ಗೌರೀಶ್‌ ಕಾಯ್ಕಿಣಿ, ಶಂಕರಾನಂದರಿಗೆ ಡಾ. ಜಚನಿ ಪ್ರಶಸ್ತಿ

ಮೈಸೂರು: ಈ ಸಾಲಿನ ಡಾ. ಜಚನಿ ಮಾನವತಾ ಪ್ರಶಸ್ತಿಗೆ ಕೇಂದ್ರದ ಮಾಜಿ ಸಚಿವ ಬಿ. ಶಂಕರಾನಂದ ಹಾಗೂ ಜಚನಿ ವಿಚಾರ ಸಾಹಿತ್ಯ ಪ್ರಶಸ್ತಿಗೆ ಹೆಸರಾಂತ ಸಾಹಿತಿ ಗೌರೀಶ್‌ ಕಾಯ್ಕಿಣಿ ಆಯ್ಕೆಯಾಗಿದ್ದಾರೆ.

ನಿಡುಮಾಮಿಡಿ ಮಠ ನೀಡುವ ಈ ಪ್ರಶಸ್ತಿ , 25 ಸಾವಿರ ರುಪಾಯಿ ನಗದು ಹಾಗೂ ಸ್ಮರಣಿಕೆಯನ್ನು ಹೊಂದಿದೆ. ಜಚನಿ ಅವರ 92ನೇ ಜಯಂತಿ ಅಂಗವಾಗಿ ಅಕ್ಟೋಬರ್‌ 22ರಂದು ನಡೆಯುವ ಸಮಾರಂಭದಲ್ಲಿ ಪ್ರಶಸ್ತಿಯನ್ನು ಪ್ರದಾನ ಮಾಡಲಾಗುವುದೆಂದು ನಿಡುಮಾಮಿಡಿ ಮಠದ ವೀರಭದ್ರ ಚನ್ನಮಲ್ಲ ಸ್ವಾಮೀಜಿ ಬುಧವಾರ ಪತ್ರಿಕಾಗೋಷ್ಠಿಯಲ್ಲಿ ತಿಳಿಸಿದ್ದಾರೆ.

ಜಚನಿ ಜಯಂತಿಯನ್ನು ಕೇಂದ್ರ ಸಚಿವ ವಿ. ಶ್ರೀನಿವಾಸ ಪ್ರಸಾದ್‌ ಉದ್ಘಾಟಿಸಲಿದ್ದು, ‘ಸಾಹಿತ್ಯ ಸೂರ್ಯ ಜಚನಿ’ ಎಂಬ ಗ್ರಂಥವನ್ನು ಪ್ರಾಥಮಿಕ ಮತ್ತು ಪ್ರೌಢ ಶಿಕ್ಷಣ ಸಚಿವ ಎಚ್‌. ವಿಶ್ವನಾಥ್‌ ಬಿಡುಗಡೆ ಮಾಡುವರು. ಕಾರ್ಯಕ್ರಮದಲ್ಲಿ ಸಚಿವರಾದ ಕೆ. ಎಚ್‌. ರಂಗನಾಥ್‌, ಎಂ. ಶಿವಣ್ಣ , ರಾಣಿ ಸತೀಶ್‌ ಮುಂತಾದವರು ಭಾಗವಹಿಸಲಿದ್ದಾರೆ ಎಂದು ಸ್ವಾಮೀಜಿಗಳು ತಿಳಿಸಿದ್ದಾರೆ.

ಈ ಪ್ರಶಸ್ತಿಯನ್ನು ಹಿಂದೆ ಎಸ್‌. ನಿಜಲಿಂಗಪ್ಪ, ಡಾ. ಎಚ್‌. ನರಸಿಂಹಯ್ಯ, ಡಾ. ದೇ. ಜವರೇಗೌಡ ಹಾಗೂ ಪ್ರೊ. ನಂಜುಂಡಸ್ವಾಮಿ ಅವರು ಪಡೆದಿದ್ದಾರೆ.