ವೀರಪ್ಪನ್‌ ಸಂಪರ್ಕ ಸಾಧಿಸಿದ ಗೋಪಾಲ್‌ ನೇತೃತ್ವದಸಂಧಾನ ತಂಡ

ಚೆನ್ನೈ : ರಾಜ್‌ಕುಮಾರ್‌ ಹಾಗೂ ಮತ್ತಿತರ ಇಬ್ಬರನ್ನು ವೀರಪ್ಪನ್‌ ಬಂಧನದಿಂದ ಬಿಡಿಸಿಕೊಂಡು ಬರಲು ಕಾಡಿಗೆ ತೆರಳಿರುವ ನಕ್ಕೀರನ್‌ ಗೋಪಾಲ್‌ ನೇತೃತ್ವದ ತಂಡ ಶುಕ್ರವಾರ ಬೆಳಗ್ಗೆ ವೀರಪ್ಪನ್‌ ಚಾರರಿಂದ ಸಂದೇಶ ಸ್ವೀಕರಿಸಿದೆ. ಶುಕ್ರವಾರ ಸಂಜೆಯ ವೇಳೆಗೆ ತಂಡ ವೀರಪ್ಪನ್‌ನನ್ನು ಭೇಟಿ ಮಾಡಲಿದೆ ಎಂದು ನಕ್ಕೀರನ್‌ ಪತ್ರಿಕೆಯ ಮೂಲಗಳು ತಿಳಿಸಿವೆ.

ಈ ಬಾರಿ ಸಂಧಾನಕಾರ ಗೋಪಾಲ್‌ ಜತೆ ಇನ್ನೂ ನಾಲ್ವರು ಕಾಡಿಗೆ ತೆರಳಿಸಿದ್ದಾರೆ. ಪಳ ನೆಡುಮಾರನ್‌, ಪತ್ರಕರ್ತ ಸುಕುಮಾರನ್‌, ಮಾನವ ಹಕ್ಕು ಆಯೋಗದ ಪ್ರೊ. ಕಲ್ಯಾಣಿ ಅವರನ್ನು ಗುರುವಾರ ಎಲ್‌.ಟಿ.ಟಿ.ಇ. ಪರ ವಕೀಲ ಚಂದ್ರಶೇಖರನ್‌ ಜತೆಗೂಡಿದ್ದಾರೆ.

ಬೆಂಗಳೂರು ವರದಿ: ಈ ಮಧ್ಯೆ ಸರ್ವೋಚ್ಚ ನ್ಯಾಯಾಲಯ ಕೇಳಿರುವ ಕೆಲವು ವಿವರಣೆಗಳಿಗೆ ಸಂಬಂಧಿಸಿದಂತೆ ದಾಖಲಾತಿಗಳನ್ನು ಸಲ್ಲಿಸುವ ಸಂಬಂಧ ರಾಜ್ಯ ಸರಕಾರ ಉನ್ನತಾಧಿಕಾರಿಗಳ ಸಭೆಯನ್ನು ಶುಕ್ರವಾರ ನಡೆಸಿದೆ. ಶುಕ್ರವಾರ ಬೆಳಗ್ಗೆ ಮೊದಲ ಸುತ್ತಿನ ಮಾತುಕತೆಗಳು ನಡೆದಿದ್ದು, ಸಂಜೆ ಮತ್ತೆ ಸಭೆ ಮುಂದುವರಿಯಲಿದೆ. ಸಭೆಯಲ್ಲಿ ಚರ್ಚಿಸಿದ ನಂತರ ಟಾಡಾ ಆರೋಪಿಗಳ ಮೊಕ್ಕದ್ದಮೆಗೆ ಸಂಬಂಧಿಸಿದಂತೆ ರಾಜ್ಯದ ನಿಲುವಿನ ದಾಖಲೆ ಸಿದ್ಧಪಡಿಸಲಾಗುವುದು ಎಂದು ರಾಜ್ಯ ಕಾನೂನು ಹಾಗೂ ಸಂಸದೀಯ ವ್ಯವಹಾರಗಳ ಸಚಿವ ಡಿ.ಬಿ. ಚಂದ್ರೇಗೌಡ ತಿಳಿಸಿದ್ದಾರೆ.

ವೀರಪ್ಪನ್‌ ಬಂಧನಕ್ಕೆ ರಾಜ್ಯ ಸರಕಾರ ಕಳೆದ 10 ವರ್ಷಗಳಿಂದ ಮಾಡಿರುವ ಪ್ರಯತ್ನಗಳು, ಕೈಗೊಂಡ ಕ್ರಮಗಳು ಹಾಗೂ ರಾಜ್‌ಬಿಡುಗಡೆಗೆ ಕೈಗೊಳ್ಳ ಬಹುದಾದ ಪರ್ಯಾಯ ಕಾರ್ಯತಂತ್ರಗಳೇನಾದರೂ ಇದ್ದಲ್ಲಿ ಬಹಿರಂಗವಾಗಿ ತಿಳಿಸಲಾಗದಿದ್ದಲ್ಲಿ ಮೊಹರು ಮಾಡಿದ ಲಕೋಟೆಯಲ್ಲಿ ಸೋಮವಾರದೊಳಗೆ ಸಲ್ಲಿಸುವಂತೆ ಸರ್ವೋನ್ನತ ನ್ಯಾಯಾಲಯ ಆದೇಶಿಸಿರುವ ಹಿನ್ನೆಲೆಯಲ್ಲಿ ಉನ್ನತಾಧಿಕಾರಿಗಳ ಸಭೆ ನಡೆಸಲಾಗಿದೆ ಎಂದು ಸಚಿವರು ಹೇಳಿದ್ದಾರೆ.

ನಾಗಪ್ಪ ಪೊಲೀಸ್‌ ವಶದಲ್ಲಿಲ್ಲ : ವೀರಪ್ಪನ್‌ ವಶದಿಂದ ತಪ್ಪಿಸಿಕೊಂಡು ಬಂದ ನಾಗಪ್ಪ ಮಾರಡಗಿ ಅವರನ್ನು ಅಕ್ಟೋಬರ್‌ 16ರಂದು ನ್ಯಾಯಾಲಯದ ಮುಂದೆ ಹಾಜರು ಪಡಿಸುವಂತೆ ಹಂಗಾಮಿ ಮುಖ್ಯ ನ್ಯಾಯಮೂರ್ತಿ ಅಶೋಕ್‌ ಭಾನ್‌ ಅವರನ್ನು ಒಳಗೊಂಡ ವಿಭಾಗೀಯ ಪೀಠ ಆದೇಶಿಸಿದ್ದ ಹಿನ್ನೆಲೆಯಲ್ಲಿ ರಾಜ್ಯ ಪೊಲೀಸ್‌ ಮಹಾ ನಿರ್ದೇಶಕರಾದ ಸಿ. ದಿನಕರ್‌ ಅವರು ಪ್ರಮಾಣ ಪತ್ರ ಸಲ್ಲಿಸಿದ್ದು, ನಾಗಪ್ಪ ಅವರು ಪೊಲೀಸ್‌ ವಶದಲ್ಲಿಲ್ಲ ಎಂದು ತಿಳಿಸಿದ್ದಾರೆ.