ಮುಂದುವರಿದ ಮಳೆಯ ಆರ್ಭಟ

ಬೆಂಗಳೂರು : ಹವಾಮಾನ ಇಲಾಖೆ ಊಹಿಸಿದ್ದಂತೆ ಕಳೆದ ಎರಡು ದಿನಗಳಿಂದ ಬೆಂಗಳೂರಿನ ಹವಾಮಾನದಲ್ಲಿ ಭಾರಿ ಬದಲಾವಣೆ ಉಂಟಾಗಿದೆ. ಶನಿವಾರ ರಾತ್ರಿ ನಾಲ್ಕು ಗಂಟೆಗಳ ಕಾಲ ಧಾರಾಕಾರವಾಗಿ ಮಳೆ ಬಿದ್ದಿದೆ. ಶನಿವಾರ ನಗರದಲ್ಲಿ 7 ಸೆಂಟಿ ಮೀಟರ್‌ ಮಳೆ ಬಿದ್ದಿತ್ತು. ಭಾನುವಾರ ರಾತ್ರಿ ಸಹ ಮಳೆ ಆಯಿತು. ಬೆಂಗಳೂರು ವಿಮಾನ ನಿಲ್ದಾಣದಲ್ಲಿ 2 ಸೆಂಟಿ ಮೀಟರ್‌ ಮಳೆ ದಾಖಲಾಗಿದೆ.

ರಾಜ್ಯದ ಇತರೆಡೆಗಳಲ್ಲೂ ಕಳೆದೆರಡು ದಿನಗಳಲ್ಲಿ ಮಳೆ ಬಿದ್ದಿದೆ. ಹುಬ್ಬಳ್ಳಿಯಲ್ಲಿ ನಾಲ್ಕು ಗಂಟೆಗಳ ಕಾಲ ಸತತವಾಗಿ ಸುರಿದ ಮಳೆಗೆ 40 ಅಡಿ ಉದ್ದದ ಕಾಂಪೌಂಡ್‌ ನೆಲಕಚ್ಚಿದೆ. ನಾಗಶೆಟ್ಟಿ ಕೊಪ್ಪ, ಇಂದಿರಾ ಕಾಲೋನಿಯ ಮನೆಗಳಿಗೆಲ್ಲಾ ನೀರು ನುಗ್ಗಿದೆ. ನಾಲೆಯ ಪಕ್ಕದ ಮನೆಗಳು ಕುಸಿಯುವ ಹಂತದಲ್ಲಿವೆ. ಕೆಲವು ಗೋಡೆಗಳ ಬಿರುಕು ಬಿಟ್ಟಿವೆ.

ರಾಜ್ಯದಲ್ಲಿ ಉತ್ತರ ಒಳನಾಡಿನಲ್ಲಿ ಮುಂಗಾರು ತೀವ್ರಗೊಂಡಿದೆ. ಕರಾವಳಿ ಕರ್ನಾಟಕದಲ್ಲಿ ದುರ್ಬಲವಾಗಿದೆ. ದಕ್ಷಿಣ ಒಳನಾಡಿನ ಅಲ್ಲಲ್ಲಿ ಚದುರಿದಂತೆ ಮಳೆ ಬಿದ್ದಿದೆ. ನವಲಗುಂದದಲ್ಲಿ ಅತಿ ಹೆಚ್ಚು ಎಂದರೆ 10 ಸೆಂಟಿ ಮೀಟರ್‌, ಕಲದಗಿಯಲ್ಲಿ 8, ಸವದತ್ತಿ, ಲಕ್ಷ್ಮೇಶ್ವರ, ಗುಲ್ಬರ್ಗಾಗಳಲ್ಲಿ ತಲಾ 7 ಸೆಂಟಿ ಮೀಟರ್‌, ಯಲ್ಲಾಪುರ, ಲೋಂಡಾ, ಕೂಡ್ಲಿಗಿಯಲ್ಲಿ ತಲಾ 5, ಚಿತ್ತಾಪುರ, ಯಾದಗಿರಿ, ಗುಳೇದಗುಡ್ಡ, ನರಗುಂದ, ಬಾಗಲಕೋಟೆಯಲ್ಲಿ 4, ಮಹಾಲಿಂಗಪುರ, ಮುಧೋಳ, ಇಳಕಲ್‌, ಲೋಕಾಪುರ, ಜಮಖಂಡಿ, ಖಾನಾಪುರ, ಇಂಡಿ, ಚಿಂತಾಮಣಿ, ದೇವನಹಳ್ಳಿಗಳಲ್ಲಿ ತಲಾ 3, ಬ್ಯಾಡಗಿ, ಕೊಪ್ಪಳ, ಬೆಂಗಳೂರು ವಿಮಾನ ನಿಲ್ದಾಣಗಳಲ್ಲಿ ತಲಾ 2 ಸೆಂಟಿ ಮೀಟರ್‌ ಮಳೆ ಆಗಿದೆ.

ಬುಧವಾರ ಬೆಳಗಿನವರೆಗಿನ ಮುನ್ಸೂಚನೆಯಂತೆ ಒಳನಾಡಿನ ಅನೇಕ ಕಡೆಗಳಲ್ಲಿ ಹಾಗೂ ಕರಾವಳಿಯ ಕೆಲವು ಕಡೆ ತುಂತುರು ಮಳೆ ಬೀಳುವ ಸಂಭವ ಇದೆ. ರಾಜ್ಯದ ಹವಾಮಾನದಲ್ಲಿ ಹೆಚ್ಚಿನ ಬದಲಾವಣೆ ಏನೂ ಕಂಡು ಬರುವುದಿಲ್ಲ ಎನ್ನುತ್ತದೆ ಹವಾಮಾನ ಇಲಾಖೆ.

ಸ್ಥಳೀಯ ಮುನ್ಸೂಚನೆಯಂತೆ ಬೆಂಗಳೂರು ಹಾಗೂ ಸುತ್ತಮುತ್ತಲ ಪ್ರದೇಶಗಳಲ್ಲಿ ಭಾಗಶಃ ಮೋಡ ಕವಿದ ವಾತಾವರಣ ಇದ್ದು, ಸಂಜೆ ಅಥವಾ ರಾತ್ರಿ ಮಳೆ ಅಥವಾ ಗುಡುಗಿನಿಂದ ಕೂಡಿದ ಸುರಿಮಳೆ ಬೀಳುವ ಸಾಧ್ಯತೆ ಇದೆ.