ಬುಧವಾರ ಸರಕಾರದ ಸಂದೇಶದೊಂದಿಗೆ ಅಡಗುತಾಣಕ್ಕೆ ಗೋಪಾಲ್‌

ಚೆನ್ನೈ : ವೀರಪ್ಪನ್‌ ಮಂಡಿಸಿರುವ ಹೊಸ ಬೇಡಿಕೆಗಳು ಹಾಗೂ ಹಿಂದಿನ ಬೇಡಿಕೆಗಳಿಗೆ ಕೇಳಿರುವ ಸ್ಪಷ್ಟೀಕರಣಕ್ಕೆ ಪೂರಕವಾದ ಪುರಾವೆಗಳೊಂದಿಗೆ ಎರಡೂ ರಾಜ್ಯಗಳ ಸಂಧಾನಕಾರ ನಕ್ಕೀರನ್‌ ಗೋಪಾಲ್‌ ಬುಧವಾರ (16ರಂದು) ಮತ್ತೆ ಕಾಡಿಗೆ ತೆರಳಲಿದ್ದಾರೆ.

ಈ ವಿಷಯವನ್ನು ತಮಿಳುನಾಡು ಸರಕಾರದ ಉನ್ನತ ಮೂಲಗಳು ಸ್ಪಷ್ಟಪಡಿಸಿವೆ. ವೀರಪ್ಪನ್‌ ಶುಕ್ರವಾರ ಗೋಪಾಲ್‌ರೊಂದಿಗೆ ಕಳುಹಿಸಿರುವ ಹೊಸ ಬೇಡಿಕೆಗಳ ಬಗ್ಗೆ ಎರಡೂ ರಾಜ್ಯಗಳು ಚರ್ಚಿಸಿದ್ದು , ಪೂರಕ ಪುರಾವೆ ಹಾಗೂ ದಾಖಲೆಗಳನ್ನು ಒಟ್ಟುಗೂಡಿಸುತ್ತಿವೆ. ಈ ಪ್ರಕ್ರಿಯೆ ಮುಗಿದ ಕೂಡಲೇ ವೀರಪ್ಪನ್‌ ಬಳಿಗೆ ಗೋಪಾಲ್‌ ಹೊರಡಲಿದ್ದಾರೆ.

ಬೇಡಿಕೆಗಳ ಸಂಬಂಧದಲ್ಲಿ ತಮಿಳುನಾಡಿನ ಮುಖ್ಯಮಂತ್ರಿ ಕರುಣಾನಿಧಿ ಅವರು ಶನಿವಾರ ಮಧ್ಯಾಹ್ನ ಮುಖ್ಯಕಾರ್ಯದರ್ಶಿ ಎ.ಪಿ. ಮುತ್ತುಸ್ವಾಮಿ, ಗೃಹಕಾರ್ಯದರ್ಶಿ ಶಾಂತಾ ಶೈಲಾ ನಾಯರ್‌, ಪೊಲೀಸ್‌ ಮಹಾನಿರ್ದೇಶಕ ಎಫ್‌.ಸಿ. ಶರ್ಮಾ ಹಾಗೂ ಇತರ ಉನ್ನತಾಧಿಕಾರಿಗಳ ಜತೆ ಒಂದು ಗಂಟೆಗೂ ಹೆಚ್ಚು ಕಾಲ ಸಭೆ ನಡೆಸಿ ಚರ್ಚಿಸಿದರು.

ತಮಿಳುನಾಡು ಸರಕಾರ ವೀರಪ್ಪನ್‌ ಬೇಡಿಕೆಗಳಿಗೆ ಅನುಕೂಲಕರ ಪ್ರತಿಕ್ರಿಯೆ ನೀಡಿದ್ದು, ಕರ್ನಾಟಕ ಸರಕಾರ ಸೋಮವಾರ ಅಗತ್ಯ ದಾಖಲಾತಿಗಳನ್ನು ತಮಿಳುನಾಡು ಸರಕಾರಕ್ಕೆ ಸಲ್ಲಿಸಲಿದೆ.