ಸಂಚಾರದೊತ್ತಡ ಸಡಿಲಕ್ಕೆ 12 ಸುರಂಗ ಮಾರ್ಗ, 25 ಫ್ಲೈ ಓವರ್‌

ಬೆಂಗಳೂರು : ಮಾಲಿನ್ಯನಗರಿ ಬೆಂಗಳೂರನ್ನು ಮತ್ತೆ ಉದ್ಯಾನನಗರಿ ಮಾಡುವ ನಿಟ್ಟಿನಲ್ಲಿ ದಿಟ್ಟ ಹೆಜ್ಜೆ ಇಟ್ಟಿರುವ ಬೆಂಗಳೂರು ಮಹಾನಗರ ಪಾಲಿಕೆ ನಗರದ ರಸ್ತೆಗಳ ಬಗ್ಗೆಯೂ ಈಗ ಕಾಳಜಿ ವಹಿಸಿದೆ.

ರಾತ್ರಿ ಸುರಕ್ಷತೆ ಹಾಗೂ ರಸ್ತೆಗಳ ಅಧ್ಯಯನಕ್ಕಾಗಿ ಬುಧವಾರ ರಾತ್ರಿ ಮಹಾಪೌರ ರಾಮಚಂದ್ರಪ್ಪ, ಆಯುಕ್ತರಾದ ಜೈರಾಜ್‌, ಹಿರಿಯ ಪೊಲೀಸ್‌ ಅಧಿಕಾರಿ ನಾರಾಯಣಗೌಡ ಹಾಗೂ ಮತ್ತಿತ್ತರ ಅಧಿಕಾರಿಗಳು ಫ್ಲೈಓವರ್‌ ಸೇರಿದಂತೆ ನಗರದ ಹಲವು ರಸ್ತೆಗಳಲ್ಲಿ ಸಂಚರಿಸಿ ಅಧ್ಯಯನ ನಡೆಸಿದರು.

ಆನಂತರ ಪತ್ರಕರ್ತರೊಂದಿಗೆ ಮಾತನಾಡಿದ ಪಾಲಿಕೆಯ ಆಯುಕ್ತ ಜೈರಾಜ್‌ ಅವರು ಬೆಂಗಳೂರಿನ ಅಭಿವೃದ್ಧಿಗೆ 1000 ಕೋಟಿ ರುಪಾಯಿಗಳ ಕಾರ್ಯಕ್ರಮ ಹಾಕಿಕೊಳ್ಳಲಾಗಿದೆ ಎಂದರು. ನಗರದ ನಾಲ್ಕೂ ದಿಕ್ಕುಗಳ ಅಭಿವೃದ್ಧಿಗೆ ಗಮನ ಹರಿಸಲಾಗುವುದಾಗಿ ತಿಳಿಸಿದ ಅವರು ನಗರದಲ್ಲಿ 25 ಫ್ಲೈ ಓವರ್‌ಗಳನ್ನು ನಿರ್ಮಿಸಲಾಗುವುದು, ರಸ್ತೆಗಳನ್ನು ಅಭಿವೃದ್ಧಿಪಡಿಸಲಾಗುವುದು ಈ ಎಲ್ಲ ಕಾರ್ಯಕ್ರಮಗಳು 2004ರೊಳಗೆ ಪೂರ್ಣಗೊಳ್ಳಲಿವೆ ಎಂದು ಹೇಳಿದರು.

ಹೊಸ ಮಲ್ಟೀ ಸ್ಟೋರೀಡ್‌ ಪಾರ್ಕಿಂಗ್‌ ಫ್ಲೋರ್‌ಗಳನ್ನು ನಿರ್ಮಿಸಿ ವಾಹನ ನಿಲುಗಡೆಗೆ ಅನುಕೂಲ ಮಾಡಿಕೊಡಲಾಗುವುದು ಎಂದ ಅವರು ಇದಕ್ಕೆ ಹಣಕಾಸಿನ ತೊಂದರೆ ಇಲ್ಲ. ಪಾಲಿಕೆಯ ಆರ್ಥಿಕ ಪರಿಸ್ಥಿತಿ ಈ ವರ್ಷ ಉತ್ತಮಗೊಂಡಿದೆ. ಯೋಜನೆಗೆ ಹಣ ತರುವುದು ಕಷ್ಟವೇನಲ್ಲ , ವಿವಿಧ ಹಣಕಾಸು ಸಂಸ್ಥೆಗಳೇ ಹಣ ನೀಡಲು ಮುಂದೆ ಬರುತ್ತವೆ ಎಂದು ಹೇಳಿದರು.

ನಗರದಲ್ಲಿ ಹೆಚ್ಚುತ್ತಿರುವ ಸಂಚಾರದ ಒತ್ತಡವನ್ನು ನಿಭಾಯಿಸಲು 12 ಸುರಂಗ ಮಾರ್ಗಗಳನ್ನು ನಿರ್ಮಿಸಲಾಗುವುದು ಎಂದು ಮೇಯರ್‌ ರಾಮಚಂದ್ರಪ್ಪ ಹೇಳಿದರು. ಈ ಯೋಜನೆಗೆ ಸುಮಾರು 120 ಕೋಟಿ ರುಪಾಯಿಗಳ ವೆಚ್ಚ ತಗುಲಲಿದ್ದು, ಹುಡ್ಕೋದಿಂದ ಆರ್ಥಿಕ ನೆರವು ಪಡೆಯಲಾಗುವುದು ಎಂದರು. ನಗರದ ವಿವಿಧ ರಸ್ತೆಗಳಲ್ಲಿ ಸಂಚರಿಸಿ ಸಮಸ್ಯೆಗಳ ಪರಿಹಾರಕ್ಕೆ ಆಧಿಕಾರಿಗಳಿಗೆ ಆದೇಶಿದರು.