ಬೃಹತ್‌ ಖೋಟಾ ನೋಟು ಜಾಲ ಪತ್ತೆ, 9 ಜನರ ಬಂಧನ

ಬೆಂಗಳೂರು : ನಗರ ಪೊಲೀಸರು ಬೃಹತ್‌ ಖೋಟಾ ನೋಟು ಜಾಲವನ್ನು ಬಯಲಿಗೆಳೆದಿದ್ದು, ಓರ್ವ ಮಹಿಳೆ ಸೇರಿದಂತೆ 9 ಮಂದಿಯನ್ನು ಬಂಧಿಸಿದ್ದಾರೆ.

ಬಂದಿತರೆಲ್ಲಾ ಕೇರಳದವರಾಗಿದ್ದು, ಭಾರತ ಮತ್ತು ಯುನೈಟೆಡ್‌ ಅರೇಬಿಕ್‌ ಎಮಿರೇಟ್ಸ್‌ನ ಖೋಟಾ ನೋಟುಗಳನ್ನು ಮುದ್ರಿಸುತ್ತಿದ್ದರು. ಮುದ್ರಣಕ್ಕಾಗಿ ಬಳಸುತ್ತಿದ್ದ ಕಂಪ್ಯೂಟರ್‌ ಹಾಗೂ ಪ್ರಿಂಟರ್‌ಗಳು, ಚಲಾವಣೆ ಮಾಡಿರದ 20 ಲಕ್ಷದ 52 ಸಾವಿರ ರುಪಾಯಿ ಮೌಲ್ಯದ ಖೋಟಾನೋಟುಗಳು, ಬಂದಿತರ ವಾಹನಗಳು ಹಾಗೂ ಸೆಲ್‌ಫೋನುಗಳನ್ನು ವಶಪಡಿಸಿಕೊಳ್ಳಲಾಗಿದೆ ಎಂದು ನಗರ ಪೊಲೀಸ್‌ ಆಯುಕ್ತ ಟಿ.ಮಡಿಯಾಳ್‌ ಸೋಮವಾರ ತಿಳಿಸಿದ್ದಾರೆ.

ಪ್ರಸಾದ್‌ ಬಾಬು ಹಾಗೂ ಡೆಸ್ಕ್‌ ಟಾಪ್‌ನಲ್ಲಿ ಡಿಪ್ಲೊಮ ಪದವಿ ಪಡೆದಿರುವ ಬಿನಯ್‌ ಜೋಸೆಫ್‌ ಈ ಜಾಲದ ಪ್ರಮುಖ ಆರೋಪಿಗಳು. ಈ ಹಿಂದೆ ಕೇರಳದ ಕಾಸರಗೋಡಿನಲ್ಲಿ ಖೋಟಾನೋಟು ಮುದ್ರಿಸುತ್ತಿದ್ದ ಪ್ರಸಾದ್‌ ಬಾಬು ಬಂಧನಕ್ಕೊಳಗಾಗಿದ್ದು, ಜಾಮೀನು ಪಡೆದಿದ್ದ ಎಂದು ಮಡಿಯಾಳ್‌ ಹೇಳಿದ್ದಾರೆ.

ಪತ್ರಿಕಾಗೋಷ್ಠಿಯಲ್ಲಿ ಆರೋಪಿ ಬಿನಯ್‌, ಖೋಟಾ ನೋಟುಗಳನ್ನು ಹೇಗೆ ಮುದ್ರಿಸುತ್ತಿದ್ದರು ಎಂಬುದನ್ನು ಪ್ರದರ್ಶಿಸಿದನು. ಒಂದು ಪಿ.ಸಿ., ಒಂದು ಸ್ಕಿೃೕನ್‌ ಪ್ರಿಂಟಿಂಗ್‌ ಯಂತ್ರ, ನೋಟುಗಳನ್ನು ಮುದ್ರಿಸುವ ಹಾಗೂ ಕತ್ತರಿಸುವ ಯಂತ್ರ, ಒಂದು ಅಂಬಾಸೆಡರ್‌ ಕಾರು ಹಾಗೂ ಎರಡು ಮೋಟಾರು ಸೈಕಲ್ಲುಗಳನ್ನು ಪೊಲೀಸರು ವಶಪಡಿಸಿಕೊಂಡಿದ್ದಾರೆ.

50, 100 ಹಾಗೂ 500 ರು. ನೋಟುಗಳ ಸುಮಾರು 50 ಲಕ್ಷ ರುಪಾಯಿಯನ್ನು ಬೆಂಗಳೂರು, ಮುಂಬೈ ಹಾಗೂ ಕೇರಳದ ಕೆಲವು ಪ್ರದೇಶಗಳಲ್ಲಿ ಚಲಾವಣೆ ಮಾಡಿರುವುದಾಗಿ ತಿಳಿದುಬಂದಿದೆ ಎಂದು ಪೊಲೀಸರು ಹೇಳಿದ್ದಾರೆ. ವಶಪಡಿಸಿಕೊಂಡಿರುವ 500 ಹಾಗೂ 50 ರುಪಾಯಿ ನೋಟುಗಳನ್ನು ಗೋಷ್ಠಿಯಲ್ಲಿ ಪ್ರದರ್ಶಿಸಿ-ದರು.

ಕಳೆದ ಒಂದೂವರೆ ತಿಂಗಳಲ್ಲಿ ಬೆಂಗಳೂರು ಪೊಲೀಸರು ಪತ್ತೆ ಹಚ್ಚುತ್ತಿರುವ 3ನೇ ಖೋಟಾ ಜಾಲ ಇದಾಗಿದ್ದು, ಈ ಮೊದಲು ನಕಲಿ ಒಂದಂಕಿ ಲಾಟರಿ ಹಾಗೂ ನಕಲಿ ಛಾಪಾ ಕಾಗದ ಜಾಲ ಪತ್ತೆ ಮಾಡಿರುವುದನ್ನು ಸ್ಮರಿಸಬಹುದು.

(ಯುಎನ್‌ಐ)