ಉನ್ನತಾಧಿಕಾರಿಗಳೊಂದಿಗೆ ಖರ್ಗೆ ದಿಢೀರ್‌ ಚೆನ್ನೈಗೆ

ಚೆನ್ನೈ : ರಾಜ್‌ಕುಮಾರ್‌ ಅಪಹರಣವಾಗಿ 50 ದಿನ ಕಳೆದಿದೆ. ನ್ಯಾಯಾಲಯದ ತಡೆ, ವೀರಪ್ಪನ್‌ ಬಿಗಿಪಟ್ಟಿನಿಂದ ರಾಜ್‌ ಬಿಡುಗಡೆಯ ಬಿಕ್ಕಟ್ಟು ಮತ್ತಷ್ಟು ಬಿಗಡಾಯಿಸಿದೆ. ಈ ಮಧ್ಯೆ ರಾಜ್ಯದ ಗೃಹ ಸಚಿವ ಮಲ್ಲಿಕಾರ್ಜುನ ಖರ್ಗೆ, ರಾಜ್ಯ ಗೃಹ ಕಾರ್ಯದರ್ಶಿ ಪ್ರಸಾದ್‌ ಮತ್ತು ಪೊಲೀಸ್‌ ವರಿಷ್ಠಾಧಿಕಾರಿ ಕೆ.ಆರ್‌. ಶ್ರೀನಿವಾಸ್‌ ಸೋಮವಾರ ಚೆನ್ನೈಗೆ ಹೋಗಿದ್ದಾರೆ.

ರಾಜ್‌ ಬಿಡುಗಡೆ ಸಂಬಂಧ ತಮಿಳುನಾಡಿನ ಮುಖ್ಯಮಂತ್ರಿ ಎಂ. ಕರುಣಾನಿಧಿ ಅವರೊಂದಿಗೆ ಖರ್ಗೆ ಮಾತುಕತೆ ನಡೆಸಲಿದ್ದಾರೆ. ಟಾಡಾ ಬಂದಿಗಳ ಬಿಡುಗಡೆಗೆ ಸರ್ವೋನ್ನತ ನ್ಯಾಯಾಲಯ ನೀಡಿರುವ ತಡೆಯಾಜ್ಞೆಯನ್ನು ತೆರವು ಗೊಳಿಸುವಂತೆ ರಾಜ್ಯ ಸರಕಾರ ಸಲ್ಲಿಸಿರುವ ಪ್ರತಿ ಪ್ರಮಾಣಪತ್ರದ ಮೇಲಿನ ವಿಚಾರಣೆ ನಾಳೆ ನಡೆಯಲಿದೆ. ಈ ಹಿನ್ನೆಲೆಯಲ್ಲಿ ಖರ್ಗೆ ಅವರ ಚೆನ್ನೈ ಭೇಟಿಗೆ ಮಹತ್ವ ಬಂದಿದೆ.

ಈ ದಿಢೀರ್‌ ಚೆನ್ನೈ ಭೇಟಿಗೆ ಕಾರಣವೇನು ಎಂಬುದಕ್ಕೆ ಖರ್ಗೆ ಸರಿಯಾದ ಉತ್ತರ ನೀಡಿಲ್ಲ. ಕರುಣಾನಿಧಿ ಅವರ ಭೇಟಿಯ ನಂತರ ಈ ಬಗ್ಗೆ ಮಾತನಾಡುವುದಾಗಿ ತಿಳಿಸಿದ್ದಾರೆ. ಮಂಗಳವಾರ ಸರ್ವೋನ್ನತ ನ್ಯಾಯಾಲಯದ ತೀರ್ಪು ಹೊರ ಬಿದ್ದ ನಂತರ ಎರಡೂ ರಾಜ್ಯಗಳ ಸಂಧಾನಕಾರ ಆರ್‌.ಆರ್‌. ಗೋಪಾಲ್‌ ಮತ್ತೆ ಕಾಡಿಗೆ ಹೋಗುವ ಸಾಧ್ಯತೆ ಇದ್ದು, ಈ ಬಗ್ಗೆ ಮಾತುಕತೆ ನಡೆಸಲು ಖರ್ಗೆ ಅವರು ಚೆನ್ನೈಗೆ ಬಂದಿದ್ದಾರೆ ಎಂದು ಶಂಕಿಸಲಾಗಿದೆ.

50 ದಿನದಲ್ಲಿ ಆದದ್ದೇನು ? : ರಾಜ್‌ ಅಪಹಣದ 50 ದಿನಗಳಲ್ಲಿ ಏನೇನಾಯಿತು ಎಂದು ಬರೆಯಲು 50 ಪುಟವೂ ಸಾಲದು. ಚಿತ್ರೋದ್ಯಮದ ಚಟುವಟಿಕೆಗಳು ಸ್ತಬ್ಧವಾಗಿರುವ ಹಿನ್ನೆಲೆಯಲ್ಲಿ ರಾಜ್ಯದ ಬೊಕ್ಕಸಕ್ಕೆ ಕೋಟ್ಯಂತರ ರುಪಾಯಿ ನಷ್ಟ ಸಂಭವಿಸಿರುವುದಂತೂ ಸತ್ಯ. ಈ ಮಧ್ಯೆ ಮುಂದಿನ ಸೋಮವಾರದಿಂದ ಚಿತ್ರೀಕರಣವೂ ಸೇರಿದಂತೆ ಎಲ್ಲ ರೀತಿಯ ಚಿತ್ರ ಚಟುವಟಿಕೆಗಳನ್ನೂ ಪುನಾರಂಭಿಸಲು ಕರ್ನಾಟಕ ಚಲನಚಿತ್ರ ವಾಣಿಜ್ಯ ಮಂಡಲಿ ನಿರ್ಧಾರ ಕೈಗೊಂಡಿದೆ. ರಾಜ್‌ ಬಿಡುಗಡೆಗ ಒತ್ತಾಯಿಸಿ ಭಾರಿ ಪ್ರತಿಭಟನಾ ಪ್ರದರ್ಶನ ನಡೆಸಲೂ ತೀರ್ಮಾನಿಸಿದೆ.