ಬಿಡುಗಡೆಯಾಗಿದ್ದು ಡಾ. ರಾಜ್‌ ಅಲ್ಲ ಗೋವಿಂದರಾಜ್‌

ಚೆನ್ನೈ : ಡಾ. ರಾಜಕುಮಾರ್‌ ಅವರ ಅಳಿಯ ಗೋವಿಂದರಾಜ್‌ ಅವರನ್ನು ವೀರಪ್ಪನ್‌ ಒತ್ತೆಯಿಂದ ಬಿಡುಗಡೆ ಮಾಡಿದ್ದಾನೆ. ಗೋವಿಂದರಾಜ್‌ ಅವರು, ಈರೋಡ್‌ ಮಾರ್ಗವಾಗಿ ಬೆಂಗಳೂರಿಗೆ ಬರುತ್ತಿದ್ದಾರೆ. ಅನಾರೋಗ್ಯದಿಂದ ಬಳಲುತ್ತಿದ್ದ ಗೋವಿಂದರಾಜ್‌ ಅವರನ್ನು ಮಾತ್ರ ಬಿಡುಗಡೆ ಮಾಡಲಾಗಿದೆ ಎಂಬ ಖಚಿತ ವರ್ತಮಾನಗಳಿಂದಾಗಿ ರಾಜ್‌ ಬಿಡುಗಡೆ ಯಾವಾಗ ಎಂಬ ಪ್ರಶ್ನೆ ಉದ್ಭವಿಸಿದೆ.

ಸೋಮವಾರ ಸಂಜೆ 7-30ರ ಸುಮಾರಿನಲ್ಲಿ ಗೋವಿಂದ್‌ರಾಜ್‌ ಅವರು ಸತ್ಯಮಂಗಲ ಅರಣ್ಯ ಪ್ರದೇಶದಲ್ಲಿ ಕಾಣಿಸಿಕೊಂಡಿದ್ದು ಬೆಂಗಳೂರಿನತ್ತ ಹೊರಟಿದ್ದಾರೆ. ಅವರಿಂದ ಹೆಚ್ಚಿನ ವಿವರಗಳು ಹೊರಬೀಳುವ ಸಾಧ್ಯತೆ ಇದ್ದು, ರಾಜ್‌ ಬಿಡುಗಡೆ ಯಾವಾಗ ಎಂಬ ಬಗ್ಗೆ ನಿಖರವಾದ ಮಾಹಿತಿ ದೊರಕಲಿದೆ. ಗೋವಿಂದರಾಜ್‌ ಜತೆ ಪಳ ನೆಡುಮಾರನ್‌ ಕೂಡ ಬೆಂಗಳೂರಿಗೆ ಬರುತ್ತಿದ್ದಾರೆ. ಗೋವಿಂದರಾಜ್‌ ಬಿಡುಗಡೆ ಆಗಿರುವ ವಿಷಯವನ್ನು ತಮಿಳುನಾಡು ಹೆಚ್ಚುವರಿ ಪೊಲೀಸ್‌ ಮಹಾ ನಿರ್ದೇಶಕ ಎ.ಎಕ್ಸ್‌. ಅಲೆಕ್ಸಾಂಡರ್‌ ಖಚಿತ ಪಡಿಸಿದ್ದಾರೆ.

ಈ ಮಧ್ಯೆ ಸೋಮವಾರ ರಾತ್ರಿಯೇ ಡಾ. ರಾಜ್‌ಕುಮಾರ್‌ ಅವರ ಬಿಡುಗಡೆ ಸಹ ಆಗುತ್ತದೆ ಎಂದು ತಮಗೆ ಖಚಿತ ವರ್ತಮಾನ ಬಂದಿರುವುದಾಗಿ ನಕ್ಕೀರನ್‌ ಪತ್ರಿಕೆಯ ಸಹಾಯಕ ಸಂಪಾದಕ ಎ. ಕಾಮರಾಜ್‌ ತಿಳಿಸಿದ್ದಾರೆ. ಕಾಡಿನಲ್ಲಿ ನಡೆದ ಮಾತುಕತೆ ಹಾಗೂ ಬಿಡುಗಡೆಯ ವಿವರಗಳು ಈಗಾಗಲೇ ಸೋಮವಾರ ಕಾಡು ಪ್ರವೇಶಿಸಿರುವ ತಮ್ಮ ವರದಿಗಾರರಿಂದ ತಿಳಿಯಲಿದೆ ಎಂದೂ ಅವರು ಹೇಳಿದ್ದಾರೆ.

ರಾಜ್‌ರನ್ನು ವೀರಪ್ಪನ್‌ ಬಳಿ ಬಿಟ್ಟು ಬರುತ್ತಿರುವ ಸಂಧಾನಕಾರರು: ಆದರೆ, ಮತ್ತೊಂದು ಮೂಲಗಳ ರೀತ್ಯ ವೀರಪ್ಪನ್‌ ಟಾಡಾ ಬಂದಿಗಳ ಬಿಡುಗಡೆಗೆ ಪಟ್ಟು ಹಿಡಿದಿದ್ದು, ರಾಜ್‌ಕುಮಾರ್‌ರನ್ನು ಬಿಡುಗಡೆ ಮಾಡಲು ನಿರಾಕರಿಸಿದ್ದಾನೆ. ಹೀಗಾಗಿ ಸಂಧಾನಕಾರರು ರಾಜ್‌ಕುಮಾರ್‌ ಹಾಗೂ ನಾಗೇಶ್‌ ಅವರನ್ನು ವೀರಪ್ಪನ್‌ ಬಳಿಯೇ ಬಿಟ್ಟು, ನಾಡಿನತ್ತ ಹೊರಟಿದ್ದಾರೆ. ಮಂಗಳವಾರ ಸುಪ್ರೀಂ ಕೋರ್ಟ್‌ ತೀರ್ಪು ಬಂದ ಬಳಿಕ ರಾಜ್‌ ಬಿಡುಗಡೆ ಎಂದು ಎಂಬುದು ಗೊತ್ತಾಗಲಿದೆ.

ವಾರ್ತಾ ಸಂಚಯ
ಮುಖಪುಟ / ರಾಜ್‌ ಅಪಹರಣ