ನಕಲಿ ಸ್ಟಾಂಪ್‌ ಪೇಪರ್‌ ಜಾಲ ಪತ್ತೆ , 10 ಜನರ ಬಂಧನ

ಬೆಂಗಳೂರು : ಸುಮಾರು 10 ಕೋಟಿ ರುಪಾಯಿ ಬೆಲೆಯ ನಕಲಿ ಸ್ಟಾಂಪ್‌ ಪೇಪರ್‌ ಜಾಲವನ್ನು ನಗರ ಪೊಲೀಸರು ಪತ್ತೆ ಹಚ್ಚಿದ್ದು, ಈ ಸಂಬಂಧ 10 ಜನರನ್ನು ಬಂಧಿಸಿದ್ದಾರೆ.

ಕರ್ನಾಟಕದಲ್ಲಿ ಹಿಂದೆಂದೂ ಪತ್ತೆಯಾಗಿರದಂಥ ಜಾಲ : ನಗರ ಪೊಲೀಸ್‌ ಆಯುಕ್ತ ಟಿ. ಮಡಿಯಾಳ್‌ ಭಾನುವಾರ ಸುದ್ದಿಗೋಷ್ಠಿಯಲ್ಲಿ ಈ ವಿಷಯ ತಿಳಿಸಿದರು. ಶನಿವಾರ ನಗರದ ವಿವಿಧೆಡೆ ದಾಳಿ ನಡೆಸಲಾಯಿತು. ಸುಬೇದಾರ್‌ ಛತ್ರಂ ರಸ್ತೆಯಲ್ಲಿರುವ ಸಾಯಿ ಸ್ಟಾಂಪ್‌ ಪೇಪರ್‌ ಮಾರಾಟ ಮಳಿಗೆಯ ಮೇಲೆ ನಡೆಸಿದ ದಾಳಿಯಿಂದ ನಕಲಿ ವಹಿವಾಟು ಪತ್ತೆಯಾಯಿತು. ನಂತರ ಅಂಗಡಿಯ ವಿವಿಧ ಶಾಖೆಗಳ ಮೇಲೂ ದಾಳಿ ನಡೆಸಲಾಗಿ ಇದೊಂದು ಬೃಹತ್‌ ನಕಲಿ ಜಾಲ ಎಂಬುದು ಪತ್ತೆಯಾಗಿದೆ. ಬಂಧಿತರು ಕೊಟ್ಟಿರುವ ಹೇಳಿಕೆಯ ಪ್ರಕಾರ, ಸ್ಟಾಂಪ್‌ ಪೇಪರ್‌ಗಳನ್ನು ಮುಂಬೈಗೂ ಸರಬರಾಜು ಮಾಡಲಾಗಿದೆ. ಇದರಿಂದ ಇದೊಂದು ಅಂತರರಾಜ್ಯ ನಕಲಿ ಜಾಲ ಎಂಬುದು ತಿಳಿದು ಬಂದಿದೆ. ಬಹುರಾಷ್ಟ್ರೀಯ ಕಂಪನಿಗಳು, ಬ್ಯಾಂಕುಗಳು ಹಾಗೂ ಸಾರ್ವಜನಿಕ ವಲಯದ ಕಂಪನಿಗಳಿಗೆ ಶ್ರೀ ಸಾಯಿ ಸ್ಟಾಂಪ್‌ ವೆಂಡರ್ಸ್‌ ಸ್ಟಾಂಪ್‌ ಪೇಪರ್‌ಗಳನ್ನು ಸರಬರಾಜು ಮಾಡುತ್ತಿದ್ದರು ಎಂದು ಮಡಿಯಾಳ್‌ ಹೇಳಿದರು.

25 ಸಾವಿರ ರುಪಾಯಿ ಬಹುಮಾನ : ಪತ್ರಿಕಾಗೋಷ್ಠಿಯಲ್ಲಿ ಹಾಜರಿದ್ದ ಮುಖ್ಯಮಂತ್ರಿ ಎಸ್‌. ಎಂ. ಕೃಷ್ಣ ಹಾಗೂ ಗೃಹ ಸಚಿವ ಮಲ್ಲಿಕಾರ್ಜುನ ಖರ್ಗೆ ಪೊಲೀಸರ ಈ ಸಾಧನೆಯನ್ನು ಶ್ಲಾಘಿಸಿದರು. ರಾಜ್ಯದ ಚರ್ಚ್‌ಗಳಲ್ಲಿ ನಡೆದ ಸರಣಿ ಬಾಂಬ್‌ ಸ್ಫೋಟ ಪ್ರಕರಣಕ್ಕೆ ಸಂಬಂಧಿಸಿದ ಆರೋಪಿಗಳನ್ನು ಸಿಬಿಐ ಬಂಧಿಸಿದ ನಂತರ ಪೊಲೀಸರು ಪತ್ತೆ ಹಚ್ಚಿರುವ ಬೃಹತ್‌ ನಕಲಿ ಜಾಲ ಇದಾಗಿದೆ ಎಂದು ಪ್ರಶಂಸಿಸಿದರು. ಈ ಅಂತರರಾಜ್ಯ ನಕಲಿ ಸ್ಟಾಂಪ್‌ ಪೇಪರ್‌ ಜಾಲ ಪತ್ತೆ ಹಚ್ಚಿರುವ ಪೊಲೀಸರ ತಂಡಕ್ಕೆ ಮುಖ್ಯಮಂತ್ರಿ ಎಸ್‌.ಎಂ. ಕೃಷ್ಣ 25 ಸಾವಿರ ರುಪಾಯಿ ಬಹುಮಾನ ಘೋಷಿಸಿದ್ದಾರೆ.

ಗ್ರಾಹಕರಿಗೆ ಅಸಲಿ ಪೇಪರ್‌ಗಳನ್ನು ತೋರಿಸಿ, ನಂತರ ನಕಲಿ ಪೇಪರ್‌ಗಳನ್ನು ಸರಬರಾಜು ಮಾಡುತ್ತಿದ್ದ ಈ ಜಾಲದ ಪ್ರಮುಖ ಆರೋಪಿ ಬೆಳಗಾವಿಯ ಬಾರುದ್ದೀನ್‌ ಅಲಿಯಾಸ್‌ ಬದ್ರು (24). ಬಂಧಿಸಲಾಗಿರುವ ಆಪಾದಿತರ ಪೈಕಿ ಐವರು ಬೆಳಗಾವಿಯವರು ಎಂದು ಮಡಿಯಾಳ್‌ ಹೇಳಿದ್ದಾರೆ. ಪತ್ರಿಕಾಗೋಷ್ಠಿಯಲ್ಲಿ ಪೊಲೀಸ್‌ ಮಹಾ ನಿರ್ದೇಶಕ ಸಿ. ದಿನಕರ್‌ ಸಹ ಹಾಜರಿದ್ದರು.

(ಯುಎನ್‌ಐ)