ಶಂಕರ- ದಸರಾ ಕಂಠೀರವ, ಭೀಮಾ- ದಸರಾ ಕೇಸರಿ

ಮೈಸೂರು : ಬೆಸ್ತರ ಕಾಳಣ್ಣನವರ ಗರಡಿಯ ಶಂಕರ ಚಕ್ರವರ್ತಿ ದಸರಾ ಕಂಠೀರವ. 12 ಸಾವಿರ ರುಪಾಯಿ ಬಹುಮಾನ ಹಾಗೂ ಒಂದು ಬೆಳ್ಳಿ ಗದೆ ಅವರ ಪಾಲಾಗಿದೆ.

ಮಂಗಳವಾರ ರಾಜ್ಯ ಮಟ್ಟದ 21ನೇ ದಸರಾ ಕುಸ್ತಿ ಸ್ಪರ್ಧೆಗಳ ಕೊನೆ ದಿನ. ಸಾಹುಕಾರ ಚನ್ನಯ್ಯ ಕುಸ್ತಿ ಅಖಾಡದಲ್ಲಿ ನಡೆದ 85 ಕೆ.ಜಿ.ವರೆಗಿನ ವಿಭಾಗದ ಮಲ್ಲಯುದ್ಧದಲ್ಲಿ ಬೆಳಗಾವಿಯ ಇಂಗಳಗಿಯ ಕಾಸಿಂ ಮುಲ್ತಾನಿ ಅವರನ್ನು 15 ನೇ ನಿಮಿಷದಲ್ಲಿ ಕೆಳಗುರುಳಿಸಿದ ಶಂಕರ್‌, ಪ್ರತಿಷ್ಠಿತ ದಸರಾ ಕಂಠೀರವ ಪ್ರಶಸ್ತಿ ಗೆದ್ದರು.

ಎಪ್ಪತ್ತಾರು ಕೆ.ಜಿ. ವಿಭಾಗದಲ್ಲಿ ಹಳಿಯಾಳದ 20 ವರ್ಷ ವಯಸ್ಸಿನ ಮಾರುತಿ ದಳವಿ, ತುಕಾರಾಮ ದಾನಣ್ಣವರ್‌ ಅವರನ್ನು ಚಿತ್‌ ಮಾಡಿ ದಸರಾ ಕಿಶೋರ್‌ ಪ್ರಶಸ್ತಿ ಗೆದ್ದರು. ಬೆಳಗಾವಿ ಬಾಂದರಗಲ್ಲಿ ಗರಡಿಯ ಭೀಮಾ ಕಕ್ಕೇರಿ, ಮಹದೇವ ಗಾವಡೆ ಅವರನ್ನು ಸೋಲಿಸಿ, ದಸರಾ ಕೇಸರಿ ಪ್ರಶಸ್ತಿ ಗಳಿಸಿದರು.

(ಮೈಸೂರು ಪ್ರತಿನಿಧಿಯಿಂದ)