ರ್ಯಾಗಿಂಗ್‌ ಪಿಡುಗಿನ ನಿಯಂತ್ರಣಕ್ಕೆ ಸಚಿವ ಪರಮೇಶ್ವರ್‌ ಅಂಕುಶ

ಬೆಂಗಳೂರು : ರ್ಯಾಗಿಂಗ್‌ ಪಿಡುಗು ರಾಜ್ಯದ ವೃತ್ತಿಪರ ಕಾಲೇಜುಗಳಲ್ಲಿ ದಿನದಿಂದ ದಿನಕ್ಕೆ ಹೆಚ್ಚುತ್ತಿದೆ. ಈಗ ರಾಜ್ಯದ ಉನ್ನತ ಶಿಕ್ಷಣ ಸಚಿವರು ರ್ಯಾಗಿಂಗ್‌ ತಡೆಗೆ ವಿಶೇಷ ಹಾಗೂ ಕಠೋರ ಕ್ರಮಗಳ ಸುತ್ತೋಲೆ ಹೊರಡಿಸಿದ್ದಾರೆ.

ಕಾಲೇಜಿನ ಪ್ರಾಂಶುಪಾಲರ ನೇತೃತ್ವದಲ್ಲಿ ಸಮಿತಿ ರಚಿಸಿ ರ್ಯಾಗಿಂಗ್‌ ತಡೆಯಲು ನಿಶ್ಚಯಿಸಿರುವ ಸರಕಾರ, ಯಾವುದೇ ವೃತ್ತಿಪರ ಕಾಲೇಜುಗಳಲ್ಲಿ ರ್ಯಾಗಿಂಗ್‌ ಪ್ರಕರಣ ವರದಿಯಾದರೆ ಅದಕ್ಕೆ ಆಯಾ ಕಾಲೇಜಿನ ಆಡಳಿತ ಮಂಡಲಿಯನ್ನೇ ಹೊಣೆ ಮಾಡಲೂ ನಿರ್ಧರಿಸಿದೆ. ರ್ಯಾಗಿಂಗ್‌ನಲ್ಲಿ ತೊಡಗುವ ವಿದ್ಯಾರ್ಥಿಗಳಿಗೆ ವಿಧಿಸುವ ದಂಡದ ಮೊತ್ತವನ್ನು ಹೆಚ್ಚಿಸುವುದೇ ಅಲ್ಲದೆ, ಜೈಲು ಶಿಕ್ಷೆಗೂ ಗುರಿಪಡಿಸುವ ಬಗ್ಗೆ ಸುತ್ತೋಲೆಯಲ್ಲಿ ತಿಳಿಸಲಾಗಿದೆ.

ರಾಜ್ಯದಲ್ಲಿ ಹೆಚ್ಚುತ್ತಿರುವ ರ್ಯಾಗಿಂಗ್‌ ಅನ್ನು ಮೂಲೋತ್ಪಾಟನೆ ಮಾಡುವ ಹಿನ್ನೆಲೆಯಲ್ಲಿ ಮಂಗಳವಾರ ವೃತ್ತಿಪರ ಕಾಲೇಜುಗಳ ಪ್ರಾಂಶುಪಾಲರ ಸಭೆ ನಡೆಸಿದ ನಂತರ ಮಾಧ್ಯಮ ಪ್ರತಿನಿಧಿಗಳೊಂದಿಗೆ ಮಾತನಾಡುತ್ತಿದ್ದ ಸಚಿವರು, ಯಾವುದೇ ಕಾಲೇಜಿನಲ್ಲಿ ರ್ಯಾಗಿಂಗ್‌ ನಡೆದ ಬಗ್ಗೆ ಖಚಿತ ಮಾಹಿತಿ ದೊರೆತರೆ, ಆ ಕಾಲೇಜಿನ ಅನುಮತಿಯನ್ನು ರದ್ದು ಪಡಿಸುವಂತಹ ಅನಿವಾರ್ಯ ಕ್ರಮಗಳಿಗೂ ಮುಂದಾಗಲಾಗುವುದು ಎಂದು ತಿಳಿಸಿದರು.

ರ್ಯಾಗಿಂಗ್‌ ನಡೆಸಿದ ವಿದ್ಯಾರ್ಥಿಯ ಅಂಕಪಟ್ಟಿಯ ಮೇಲೆ ‘ ರ್ಯಾಗಿಂಗ್‌ ನಡೆಸಿದ ವಿದ್ಯಾರ್ಥಿ’ ಎಂದು ದಪ್ಪ ಅಕ್ಷರದಲ್ಲಿ ಮುದ್ರಿಸಲಾಗುವುದೂ ಎಂದೂ ಅವರು ಹೇಳಿದರು. ಹೊಸ ಸುತ್ತೋಲೆಯಲ್ಲಿ ರ್ಯಾಗಿಂಗ್‌ ನಡೆಸಿದ ವಿದ್ಯಾರ್ಥಿಗೆ 2 ಸಾವಿರದಿಂದ 25 ಸಾವಿರ ರುಪಾಯಿ ವರೆಗೆ ದಂಡ ಹಾಕುವ ಅವಕಾಶ ಇದ್ದು, ಆತ ಜೈಲು ಶಿಕ್ಷೆಗೂ ಗುರಿಯಾಗುತ್ತಾನೆ ಎಂದು ಅವರು ಹೇಳಿದರು.

ರ್ಯಾಗಿಂಗ್‌ ನಿರ್ಮೂಲನೆ ಮಾಡಲು ಕಾಲೇಜುಗಳಲ್ಲಿ ಜಾಗೃತ ದಳ ರಚಿಸಲಾಗುವುದೂ ಎಂದೂ ಹೇಳಿದರು. ಪತ್ರಿಕಾಗೋಷ್ಠಿಯಲ್ಲಿ ರಾಜ್ಯ ಆರೋಗ್ಯ ಸಚಿವ ಡಾ. ಮಲಕಾರೆಡ್ಡಿ ಹಾಗೂ ವೈದ್ಯಕೀಯ ಶಿಕ್ಷಣ ಸಚಿವೆ ನಫೀಸಾ ಫಜಲ್‌ ಹಾಜರಿದ್ದರು.