನಡೆಯಾಂದಿಗೆ ಫಾಲೋಆನ್‌ ಪಡೆದಿರುವ ಹೈದರಾಬಾದ್‌ ತಂಡ ಮೂರನೇ ದಿನದಾಟದ ಕೊನೆಗೆ ವಿಕೆಟ್‌ ನಷ್ಟವಿಲ್ಲದೆ 10 ರನ್‌ ಗಳಿಸಿತ್ತು .

ಎರಡನೇ ದಿನದ ಕೊನೆಗೆ ವಿಕೆಟ್‌ ನಷ್ಟವಿಲ್ಲದೆ 48 ರನ್‌ ಗಳಿಸಿದ್ದ ಹೈದರಾಬಾದ್‌ ತಂಡ, ಮೂರನೇ ದಿನದ ಆಟದಲ್ಲಿ ನಂದಕಿಶೋರ್‌ ಅವರನ್ನು ಬೇಗನೆ ಕಳೆದುಕೊಂಡಿತು. 18 ರನ್‌ ಗಳಿಸಿದ್ದ ಅವರು ಶ್ರೀನಾಥ್‌ಗೆ ಎಲ್‌ಬಿ ಆದರು. ಆ ಸಂದರ್ಭದಲ್ಲಿ ಡೇನಿಯಲ್‌ ಮನೋಹರ್‌ ಅವರನ್ನು ಸೇರಿಕೊಂಡ ನಾಯಕ ವಿ.ವಿ.ಎಸ್‌. ಲಕ್ಷ್ಮಣ್‌ ಎರಡನೇ ವಿಕೆಟ್‌ ಜೊತೆಯಾಟಕ್ಕೆ 103 ರನ್‌ ಕಲೆಹಾಕಿ ತಂಡಕ್ಕೆ ಉತ್ತಮ ಬುನಾದಿ ಹಾಕಿದರು. ನಂತರ ಬಂದ ವಿನಯ್‌ ಕುಮಾರ್‌ ಕೂಡ ಉತ್ತಮ ಆಟವಾಡಿದರು. ಆದರೆ, ಉಳಿದ ಬ್ಯಾಟ್ಸ್‌ಮನ್‌ಗಳು ಕಚ್ಚಿ ನಿಂತು ಆಡದ ಕಾರಣ ಹೈದರಾಬಾದ್‌ನ ಮೊದಲ ಇನಿಂಗ್ಸ್‌ , 291 ರನ್‌ಗಳು- ಫಾಲೋಆನ್‌ನೊಂದಿಗೆ ಕೊನೆಗೊಂಡಿತು.

ಜೋಷಿ ಬೌಲಿಂಗ್‌ನಲ್ಲಿ ತಿಲಕ್‌ನಾಯ್ಡು ಅವರಿಂದ ಸ್ಟಂಪ್‌ ಆಗುವ ಮುನ್ನ , 8 ಬೌಂಡರಿ ಮತ್ತು 2 ಸಿಕ್ಸರ್‌ಗಳನ್ನೊಳಗೊಂಡಿದ್ದ 60 ರನ್‌(92)ಗಳನ್ನು ಲಕ್ಷ್ಮಣ್‌ ಸಿಡಿಸಿದ್ದರು. ಮನೋಹರ್‌ 73 ರನ್‌ ಗಳಿಸಿದರೆ, ವಿನಯ್‌ಕುಮಾರ್‌ 68 ರನ್‌ ಗಳಿಸಿ ಗಮನ ಸೆಳೆದರು.

ಹೈದರಾಬಾದ್‌ನ ನಾಲ್ವರು ಆಟಗಾರರನ್ನು ಔಟ್‌ ಮಾಡಿದ ಶ್ರೀನಾಥ್‌ ರಾಜ್ಯ ತಂಡದ ಯಶಸ್ವಿ ಬೌಲರ್‌ ಎನಿಸಿದರೂ, ಅವರ ಬೌಲಿಂಗ್‌ನಲ್ಲಿ ಎದುರಾಳಿಗಳು ಸಾಕಷ್ಟು ರನ್‌ ಗಳಿಸಿದರು. 11 ನೋಬಾಲ್‌ ಎಸೆದ ಶ್ರೀನಾಥ್‌ ತಮ್ಮ ಮೊನಚು ಕಂಡುಕೊಳ್ಳುವಲ್ಲಿ ಸಮಸ್ಯೆ ಎದುರಿಸುತ್ತಿದ್ದುದು ಸ್ಪಷ್ಟವಾಗಿತ್ತು . ಉಳಿದಂತೆ ಪ್ರಸಾದ್‌ ಹಾಗೂ ಜೋಷಿ ತಲಾ 2 ಮತ್ತು ಗಣೇಶ್‌ ಹಾಗೂ ಆನಂದ್‌ ಯಲವಗಿ ತಲಾ 1 ವಿಕೆಟ್‌ ಗಳಿಸಿದರು.

(ಇನ್ಫೋ ವಾರ್ತೆ)