ಶಾಸಕ ವೆಂಕಟೇಶಪ್ಪ ಕೊಲೆ ಯತ್ನ ಆರೋಪಿಗಳ ಬಂಧನ

ಬೆಂಗಳೂರು : ಕೋಲಾರ ಜಿಲ್ಲೆ ಬೇತಮಂಗಲ ಕ್ಷೇತ್ರದ ಶಾಸಕ ವೆಂಕಟೇಶಪ್ಪ ಅವರ ಹತ್ಯೆಗೆ ಯತ್ನಿಸಿದ ಆರು ಮಂದಿ ಆರೋಪಿಗಳನ್ನು ಪೊಲೀಸರು ಸೋಮವಾರ ಬಂಧಿಸಿದ್ದಾರೆ.

ಆರೋಪಿಗಳನ್ನು ಭುವನಹಳ್ಳಿ ನಿವಾಸಿಗಳಾದ ರಮೇಶ್‌ (28), ನಾಗರಾಜು(25), ನಾರಾಯಣಸ್ವಾಮಿ(28), ಪಾಪಯ್ಯ (30) ಹಾಗೂ ಮೂರ್ತಿ(28) ಮತ್ತು ದುಕ್ಯಾ ಚಿನ್ನಪ್ಪ ಎಂದು ಗುರುತಿಸಲಾಗಿದೆ. ಇವರೆಲ್ಲರೂ ಸಂಯುಕ್ತ ಜನತಾದಳದ ಕಾರ್ಯಕರ್ತರೆಂದು ಹೇಳಲಾಗಿದ್ದು, ರಾಜಕೀಯ ದ್ವೇಷ ಹಾಗೂ ಜಮೀನು ವಿವಾದ ಕೊಲೆ ಯತ್ನಕ್ಕೆ ಕಾರಣ ಎಂದು ಪೊಲೀಸ್‌ ಮೂಲಗಳು ತಿಳಿಸಿವೆ.

ಶಾಸಕರಾದ ವೆಂಕಟೇಶಪ್ಪ ಅವರು ಕಾಂಗ್ರೆಸ್‌ ಪಕ್ಷದವರಾಗಿದ್ದು, ಜಮೀನು ಒತ್ತುವರಿ ಪ್ರಕರಣಕ್ಕೆ ಸಂಬಂಧಿಸಿದಂತೆ ಕೊಲೆಗೆ ತಾವು ಯತ್ನಿಸಿದ್ದಾಗಿ ಆರೋಪಿಗಳು ಒಪ್ಪಿಕೊಂಡಿದ್ದಾರೆಂದು ಹೇಳಲಾಗಿದೆ.