ಉದ್ಯೋಗಾವಕಾಶಗಳು ನಿಮ್ಮ ಕಣ್ಣ ಮುಂದೆ ಬಂದು ನಿಲ್ಲಲಿವೆ !
ಹೈದರಾಬಾದ್: ಪ್ರಪಂಚದ ಮೊದಲ ಆನ್ಲೈನ್ ನೇಮಕಾತಿ ಸಂಸ್ಥೆ ಎಂಬ ಹೆಗ್ಗಳಿಕೆ ಪಡೆದಿರುವ ಕೆರಿಯರ್ ಮೊಸಾಯಿಕ್, ತನ್ನ ಸೇವೆಯನ್ನು ಭಾರತದಲ್ಲಿ ಗುರುವಾರದಿಂದ ಆರಂಭಿಸಿದೆ.
ಭಾರತದ ಐಟಿ ತಂತ್ರಜ್ಞರಿಗೆ ಅಂತಾರಾಷ್ಟ್ರೀಯ ಮಟ್ಟದ ಅವಕಾಶಗಳನ್ನು ಮುಕ್ತವಾಗಿಸುವುದು, ನೇರ ನೇಮಕಾತಿ ಮಾಡಿಸುವುದು ಈ ಸೈಟ್ನ ಗುರಿಯಾಗಿದೆ. ಈ ಉದ್ದೇಶಕ್ಕಾಗಿ ಭಾರತದ ಇನ್ನೊಂದು ಹೆಸರಾಂತ ವೆಬ್ಸೈಟ್ ಕೆರಿಯರ್ ಕಮ್ಯೂನಿಟಿ ಡಾಟ್ ಕಾಮ್ ಎಂಬ ವೆಬ್ಸೈಟ್ನೊಂದಿಗೆ ಒಪ್ಪಂದವನ್ನೂ ಮಾಡಿಕೊಂಡಿದ್ದು, www.careermosaicindia.com ಎಂಬ ವೆಬ್ ಸೈಟನ್ನು ಆರಂಭಿಸಿದೆ.
ಹೊಂದಾಣಿಕೆ: ಭಾರತದ ಐಟಿ ಕ್ಷೇತ್ರದ ಪ್ರತಿಭಾವಂತರಿಗೆ ಅಂತಾರಾಷ್ಟ್ರೀಯ ಮಟ್ಟದ ಅವಕಾಶಗಳನ್ನು ಕಲ್ಪಿಸುವ ಪ್ರಮುಖ ಉದ್ದೇಶದಿಂದ ಜಗತ್ತಿನಾದ್ಯಂತ ಜಾಲವನ್ನು ವಿಸ್ತರಿಲು ಅಮೆರಿಕದ ಹೆಸರಾಂತ www.headhunter.net ನ ಜೊತೆ ಏಪ್ರಿಲ್ನಲ್ಲೇ ಹೊಂದಾಣಿಕೆ ಮಾಡಿಕೊಳ್ಳಲಾಗಿದೆ. ಪ್ರಪಂಚಾದ್ಯಂತ 12 ದೇಶಗಳಲ್ಲಿ ಇರುವ ಮಾಹಿತಿ ತಂತ್ರಜ್ಞಾನ ಕ್ಷೇತ್ರದ ಹುದ್ದೆಗಳಿಗೆ ಕೆರಿಯರ್ ಮೊಸಾಯಿಕ್ ಇಂಡಿಯಾದ ಮೂಲಕ ನೇರ ನೇಮಕಾತಿ ಪಡೆಯಬಹುದಾಗಿದೆ. ಪ್ರಪಂಚದ ಪ್ರಮುಖ ಕಂಪನಿಗಳ ಬಗ್ಗೆ ಮಾಹಿತಿಯನ್ನು ಸೈಟ್ನಲ್ಲಿ ನಿರಂತರವಾಗಿ ನೀಡಲಾಗುವುದೆಂದು ಕೆರಿಯರ್ ಕಮ್ಯೂನಿಟಿ ಡಾಟ್ ಕಾಮ್ನ ವ್ಯವಸ್ಥಾಪಕ ನಿರ್ದೇಶಕ ಮುರಳೀಧರ್ ತಿಳಿಸಿದ್ದಾರೆ.