ಗೋಪಾಲ್‌ ಇನ್ನೂ ವೀರಪ್ಪನ್‌ ಸಂಪರ್ಕ ಸಾಧಿಸಿಲ್ಲ: ಕರುಣಾನಿಧಿ

ಚೆನ್ನೈ : ನಾಲ್ಕನೇ ಬಾರಿಗೆ ಸಂಧಾನಕ್ಕಾಗಿ ಕಳೆದ ಬುಧವಾರ ಕಾಡಿಗೆ ತೆರಳಿದ ನಕ್ಕೀರನ್‌ ಗೋಪಾಲ್‌ ಅವರು ವೀರಪ್ಪನ್‌ನೊಂದಿಗೆ ಸಂಪರ್ಕ ಸಾಧಿಸಲು ವಿಫಲರಾಗಿದ್ದಾರೆ. ಕಳೆದ ಗುರುವಾರವೇ ಸತ್ಯಮಂಗಲ ಅರಣ್ಯ ಪ್ರವೇಶಿಸಿದ ಗೋಪಾಲ್‌ ತಾಳಮಲೈ ಅರಣ್ಯ ಪ್ರದೇಶದಲ್ಲಿ ವೀರಪ್ಪನ್‌ ಚಾರರು ತರಬಹುದಾದ ಸಂದೇಶಕ್ಕಾಗಿ ಕಾಯುತ್ತಿದ್ದಾರೆ.

ಈ ವಿಷಯವನ್ನು ಸೋಮವಾರ ಮಾಧ್ಯಮ ಪ್ರತಿನಿಧಿಗಳಿಗೆ ತಿಳಿಸಿದ ತಮಿಳುನಾಡು ಮುಖ್ಯಮಂತ್ರಿ ಕರುಣಾನಿಧಿ ಅವರು ಇಂದು ಅಥವಾ ನಾಳೆ ಗೋಪಾಲ್‌ ಅಡಗುದಾಣದತ್ತ ಪ್ರಯಾಣ ಬೆಳೆಸುವರು ಎಂಬ ವಿಶ್ವಾಸ ವ್ಯಕ್ತಪಡಿಸಿದ್ದಾರೆ. ಗೋಪಾಲ್‌ ಅವರು, ಅರಣ್ಯದಿಂದ ಹಿಂದಿರುಗಿದ ನಂತರ ಮುಂದಿನ ಕ್ರಮಗಳ ಬಗ್ಗೆ ಚಿಂತಿಸಲಾಗುವುದು ಎಂದೂ ಅವರು ಸುದ್ದಿಗಾರರಿಗೆ ತಿಳಿಸಿದರು.

ಕೆಲವು ಪತ್ರಿಕೆಗಳಲ್ಲಿ ಗೋಪಾಲ್‌ ಹಾಗೂ ವೀರಪ್ಪನ್‌ ಈಗಾಗಲೇ ಮಾತುಕತೆ ನಡೆಸುತ್ತಿದ್ದಾರೆ ಎಂದು ವರದಿಯಾಗಿದೆ. ಇದು ಶುದ್ಧ ಸುಳ್ಳು, ಭಾರಿ ಮಳೆಯ ಕಾರಣ ಗೋಪಾಲ್‌ ಇನ್ನೂ ವೀರಪ್ಪನ್‌ ಸಂಪರ್ಕ ಸಾಧಿಸಲೇ ಆಗಿಲ್ಲ ಎಂದು ಸ್ಪಷ್ಟಪಡಿಸಿದರು.

ರಾಜ್‌ಕುಮಾರ್‌ ಹಾಗೂ ಮತ್ತಿತರ ಮೂವರ ಅಪಹರಣವಾಗಿ 57 ದಿನಗಳು ಕಳೆದಿವೆ. ಆದರೂ, ಎರಡೂ ಸರಕಾರಗಳಿಗೆ ಏನೂ ಮಾಡಲಾಗಿಲ್ಲ. ರಾಜ್‌ ಬಿಡುಗಡೆ ವಿಳಂಬ ಸರ್ಕಾರದ ವೈಫಲ್ಯವಲ್ಲವೇ ಎಂದು ಪತ್ರಕರ್ತರು ಪ್ರಶ್ನಿಸಿದಾಗ, ಭಾರಿ ಮಳೆಯಿಂದಾಗಿ ಈ ಬಾರಿಯ ಸಂಧಾನ ಕಾರ್ಯಾಚರಣೆ ವಿಳಂಬವಾಗಿದೆ ಎಂದಷ್ಟೇ ಕರುಣಾನಿಧಿ ಹೇಳಿದರು. (ಯು.ಎನ್‌.ಐ)