ದಸರೆಗಾಗಿ ದುರಸ್ತಿಗೊಳ್ಳುತ್ತಿವೆ ರಸ್ತೆಗಳು

ಮೈಸೂರು : ಮೈಸೂರಿನ ರಸ್ತೆಗಳ ಯೋಗವೇ ಯೋಗ ಬಿಡಿ. ವರ್ಷಕ್ಕೊಮ್ಮೆಯಾದರೂ ಇಲ್ಲಿನ ರಸ್ತೆಯ ಹಳ್ಳಕೊಳ್ಳಗಳು ತಾತ್ಕಾಲಿಕವಾಗಿ ಮುಚ್ಚಲ್ಪಡುತ್ತವೆ. ದಸರೆಯ ಸಂದರ್ಭದಲ್ಲಿ ದೇಶ ವಿದೇಶಗಳಿಂದ ಆಗಮಿಸುವ ಪ್ರವಾಸಿಗರಿಗೆ ನಮ್ಮ ಹುಳುಕು ಕಾಣಬಾರದೆಂದು ವರ್ಷದಿಂದ ರಸ್ತೆಗಳಲ್ಲಿ ಬಿದ್ದ ಹಳ್ಳಗಳಿಗೆಲ್ಲಾ ತೇಪೆ ಹಾಕಲಾಗುತ್ತದೆ. ಪುಟ್‌ಪಾತ್‌ಗಳ ದುರಸ್ತಿ ಕಾರ್ಯ ನಡೆಯುತ್ತದೆ. ಮೈಸೂರು ಮದುಮಗಳಂತೆ ಅಲಂಕಾರಗೊಳ್ಳುತ್ತದೆ.

ಈ ವರ್ಷ ಆಗುತ್ತಿರುವುದೂ ಅದೇ. ಜಂಬೂ ಸವಾರಿ ಸಾಗುವ ಎಲ್ಲ ಪ್ರಮುಖ ರಸ್ತೆಗಳಲ್ಲೂ ಬಿದ್ದಿರುವ ಹಳ್ಳಗಳನ್ನು ಮುಚ್ಚಲಾಗುತ್ತಿದೆ. ಶಾಶ್ವತ ದುರಸ್ತಿ ಆಗದಿದ್ದರೂ, ನೋಡುವವರ ಮುಂದೆ ಎಡವಿ ಬೀಳದಂತೆ ತೇಪೆ ಕೆಲಸ ಸಮರೋಪಾದಿಯಲ್ಲಿ ಸಾಗಿದೆ.

ಮೈಸೂರಿನ ಚಾರಿತ್ರಿಕ ವೃತ್ತಗಳನ್ನು ಸಿಂಗರಿಸುವ ಕಾರ್ಯವೂ ನಡೆದಿದೆ. ಪುತ್ಥಳಿ - ಪ್ರತಿಮೆಗಳ ಮೇಲಿನ ಧೂಳು ಕೊಡವಲಾಗಿದೆ. ದಸರೆಯ ಹಿನ್ನೆಲೆಯಲ್ಲಿ ಅರಮನೆಯ ಎಲ್ಲ ವಿದ್ಯುತ್‌ ದೀಪಗಳ ದುರಸ್ತಿಯೂ ನಡೆಯುತ್ತಿದೆ. ಸುಣ್ಣಬಣ್ಣಗಳ ಕಾರ್ಯವೂ ಮುಗಿದಿದೆ. ಬಂಬೂಬಜಾರ್‌ನಿಂದ ಬನ್ನಿಮಂಟಪದವರೆಗಿನ ರಸ್ತೆ ಈಗ ಸಂಚಾರ ಯೋಗ್ಯವಾಗಿದೆ. ರಾಜ್‌ ಅಪಹರಣ ಹಿನ್ನೆಲೆಯಲ್ಲಿ ಪ್ರತಿವರ್ಷದ ಲವಲವಿಕೆ ಇಲ್ಲವಾದರೂ, ಸದ್ದಿಲ್ಲದೆ ಸಿದ್ಧತೆಗಳಂತೂ ನಡೆದಿವೆ.