ಚಂಬಲ್‌ ಕಣಿವೆಯಲ್ಲಿ ಅಡಗಿದ್ದ ಅಪಹರಣಕಾರನ ಬಂಧನ

ಬೆಂಗಳೂರು : ಬೆಂಗಳೂರಿನಲ್ಲಿ ಮೂರು ವರ್ಷದ ಮಗುವೊಂದನ್ನು ಅಪಹರಿಸಿ, ಚಂಬಲ್‌ ಕಣಿವೆಯಲ್ಲಿ ಅಡಗಿಕುಳಿತಿದ್ದ ಅಪಹರಣಕಾರನೊಬ್ಬನನ್ನು ಬಂಧಿಸಿ ಪೊಲೀಸರು ಶುಕ್ರವಾರ ನಗರಕ್ಕೆ ಕರೆತಂದಿದ್ದಾರೆ.

ಪ್ರಹ್ಲಾದ್‌ ಅಲಿಯಾಸ್‌ ಪೆಲ್ಲಾದ್‌ ಎಂಬುವಾತನೆ ಬಂಧಿತ ಆರೋಪಿ. ಈತ ಜನವರಿ 24ರಂದು ಮನೆಯ ಮುಂದೆ ಆಟವಾಡುತ್ತಿದ್ದ ಮಗುವನ್ನು ಅಪಹರಿಸಿ, ಜನವರಿ 29ರಂದು ಮಗುವನ್ನು ಬಿಡಲು 3 ಲಕ್ಷ ರುಪಾಯಿಗಳ ಬೇಡಿಕೆ ಇಟ್ಟಿದ್ದನು ಎಂದು ಪೊಲೀಸರು ತಿಳಿಸಿದ್ದಾರೆ.

ಮಗುವಿನ ತಂದೆ ಕಲ್ಯಾಣ್‌ ಎಂಬುವವರು ನೀಡಿದ ದೂರಿನ ಮೇರೆಗೆ ಕಾರ್ಯ ಪ್ರವೃತ್ತರಾದ ನಗರ ಪೊಲೀಸರು ವಿಶೇಷ ತಂಡವೊಂದನ್ನು ರಚಿಸಿ, ಅಪಹರಣಕಾರನ ಶೋಧದಲ್ಲಿ ತೊಡಗಿದರು. ಹಲವು ಬಾರಿ ಆರೋಪಿಯ ಊರಾದ ಮಧ್ಯಪ್ರದೇಶದ ಗೋಪಾಲಪುರಕ್ಕೆ ಹೋಗಿ ಬಂದ ಪೊಲೀಸರು ಅಂತಿಮವಾಗಿ ಚಂಬಲ್‌ ಕಣಿವೆಯಲ್ಲಿ ಅಡಗಿದ್ದ ಆರೋಪಿಯನ್ನು ಬಂಧಿಸುವಲ್ಲಿ ಯಶಸ್ವಿಯಾದರು.

ಮಗುವನ್ನು ಅಪಹರಿಸಿದ್ದ ಆರೋಪಿ ಪ್ರಹ್ಲಾದನ ತಂದೆ ಫೆಬ್ರವರಿ 17ರಂದೇ ಮಗುವನ್ನು ಅದರ ಪಾಲಕರಿಗೆ ತಂದೊಪ್ಪಿಸಿದ್ದರು. ಆರೋಪಿಯನ್ನು ನ್ಯಾಯಾಧೀಶರ ಮುಂದೆ ಹಾಜರುಪಡಿಸಲಾಯಿತು.