ಅಪ್ಪಾಜಿ ಬಿಡುಗಡೆ 100% ಖಚಿತ : ರಾಘವೇಂದ್ರರಾಜ್‌ಕುಮಾರ್‌

ಬೆಂಗಳೂರು : ವೀರಪ್ಪನ್‌ ವಶದಲ್ಲಿರುವ ತಮ್ಮ ಅಪ್ಪಾಜಿ ಯಾವುದೇ ಅಪಾಯ ಇಲ್ಲದೆ ಸುರಕ್ಷಿತವಾಗಿ ಹಿಂತಿರುಗುವುದು ನೂರಕ್ಕೆ ನೂರು ಖಚಿತ ಎಂದು ಸಂಧಾನಕಾರ ನಕ್ಕೀರನ್‌ ಗೋಪಾಲ್‌ ಕಾಡಿಗೆ ತೆರಳುವ ಮುನ್ನ ತಮಗೆ ತಿಳಿಸಿದ್ದಾರೆಂದು ರಾಘವೇಂದ್ರ ರಾಜ್‌ಕುಮಾರ್‌ ಗುರುವಾರ ಇಲ್ಲಿ ತಿಳಿಸಿದರು.

ಚೆನ್ನೈನಲ್ಲಿ ಕರುಣಾನಿಧಿ ಹಾಗೂ ಗೋಪಾಲ್‌ ಅವರೊಂದಿಗೆ ಮಾತುಕತೆ ನಡೆಸಿ, ಬೆಂಗಳೂರಿಗೆ ಹಿಂತಿರುಗಿದ ಬಳಿಕ ಮಾಧ್ಯಮ ಪ್ರತಿನಿಧಿಗಳೊಂದಿಗೆ ಮಾತನಾಡುತ್ತಿದ್ದ ರಾಘವೇಂದ್ರ ರಾಜ್‌ಕುಮಾರ್‌ ಗೋಪಾಲ್‌ ಅವರು ತಮ್ಮ ತಂದೆಯ ಬಿಡುಗಡೆ ಬಗ್ಗೆ ಭರವಸೆ ನೀಡಿದ್ದಾರೆ, ಕರುಣಾನಿಧಿ ಅವರು ಕೂಡ ಬಹಳಷ್ಟು ಕಾಳಜಿ ವಹಿಸಿದ್ದಾರೆ ಎಂದರು.

ಗೋಪಾಲ್‌ ಪ್ರತಿಜ್ಞೆ: ಎರನಡೇ ಸುತ್ತಿನ ಸಂಧಾನಕ್ಕಾಗಿ ಬುಧವಾರ ರಾತ್ರಿ ಕಾಡಿನತ್ತ ಅಡಿಯಿಟ್ಟ, ಗೋಪಾಲ್‌ ಈ ಬಾರಿ ರಾಜ್‌ಕುಮಾರ್‌ ಹಾಗೂ ಮತ್ತಿತರರನ್ನು ಬಿಡಿಸಿಕೊಂಡೇ ಕಾಡಿನಿಂದ ಕಾಲ್ತೆಗೆಯುವುದಾಗಿ ಪ್ರತಿಜ್ಞೆ ಮಾಡಿದ್ದಾರೆ ಎಂದು ತಿಳಿದುಬಂದಿದೆ. ಎರಡೂ ಸರಕಾರಗಳು ವೀರಪ್ಪನ್‌ನ ಪ್ರಮುಖ ಬೇಡಿಕೆಗಳನ್ನು ಈಡೇರಿಸಿರುವ ಹಿನ್ನೆಲೆಯಲ್ಲಿ ವೀರಪ್ಪನ್‌ ಎಲ್ಲ ಒತ್ತೆಯಾಳುಗಳನ್ನೂ ಸುರಕ್ಷಿತವಾಗಿ ಬಿಡುಗಡೆಗೊಳಿಸುತ್ತಾರೆ ಎಂಬುದು ಗೋಪಾಲ್‌ ವಿಶ್ವಾಸವಾಗಿದೆ.

ಹುಸಿ ಬಾಂಬ್‌ ಬೆದರಿಕೆ - ವಿಚಾರಣೆ: ನಗರದ ಶಾಲೆಯಾಂದರಲ್ಲಿ ಬಾಂಬ್‌ ಇಡಲಾಗಿದೆ ಎಂಬ ಹುಸಿ ಕರೆಯ ಹಿನ್ನೆಲೆಯಲ್ಲಿ ಭಾರತಿ ನಗರದ ಎಸ್‌ಟಿಡಿ ಬೂತ್‌ ಮಾಲಿಕರೊಬ್ಬರನ್ನು ಗುರುವಾರ ತಮ್ಮ ವಶಕ್ಕೆ ತೆಗೆದುಕೊಂಡಿರುವ ಪೊಲೀಸರು ವಿಚಾರಣೆ ನಡೆಸುತ್ತಿದ್ದಾರೆ. ಪೊಲೀಸ್‌ ಕಂಟ್ರೋಲ್‌ ರೂಂಗೆ ಬಂದ ಕರೆಯಾಂದರ ಹಿನ್ನೆಲೆಯಲ್ಲಿ , ಫೋನ್‌ ಎಲ್ಲಿಂದ ಬಂತು ಎಂಬುದನ್ನು ಪತ್ತೆ ಹಚ್ಚಿದ ಪೊಲೀಸರು ಈ ವಿಚಾರಣೆಗೆ ಮುಂದಾಗಿದ್ದಾರೆ.

ರಾಜಣ್ಣ ಮನೆಗೆ ಬಾರಣ್ಣ : ರಾಜ್‌ಕುಮಾರ್‌ ಅವರು ಅಪಹರಣವಾದ ದಿನದಿಂದಲೂ ಆಬಾಲವೃದ್ಧರಾಗಿ ಎಲ್ಲರೂ ರಾಜ್‌ ಸುರಕ್ಷಿತವಾಗಿ ಎಂದು ಮನೆಗೆ ಬರುತ್ತಾರೋ ಎಂದೇ ಚಿಂತಿಸುತ್ತಿದ್ದಾರೆ. ಎಲ್ಲರ ಹಾರೈಕೆಯೂ ರಾಜ್‌ ಸುರಕ್ಷಿತವಾಗಿ ಮನೆಗೆ ಮರಳಲಿ ಎಂಬುದೇ ಆಗಿದೆ. ಇದಕ್ಕೆ ಶಾಲಾ ಮಕ್ಕಳೂ ಹೊರತಾಗಿಲ್ಲ.

ರಾಜಾಜಿನಗರದ ಪೇರೆಂಟ್ಸ್‌ ಅಸೋಸಿಯೇಷನ್‌ನ ಬಾಲಕ ಬಾಲಕಿಯರು, ರಾಜಣ್ಣ ಬೇಗ ಮನೆಗೆ ಬಾರಣ್ಣ .. ನಾವು ರಾಜ್‌ಕುಮಾರ್‌ ಬಿಡುಗಡೆಯ ವರವ ಬೇಡುವೆವು ಎಂಬ ಸಾಲುಗಳಿದ್ದ ಫಲಕಗಳನ್ನು ಹಿಡಿದು, ರಾಜ್‌ಕುಮಾರ್‌ ಅವರ ನಿವಾಸದಲ್ಲಿ ದೇವರನ್ನು ಪ್ರಾರ್ಥಿಸಿದರು.

ನಾಯಿಗಳ ಮೆರವಣಿಗೆ: ರಾಜ್‌ಕುಮಾರ್‌ ಅವರು ಸುರಕ್ಷಿತವಾಗಿ ಹಿಂತಿರುಗಿ ಬರಲಿ ಎಂದು ನಾನಾ ಸಂಘ - ಸಂಸ್ಥೆಗಳು ಹಾಗೂ ಕಲಾವಿದರು ದೇವಾಲಯಗಳಲ್ಲಿ ವಿಶೇಷ ಪೂಜೆ - ಹೋಮ - ಹವನ ನಡೆಸುತ್ತಿದ್ದರೆ. ಮಾಲೂರು ತಾಲೂಕಿನ ನಿದರಮಂಗಲದ ನಾಗರಿಕರು, ವೀರಪ್ಪನ್‌ನ ಈ ದುಷ್ಕೃತ್ಯವನ್ನು ಖಂಡಿಸಿ, ನಾಯಿಗಳ ಮೆರವಣಗೆ ನಡೆಸಿದ್ದಾರೆ. ವೀರಪ್ಪನ್‌ನ ಪ್ರತಿಕೃತಿಯನ್ನೂ ದಹಿಸಿದ್ದಾರೆ. ರಾಜ್‌ ಅವರನ್ನು ಬಿಡಿಸುವಂತೆ ಊರು ಮುಂದಲ ಆಂಜನೇಯನಿಗೆ ಮೊರೆ ಇಟ್ಟಿದ್ದಾರೆ.