ಶೀಘ್ರವೇ ಖಾಸಗಿ ಆಸ್ಪತ್ರೆಗಳ ಉತ್ತರದಾಯಿತ್ವ ಮಸೂದೆ ಮಂಡನೆ- ಸಚಿವ

ಜೈಪುರ: ಖಾಸಗಿ ಆಸ್ಪತ್ರೆ ಮತ್ತು ನರ್ಸಿಂಗ್‌ ಹೋಂಗಳ ಉತ್ತರದಾಯಿತ್ವಕ್ಕೆ ಸಂಬಂಧಿಸಿದಂತೆ ಕೇಂದ್ರ ಸರಕಾರ ಮಸೂದೆಯನ್ನು ಶೀಘ್ರವಾಗಿ ಮಂಡಿಸಲಿದೆ ಎಂದು ಕೇಂದ್ರ ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಸಚಿವ ಸಿ. ಪಿ. ಥಾಕೂರ್‌ ಸೋಮವಾರ ಹೇಳಿದ್ದಾರೆ.

ಗರ್ಭಪಾತ, ಏಡ್ಸ್‌ ಮತ್ತು ಹೆಪಟೈಟಿಸ್‌ ರೋಗಗಳ ಬಗ್ಗೆ ನಿಖರ ಮಾಹಿತಿ ದಾಖಲಿಸುವುದು ಸೇರಿದಂತೆ ಎಲ್ಲ ಖಾಸಗಿ ಆಸ್ಪತ್ರೆಗಳು ಸೂಕ್ತ ಉತ್ತರದಾಯಿತ್ವ ಹಾಗೂ ಪಾರದರ್ಶಕ ವ್ಯವಸ್ಥೆಯನ್ನು ಅನುಸರಿಸಲು ಮತ್ತು ಆಧುನಿಕ ವೈದ್ಯಕೀಯ ಬೆಳವಣಿಗೆಗಳ ಬಗ್ಗೆ ಖಾಸಗಿ ವೈದ್ಯರಿಗೆ ಅರಿವಿರುವಂತೆ ನೋಡಿಕೊಳ್ಳಲು ನಿರಂತರ ವೈದ್ಯಕೀಯ ಶಿಕ್ಷಣ ನೀಡಲು ಕ್ರಮ ಮುಂತಾದ ಹೊಸ ಪದ್ಧತಿಗಳು ಮಸೂದೆಯಿಂದ ಜಾರಿಗೊಳ್ಳಲಿವೆ.

ಹೊಸ ಕಾರ್ಯಸೂಚಿ: ಖಾಸಗಿ ನರ್ಸಿಂಗ್‌ ಹೋಂಗಳು ಮತ್ತು ಆಸ್ಪತ್ರೆಗಳು ನಾಯಿಕೊಡೆಗಳಂತೆ ತಲೆಯೆತ್ತುತ್ತಿರುವುದನ್ನು ತಡೆಯಲು ಸರಕಾರ ಮೂರು ಅಂಶಗಳ ಹೊಸ ಕಾರ್ಯಸೂಚಿಯನ್ನು ಹೊಂದಲಿದ್ದು , ಫಾರ್ಮಾಸ್ಯೂಟಿಕಲ್‌ ಕಂಪನಿಗಳು ಹೆಚ್ಚಿಸುತ್ತಿರುವ ಔಷಧಿಗಳ ಬೆಲೆಗಳ ಮೇಲೆ ಕಡಿವಾಣ ಹಾಕಲಾಗುವುದೆಂದು ಸಚಿವರು ತಿಳಿಸಿದ್ದಾರೆ.

ಔಷಧಿಗಳ ಬೆಲೆ ಕುರಿತು ಅಂತಿಮ ನಿರ್ಧಾರಕ್ಕೆ ಬರುವ ಮುಂಚೆ ಔಷಧಿ ಕಂಪನಿಗಳು ಮತ್ತು ಸರಕಾರದ ಉನ್ನತ ಮಟ್ಟದ ಅಧಿಕಾರಿಗಳ ಸಭೆ ಕರೆಯಲಾಗುವುದೆಂದು ಥಾಕೂರ್‌ ತಿಳಿಸಿದ್ದಾರೆ.