‘ಜಯದೇವ ಆಸ್ಪತ್ರೆಯ ನಿರ್ದೇಶಕರಾಗಿ ಪ್ರಭುದೇವ್‌ ನೇಮಕಾತಿ ಕ್ರಮಬದ್ಧ ’

ಬೆಂಗಳೂರು : ಸೇವೆಯಿಂದ ನಿವೃತ್ತಿಯಾಗುವವರೆಗೆ ಡಾ. ಪ್ರಭುದೇವ ಅವರು, ಜಯದೇವ ಹೃದ್ರೋಗ ಆಸ್ಪತ್ರೆಯ ನಿರ್ದೇಶಕರಾಗಿ ನೇಮಕಗೊಂಡಿರುವ ಆದೇಶದ ಕ್ರಮ ಬದ್ಧತೆಯನ್ನು ರಾಜ್ಯ ಹೈಕೋರ್ಟ್‌ ವಿಭಾಗೀಯ ಪೀಠ ಶುಕ್ರವಾರ ಎತ್ತಿ ಹಿಡಿದಿದೆ.

ನಿರ್ದೆಶಕರಾಗಿ ಮುಂದುವರೆಯದಂತೆ ನ್ಯಾಯಮೂರ್ತಿ ಎ.ವಿ. ಶ್ರೀನಿವಾಸ ರೆಡ್ಡಿ ಜುಲೈ 24 ರಂದು ನೀಡಿದ್ದ ತೀರ್ಪನ್ನು ವಿಭಾಗೀಯ ಪೀಠದ ನ್ಯಾಯಮೂರ್ತಿಗಳಾದ ಜಿ.ಸಿ. ಭರೂಕ ಮತ್ತು ಮಂಜುಳಾ ಚೆಲ್ಲೂರು ರದ್ದು ಪಡಿಸಿದರು. ಅರ್ಜಿದಾರರಾದ ಮೂವರು ವೈದ್ಯರೂ ಕೇವಲ ದುರುದ್ದೇಶದಿಂದ ಅರ್ಜಿ ಸಲ್ಲಿಸಿದ್ದಾರೆ. ಅವರು ತಲಾ 5 ಸಾವಿರ ರೂಪಾಯಿಯಂತೆ ಪ್ರಭದೇವ ಅವರಿಗೆ ಕೋರ್ಟ್‌ ವೆಚ್ಚ ನೀಡಬೇಕು ಎಂದು ತೀರ್ಪಿನಲ್ಲಿ ಹೇಳಲಾಗಿದೆ.

1997ರ ಏಪ್ರಿಲ್‌ 29ರಂದು ಪ್ರಭುದೇವ ಅವರನ್ನು ಜೆ.ಎಚ್‌. ಪಟೇಲ್‌ ನೇತೃತ್ವದ ಜನತಾದಳ ಸರಕಾರ, ಜಯದೇವ ಆಸ್ಪತ್ರೆಯ ನಿರ್ದೇಶಕರನ್ನಾಗಿ ನೇಮಿಸಿತ್ತು. ಅದಾದ ಮೂರು ವರ್ಷಗಳ ನಂತರ ನೇಮಕವನ್ನು ಪ್ರಶ್ನಿಸಿರುವುದು ಸರಿಯಲ್ಲ ಎಂದು ವಿಭಾಗೀಯ ನ್ಯಾಯಪೀಠ ಹೇಳಿದೆ.

(ಇನ್ಫೋ ವಾರ್ತೆ)