ಬ್ರೀಚ್‌ ಕ್ಯಾಂಡಿ ಆಸ್ಪತ್ರೆಗೆ ಹುಸಿ ಬಾಂಬ್‌ ಬೆದರಿಕೆ, ವ್ಯಾಪಕ ಶೋಧ

ಮುಂಬೈ: ಪ್ರಧಾನಿ ವಾಜಪೇಯಿ ಅವರು ಶಸ್ತ್ರಚಿಕಿತ್ಸೆಯ ನಂತರ ವಿಶ್ರಾಂತಿ ಪಡೆಯುತ್ತಿರವ ಇಲ್ಲಿ ನ ಬ್ರೀಚ್‌ ಕ್ಯಾಂಡಿ ಆಸ್ಪತ್ರೆಗೆ ಬಾಂಬ್‌ ಬೆದರಿಕೆ ಹಿನ್ನಲೆಯಲ್ಲಿ ಪೊಲೀಸರು ವ್ಯಾಪಕ ಶೋಧ ನಡೆಸಿದ್ದಾರೆ.

ಬಾಂಬ್‌ ಇಟ್ಟಿರುವ ಬಗ್ಗೆ ಬುಧವಾರ ರಾತ್ರಿ ಬಂದ ಅನಾಮಧೇಯ ಫೋನ್‌ ಕರೆಯನ್ನು ಆಧರಿಸಿ ಶೋಧ ನಡೆಸಲಾಗಿದೆ ಎಂದು ಪೊಲೀಸ್‌ ಮೂಲಗಳು ತಿಳಿಸಿವೆ.

ಶೋಧ ನಡೆಸಿದ ನಂತರ ಹುಸಿ ಬೆದರಿಕೆ ಎಂಬ ತೀರ್ಮಾನಕ್ಕೆ ಪೊಲೀಸರು ಬಂದರು. ಈ ಸಂಬಂಧ ಇಸ್ಲಾಮಿ ಖಾಸಿಂ ಷೇಖ್‌ ಎಂಬುವವನನ್ನು ಪೊಲೀಸರು ಬಂಧಿಸಿದ್ದಾರೆ. ಆಸ್ಪತ್ರೆಯ ಸುತ್ತಾ ಬಿಗಿ ಬಂದೋಬಸ್ತ್‌ ಮಾಡಲಾಗಿದೆ.

ಭೇಟಿಗೆ ಅವಕಾಶ: ವಿಶ್ರಾಂತಿ ಪಡೆಯುತ್ತಿರುವ ಪ್ರಧಾನಿ ವಾಜಪೇಯಿ ಅವರು ಶನಿವಾರದಿಂದ ತಮ್ಮನ್ನು ಭೇಟಿ ಮಾಡಲು ತಮ್ಮ ಸಹೋದ್ಯೋಗಿಗಳಿಗೆ ಅವಕಾಶ ನೀಡಬಹುದೆಂದು ತಿಳಿದುಬಂದಿದೆ. ಪ್ರಧಾನಿಯವರು ಈಗ ಮಾಮೂಲಿನಂತೆ ನಿಯಮಿತವಾಗಿ ಆಹಾರ ಸೇವಿಸುತ್ತಿದ್ದು, ಅವರ ಆರೋಗ್ಯ ಸ್ಥಿರವಾಗಿದೆ ಎಂದು ವೈದ್ಯರು ತಿಳಿಸಿದ್ದಾರೆ.

ಈವರೆಗೆ ವಾಜಪೇಯಿ ಅವರು ಸುಷ್ಮಾ ಸ್ವರಾಜ್‌ ಅವರ ಏಕೈಕ ಟೆಲಿಫೋನ್‌ ಕರೆಯನ್ನು ಆಲಿಸಿದ್ದಾರೆ. ಭೇಟಿಗಾಗಿ ಯಾರಿಗೂ ಅವಕಾಶ ನೀಡಿಲ್ಲ. ಶನಿವಾರ ಅಥವಾ ಭಾನುವಾರ ಒಂದಿಬ್ಬರಿಗೆ ಭೇಟಿ ಅವಕಾಶ ದೊರಕಬಹುದೆಂದು ಕೇಂದ್ರದ ಸಂಸದೀಯ ಸಚಿವ ಪ್ರಮೋದ್‌ ಮಹಾಜನ್‌ ತಿಳಿಸಿದ್ದಾರೆ.