‘ಮುತ್ತಯ್ಯ ಜತೆ ಮಾತಾಡೋವರೆಗೆ ಏನೂ ಹೇಳೆನು’

ನವದೆಹಲಿ : ‘ನನ್ನನ್ನು ಬಿಸಿಸಿಐ ಅಧ್ಯಕ್ಷರು ಮಾತಾಡಿಸೋವರೆಗೂ ಏನೂ ಹೇಳೆನು’, ಭಾರತ ಕ್ರಿಕೆಟ್‌ ತಂಡದ ಕೋಚ್‌ ಕಪಿಲ್‌ ಮಾತಿದು.

ಬಿಸಿಸಿಐ ಕಾರ್ಯವೈಖರಿಯ ಬಗ್ಗೆ ಕಪಿಲ್‌ ಅಸಮಾಧಾನ ವ್ಯಕ್ತಪಡಿಸಿದ್ದಾರೆಂದು ಕಳೆದ ವಾರ ಮಾಧ್ಯಮಗಳು ವರದಿ ಮಾಡಿರುವ ಹಿನ್ನೆಲೆಯಲ್ಲಿ ಕಪಿಲ್‌ ಪ್ರತಿಕ್ರಿಯಿಸಿದ್ದು ಹೀಗೆ. ಆಗಸ್ಟ್‌ 20ನೇ ತಾರೀಖು ಬೆಂಗಳೂರಿನಲ್ಲಿ ನಡೆದ ಬಿಸಿಸಿಐ ಕಾರ್ಯಕಾರಿ ಸಭೆಯ ನಂತರ ಮಾತಾಡಿದ ಮುತ್ತಯ್ಯ, ವಿಷಯ ಪರಮಾವಧಿ ತಲುಪುವ ಮುನ್ನ ನಾನು ಕಪಿಲ್‌ ಜತೆ ಮಾತಾಡುತ್ತೇನೆ. ಮಂಡಳಿಯನ್ನು ದೂರುವುದರ ಮೂಲಕ ತಮ್ಮ ವೈಯಕ್ತಿಕ ಹತಾಶೆಯನ್ನು ವ್ಯಕ್ತಪಡಿಸುವುದು ಸರಿಯಲ್ಲ ಎಂದಿದ್ದರು.

ಸೆಪ್ಟೆಂಬರ್‌ 29ರಂದು ಬಿಸಿಸಿಐ ಸಾಮಾನ್ಯ ಸಭೆ ನಡೆಯಲಿದೆ. ಆದರೆ ಕಪಿಲ್‌ ಅವರನ್ನು ತರಬೇತುದಾರರಾಗಿ ಮುಂದುವರೆಸಬೇಕೋ ಬೇಡವೋ ಎಂಬುದನ್ನು ತುರ್ತಾಗಿ ನಿರ್ಧರಿಸಬೇಕಿದೆ. ಸಭೆ ನಡೆಯುವವರೆಗೆ ಕಾಯದೆ ಸದ್ಯದಲ್ಲೇ ಕಪಿಲ್‌ ಜತೆ ಮಾತಾಡುತ್ತೇನೆ ಎಂದು ಮುತ್ತಯ್ಯ ಹೇಳಿದ್ದಾರೆ.