ಸತ್ಯಮಂಗಲ ಕಾಡಿನಲ್ಲಿ ಭಾರಿ ಮಳೆ : ಗೋಪಾಲ್‌ ಅಭಿಯಾನಕ್ಕೆ ಅಡ್ಡಿ

ಚೆನ್ನೈ : ರಾಜ್‌ಕುಮಾರ್‌ ಹಾಗೂ ಇತರ ಮೂವರು ಒತ್ತೆಯಾಳುಗಳನ್ನು ತನ್ನ ವಶದಲ್ಲಿಟ್ಟುಕೊಂಡಿರುವ ವೀರಪ್ಪನ್‌ ಬಳಿಗೆ ಸಂಧಾನಕ್ಕಾಗಿ ಬುಧವಾರ ರಾತ್ರಿ ಚೆನ್ನೈನಿಂದ ಹೊರಟ ನಕ್ಕೀರನ್‌ ಗೋಪಾಲ್‌ ಅಭಿಯಾನಕ್ಕೆ ಕಾನನ ಪ್ರದೇಶದಲ್ಲಿ ಸುರಿಯುತ್ತಿರುವ ಭಾರಿ ಮಳೆ ಅಡ್ಡಿಯನ್ನುಂಟು ಮಾಡಿದೆ.

ಸುಪ್ರೀಂ ಕೋರ್ಟ್‌ ನೀಡಿರುವ ತಡೆಯಾಜ್ಞೆಯಿಂದ ಟಾಡಾ ಬಂದಿಗಳ ಬಿಡುಗಡೆಯಲ್ಲಿ ಆಗುತ್ತಿರುವ ವಿಳಂಬದ ಬಗ್ಗೆ ವಿವರಿಸಿ, ವೀರಪ್ಪನ್‌ ಮನವೊಲಿಸಿ ರಾಜ್‌ಕುಮಾರ್‌ ಅವರನ್ನು ಕರೆದು ತರಲು ಗೋಪಾಲ್‌ ಕಾಡಿಗೆ ಹೋಗಿದ್ದಾರೆ. ಸತ್ಯಮಂಗಲ ಕಾನನ ಪ್ರದೇಶವನ್ನು ಈಗಾಗಲೇ ತಲುಪಿರುವ ಗೋಪಾಲ್‌ ವೀರಪ್ಪನ್‌ ಚಾರರು ತರುವ ಸಂದೇಶದ ನಿರೀಕ್ಷೆಯಲ್ಲಿ ಇದ್ದಾರೆ.

ಗುರುವಾರ ಮಧ್ಯಾಹ್ನದಿಂದಲೇ ಕಾಡಿನಲ್ಲಿ ಭಾರಿ ಮಳೆಯಾಗುತ್ತಿರುವ ಕಾರಣ ಹಾಗೂ ಇನ್ನೂ ಗೋಪಾಲ್‌ ಅವರಿಗೆ ಅಡಗುತಾಣದತ್ತ ಬರಲು ಸಮ್ಮತಿ ದೊರಕದ ಕಾರಣ ಅರಣ್ಯ ಪ್ರದೇಶದಲ್ಲಿ ಕಾಯುತ್ತಿದ್ದಾರೆ ಎಂದು ನಕ್ಕೀರನ್‌ ಪತ್ರಿಕೆಯ ಸಹ ಸಂಪಾದಕ ಕಾಮರಾಜ್‌ ತಿಳಿಸಿದ್ದಾರೆ. ಶುಕ್ರವಾರ ರಾತ್ರಿ ಗೋಪಾಲ್‌ ಅವರು ಬಹುತೇಕ ಅಡಗು ತಾಣದತ್ತ ತೆರಳುತ್ತಾರೆಂದು ಅವರು ಹೇಳಿದ್ದಾರೆ.