ಟೆಲಿಕಾಂ ಫುಟ್‌ಬಾಲ್‌: ಸೆಮಿಫೈನಲ್ಸ್‌ಗೆ ಕರ್ನಾಟಕ

ಬೆಂಗಳೂರು : ನಗರದಲ್ಲಿ ನಡೆಯುತ್ತಿರುವ 16ನೇ ಅಖಿಲ ಭಾರತ ಟೆಲಿಕಾಂ ಫುಟ್‌ಬಾಲ್‌ ಟೂರ್ನಿಯಲ್ಲಿ ಕರ್ನಾಟಕ, ತಮಿಳುನಾಡು, ಪಶ್ಚಿಮ ಬಂಗಾಳ ಹಾಗೂ ಕೇರಳ ಸೆಮಿಫೈನಲ್ಸ್‌ ತಲುಪಿವೆ.

ಭಾನುವಾರ ನಡೆದ ಪಂದ್ಯದಲ್ಲಿ ಮಧ್ಯಪ್ರದೇಶವನ್ನು 8-0 ಗೋಲುಗಳ ಅಂತರದಿಂದ ಸೋಲಿಸಿದ ಕರ್ನಾಟಕ ಸೆಮಿಫೈನಲ್ಸ್‌ನಲ್ಲಿ ಪಶ್ಚಿಮ ಬಂಗಾಳ ತಂಡವನ್ನು ಎದುರಿಸಲಿದೆ. ಸೋಮವಾರ ನಡೆದ ಪಂದ್ಯದಲ್ಲಿ ಆಂಧ್ರಪ್ರದೇಶವನ್ನು 2-0 ಗೋಲುಗಳಿಂದ ಮಣಿಸಿದ ತಮಿಳುನಾಡು ಮಂಗಳವಾರ ಕೇರಳ ವಿರುದ್ಧ ಸೆಣೆಸಲಿದೆ.

ಭಾನುವಾರದ ಪಂದ್ಯದಲ್ಲಿ ಭಾರತದ ಪರ ಬಿ.ಸುರೇಶ್‌ ಕುಮಾರ್‌, ಕದಿರವನ್‌ ಹಾಗೂ ಇಪ್ತಿಕಾರ್‌ ಅಹಮ್ಮದ್‌ ತಲಾ 2 ಗೋಲು ಗಳಿಸಿದರು. ಟೂರ್ನಿಯಲ್ಲಿ ಈವರೆಗೆ ಆಡಿರುವ ಮೂರೂ ಪಂದ್ಯಗಳನ್ನು ಕರ್ನಾಟಕ ಗೆದ್ದಿದ್ದು, ಕಪ್‌ ಗೆಲ್ಲುವ ನೆಚ್ಚಿನ ತಂಡವಾಗಿದೆ.

(ಯುಎನ್‌ಐ)