ಅಡುಗೆ ಮಾಡುವಾಗಲೇ ಕ್ಲೀನ್ ಮಾಡುವ ಅಭ್ಯಾಸವುಳ್ಳವರ ಕಿಚನ್ ನೀಟಾಗಿರುವುದು ಮಾತ್ರವಲ್ಲ, ಮನಸ್ಸೂ ಶಾಂತವಾಗಿರುವುದು
ಅಡುಗೆ ಮನೆ ಕೆಲಸ ಅಂದುಕೊಂಡಷ್ಟು ಸುಲಭವಲ್ಲ. ಅಡುಗೆ ಎಂದರೆ ರುಚಿ ರುಚಿಯಾದ ಆಹಾರ ಬೇಯಿಸಿ ಇಡುವುದು ಮಾತ್ರವಲ್ಲ. ಆಹಾರ ಬೇಯಿಸಿದ ನಂತರ ಅಡುಗೆ ಮನೆಯನ್ನು ಮತ್ತೆ ಅಚ್ಚುಕಟ್ಟಾಗಿ ಇಡುವ ಕೆಲಸ ಬಹಳ ಮುಖ್ಯ. ಅಂದರೆ ಅಡುಗೆಗಾಗಿ ಬಳಸಿದ ಸೌಟು, ಸಣ್ಣ ಸಣ್ಣ ಚಮಚ, ಪಾತ್ರೆಗಳು, ಚಾಪಿಂಗ್ ಬೋರ್ಡ್, ಚಾಕು ಇತ್ಯಾದಿಗಳನ್ನು ತೊಳೆದು ನೀಟಾಗಿ ಮತ್ತೆ ಅದರ ಜಾಗದಲ್ಲಿ ಜೋಡಿಸಿಡಬೇಕು. ಕಿಚನ್ ಸ್ಲಾಬ್, ನೆಲವನ್ನು ಒರೆಸಿ ಶುಚಿಯಾಗಿಸಬೇಕು. ಕೆಲವರಿಗೆ ಈ ಎಲ್ಲಾ ಕೆಲಸಗಳನ್ನು ಅಡುಗೆಯ ಜೊತೆಜೊತೆಯಲ್ಲಿಯೇ ಮಾಡಿ ಮುಗಿಸುವ ಅಭ್ಯಾಸವಿರುತ್ತದೆ. ಇನ್ನು ಕೆಲವರು ತೊಳೆಯುವ ಬಳಿಯುವ ಕೆಲಸವನ್ನೆಲ್ಲಾ ಹಾಗೆಯೇ ಬದಿಗೆ ಸರಿಸಿ ಇಡುತ್ತಾರೆ. ತಕ್ಷಣಕ್ಕೆ ಅಡುಗೆ ಮುಗಿಸಿದರಾಯಿತು. ಉಳಿದ ಕೆಲಸ
ಸಮಯ ಸಿಕ್ಕಾಗ ಮಾಡಬಹುದು ಎನ್ನುವ ಲೆಕ್ಕಾಚಾರ ಅವರದ್ದಾಗಿರುತ್ತದೆ.
2010ರಲ್ಲಿ ಮನೋವಿಜ್ಞಾನಿಗಳು ನಡೆಸಿದ ಅಧ್ಯಯನದ ಪ್ರಕಾರ, ಜನರು ತಮ್ಮ ಮನೆಯ ಪರಿಸರವನ್ನು ಹೇಗೆ ಇಟ್ಟುಕೊಳ್ಳುತ್ತಾರೆ ಎನ್ನುವುದು ದೇಹದ ಪ್ರಮುಖ ಒತ್ತಡ ಹಾರ್ಮೋನ್ ಆಗಿರುವ ಕಾರ್ಟಿಸೋಲ್ ಮಟ್ಟಗಳೊಂದಿಗೆ ನೇರವಾಗಿ ಸಂಬಂಧಿಸಿದೆ. ಯಾರ ಮನೆ, ಅಡುಗೆ ಮನೆ ಸದಾ ಅಸ್ತವ್ಯಸ್ತವಾಗಿರುವುದೋ ಅವರ ಮನಸ್ಸು ಕೂಡಾ ಯಾವಗಲೂ ಒತ್ತಡದಿಂದ ಕೂಡಿರುತ್ತದೆ. ಯಾಕೆಂದರೆ ಅವರ ದಿನನಿತ್ಯದ ಕಾರ್ಟಿಸೋಲ್ ಇಳಿಕೆಯ ಪ್ರಮಾಣ ಕೂಡಾ ಕಡಿಮೆಯಿರುತ್ತದೆ. ಇಲ್ಲಿ ಅರ್ಥ ಮಾಡಿಕೊಳ್ಳಬೇಕಾದ ವಿಚಾರ ಎಂದರೆ ಅಸ್ತವ್ಯಸ್ತವಾದ ಅಡುಗೆಮನೆ ಕೇವಲ ಕಣ್ಣಿಗೆ ಕೆಟ್ಟದಾಗಿ ಕಾಣುವುದಲ್ಲ, ಅದು ಮನಸ್ಸು ಮತ್ತು ದೇಹವನ್ನು ಸಂಜೆವರೆಗೂ ಒತ್ತಡದ ಸ್ಥಿತಿಯಲ್ಲಿ ಇರಿಸಬಹುದು.
ಒತ್ತಡ ನಿಯಂತ್ರಿಸಬಲ್ಲ ಸರಳ ಅಭ್ಯಾಸ:
ಅಡುಗೆ ಕೆಲಸ ಮಾಡುತ್ತಾ ಹೋಗುವಾಗಲೇ ಸ್ವಚ್ಛಗೊಳಿಸುವ ಕಾರ್ಯ ಕೂಡಾ ಮುಗಿಸುತ್ತಾ ಬರುವುದು. ಈ ಅಭ್ಯಾಸವು ಸ್ವಯಂ-ನಿಯಂತ್ರಣ ವರ್ತನೆಯಾಗಿದ್ದು, ಮೆದುಳಿಗೆ ನೈಜ ಸಮಯದಲ್ಲೇ ಮರುಹೊಂದಿಕೊಳ್ಳುವುದನ್ನು ಕಲಿಸುತ್ತದೆ.
ಅಸ್ತವ್ಯಸ್ತತೆಯನ್ನು ಅಪೂರ್ಣ ಕಾರ್ಯವೆಂದು ನೋಡುವ ಮೆದುಳು:
ನಾವು ಸಿಂಕ್ ಮೇಲೆ ಕೊಳಕು ಪಾತ್ರೆಯನ್ನು ಹಾಗೆಯೇ ಬಿಟ್ಟರೆ, ಅಥವಾ ಸ್ಟೌವ್ ಮೇಲೆ ಚೆಲ್ಲಿರುವ ಪದಾರ್ಥವನ್ನು ಒರೆಸಿ ತೆಗೆಯದಿದ್ದರೆ , ಮೆದುಳು ಅದನ್ನು ಓಪನ್ ಲೂಪ್ ಎಂದೇ ನೋಡುತ್ತದೆ. ಅಂದರೆ, ಈ ಕೆಲಸ ಇನ್ನೂ ಪೂರ್ತಿಯಾಗಿಲ್ಲ ಎನ್ನುವುದನ್ನು ಮೆದುಳು ದಾಖಲಿಸಿಕೊಂಡು ಬಿಡುತ್ತದೆ. ಹಾಗಾಗಿ ಆ ಕೆಲಸ ಮಾಡಿ ಮುಗಿಯುವವರೆಗೂ ಒಂದು ರೀತಿಯ ಕಿರಿಕಿರಿ ಆಗುತ್ತಿರುತ್ತದೆ.
1927ರಲ್ಲಿ ನಡೆಸಿದ ಅಧ್ಯಯನದ ಪ್ರಕಾರ, ಮಧ್ಯೆ ನಿಂತುಹೋದ ಅಥವಾ ಅಪೂರ್ಣವಾಗಿರುವ ಕೆಲಸಗಳು ಪೂರ್ಣಗೊಂಡ ಕೆಲಸಗಳಿಗಿಂತ ಮನಸ್ಸಿನಲ್ಲಿ ಹೆಚ್ಚು ಸಕ್ರಿಯವಾಗಿರುತ್ತವೆ. ಈ ವಿದ್ಯಮಾನವನ್ನು ಇಂದು ವ್ಯಾಪಕವಾಗಿ "Zeigarnik Effect" ಎಂದು ಕರೆಯಲಾಗುತ್ತದೆ. ಇದರ ಅರ್ಥ, ಅಡುಗೆ ಮನೆ ಸಿಂಕ್ನಲ್ಲಿ ಬಿದ್ದಿರುವ ಪಾತ್ರೆಗಳ ರಾಶಿ ಸಣ್ಣ ವಿಷಯವಾದರೂ, ಅದು ಪೂರ್ಣಗೊಳ್ಳುವವರೆಗೆ ಮೆದುಳು ಆ ಬಗ್ಗೆ ಯೋಚಿಸುತ್ತಲೇ ಇರುತ್ತದೆ. ವ್ಯಕ್ತಿ ಆ ರಾಶಿ ಪಾತ್ರೆಗಳ ಬಗ್ಗೆ ಜಾಗೃತವಾಗಿ ಯೋಚಿಸದಿದ್ದರೂ ಮಾನಸಿಕ ಶಕ್ತಿ ಹೆಚ್ಚು ವ್ಯಯವಾಗುತ್ತಿರುತ್ತದೆ.
ಇದಕ್ಕೆ ವಿರುದ್ಧವಾಗಿ ಬಳಸಿದ ಕೂಡಲೇ ಪಾತ್ರೆಯನ್ನು ತೊಳೆದರೆ, ಅದು ಕೇವಲ ಅಚ್ಚುಕಟ್ಟಾಗಿ ಕಾಣುವುದು ಮಾತ್ರವಲ್ಲ, ಮೆದುಳು ಆ ಕೆಲಸವನ್ನು ಮುಗಿದಿದೆ ಎನ್ನುವುದನ್ನು ತಕ್ಷಣ ದಾಖಲಿಸಿ ಬಿಡುತ್ತದೆ. ನಂತರ ತನ್ನ ಮುಂದಿನ ಕೆಲಸದತ್ತ ಸಾಗುತ್ತದೆ. ಇದು ಸಣ್ಣ ಅಭ್ಯಾಸವಾದರೂ, ಗಮನಾರ್ಹ ಜ್ಞಾನಾತ್ಮಕ ಲಾಭವನ್ನು ನೀಡಬಹುದು.
ಹಳೆಯ ಬೆಡ್ಶೀಟ್ಗಳನ್ನು ವೇಸ್ಟ್ ಎಂದು ಎಸೆಯುವ ಬದಲು ಹೀಗೆ ಮಾಡಿ : ಮತ್ತೆ ಮತ್ತೆ ಬಳಸಬಹುದು.
ಅಡುಗೆ ಮಾಡುವಾಗಲೇ ಎಲ್ಲವನ್ನೂ ಮರುಹೊಂದಿಸಿಕೊಳ್ಳುವುದು:
ಅಡುಗೆಮನೆಯು ಬಹುತೇಕ ಇತರ ಪರಿಸರಗಳಲ್ಲಿ ಇಲ್ಲದ ಒಂದು ಅವಕಾಶವನ್ನು ಒದಗಿಸುತ್ತದೆ. ಅಡುಗೆ ಮಾಡುವಾಗ ಕೆಲವೊಂದು ಸಂದರ್ಭಗಳಲ್ಲಿ ಕಾಯುವ ಸ್ಥಿತಿ ನಿರ್ಮಾಣವಾಗುತ್ತದೆ. ಅಂದರೆ ನೀರು ಕುದಿಯುವಾಗ, ತರಕಾರಿ ನಿಧಾನವಾಗಿ ಬೇಯುವಾಗ, ಬ್ರೆಡ್ ಟೋಸ್ಟ್ ಆಗುವಾಗ ತುಸು ಸಮಯ ತೆಗೆದುಕೊಂಡು ಬಿಡುತ್ತವೆ. ಈ ಸಣ್ಣ ಗ್ಯಾಪ್ನಲ್ಲಿ ನಾವು ಉಳಿದಿರುವ ಕ್ಲೀನಿಂಗ್ ಕೆಲಸವನ್ನು ಮುಗಿಸಿ ಬಿಡಬಹುದು.
ಇಲ್ಲಿ ನೀರು ಕುದಿಯುವುದನ್ನು ಕೌಂಟರ್ ಒರೆಸುವ ಸೂಚನೆಯಾಗಿ, ಅಥವಾ ಬ್ರೆಡ್ ಟೋಸ್ಟ್ ಆಗುವ ಸಮಯವನ್ನು ಚಾಕುವನ್ನು ತೊಳೆಯುವ ಸೂಚನೆಯಾಗಿ ಬಳಸಿದರೆ, ಒಂದು ಸರಳ ಕ್ರಿಯೆಯನ್ನು ಸ್ವಯಂಚಾಲಿತ ದಿನಚರಿಯ ಅಭ್ಯಾಸವಾಗಿ ಪರಿವರ್ತಿಸಬಹುದು. ಕೆಲವು ವಾರಗಳ ನಂತರ, ಈ ಅಭ್ಯಾಸಕ್ಕೆ ಇಚ್ಛಾಶಕ್ತಿಯ ಅಗತ್ಯವಿರುವುದಿಲ್ಲ, ಅದು ಸಹಜವಾದ ಡೀಫಾಲ್ಟ್ ವರ್ತನೆಯಾಗಿ ಬಿಡುತ್ತದೆ.
ಇಲ್ಲಿಯೇ ಸ್ವಯಂ-ನಿಯಂತ್ರಣದ ಭಾಗ ಇನ್ನಷ್ಟು ಆಸಕ್ತಿದಾಯಕವಾಗುತ್ತದೆ. ಮೆದುಳು ಪ್ರತಿ ಬಾರಿ ಅಸ್ತವ್ಯಸ್ತತೆಯನ್ನು ಗಮನಿಸಿ, ತ್ವರಿತ ನಿರ್ಧಾರ ತೆಗೆದುಕೊಂಡು, ಸ್ವಚ್ಛಗೊಂಡ ನಂತರ ಸಣ್ಣ ತೃಪ್ತಿಯನ್ನು ಪಡೆದಾಗ, ಮನೋವಿಜ್ಞಾನಿಗಳು ಸೆಲ್ಫ್ ಕಂಟ್ರೋಲ್ ಲೂಪ್ ಎಂದು ಕರೆಯುವ ಪ್ರಕ್ರಿಯೆಯನ್ನು ಪೂರ್ಣಗೊಳಿಸುತ್ತದೆ. ಗುರುತಿಸು, ಕಾರ್ಯನಿರ್ವಹಿಸು, ಪರಿಹರಿಸು ಎಂಬ ನಿಯಮವನ್ನು ವಾರಕ್ಕೆ ಡಜನ್ಗಟ್ಟಲೆ ಬಾರಿ ಅಡುಗೆಮನೆಯಲ್ಲಿ ಪುನರಾವರ್ತಿಸಿದರೆ, ಮೆದುಳು ಇದೇ ಮಾದರಿಯನ್ನು ಬೇರೆ ಸಂದರ್ಭಗಳಲ್ಲಿಯೂ ಬಳಸಲು ಆರಂಭಿಸುತ್ತದೆ. ಒಪನ್ ಮಾಡದೆ ಬಿಟ್ಟಿರುವ ಇಮೇಲ್ಗೆ ಉತ್ತರಿಸುವುದು, ಕೀಲಿಗಳನ್ನು ಯಾವಾಗಲೂ ಒಂದೇ ಜಾಗದಲ್ಲಿ ಇಡುವುದು, ಫೋನ್ನಲ್ಲಿನ ನೋಟಿಫಿಕೇಶನ್ಗಳನ್ನು ಒಪನ್ ಮಾಡುವುದು ಹೀಗೆ ಎಲ್ಲಾ ಕೆಲಸಗಳನ್ನು ಮನಸ್ಸು ತಕ್ಷಣ ಮಾಡಿ ಮುಗಿಸುವಂತೆ ಸೂಚನೆ ನೀಡುತ್ತದೆ. ಅಡುಗೆಮನೆ ಒಂದು ರೀತಿಯಲ್ಲಿ ಟ್ರೈನಿಂಗ್ ಸೆಂಟರ್ ಇದ್ದ ಹಾಗೆ. ಇಲ್ಲಿ ಅಭ್ಯಾಸವಾಗುವ ಕೌಶಲ್ಯ ಜೀವನದ ಎಲ್ಲಾ ಕ್ಷೇತ್ರಗಳಲ್ಲಿಯೂ ಕಾಣಿಸಿಕೊಳ್ಳುತ್ತದೆ.
ಹೆಚ್ಚು ಸ್ವಚ್ಛವಾದ ಸ್ಥಳ ಎಂದರೆ ಹೆಚ್ಚು ಏಕಾಗ್ರ ಗಮನ:
ಈಗಾಗಲೇ ಬ್ಯುಸಿ ವೇಳಾಪಟ್ಟಿಗಳು, ಹೆಚ್ಚುವರಿ ಕೆಲಸಗಳು ಮತ್ತು ಸೀಮಿತ ಜ್ಞಾನಾತ್ಮಕ ಸಾಮರ್ಥ್ಯಗಳೊಂದಿಗೆ ಬದುಕುತ್ತಿರುವ ಮಿಲೇನಿಯಲ್ಸ್ ಮತ್ತು Gen Z ಗಳಿಗೆ ಅಡುಗೆಮನೆಯ ಪರಿಸರವು ಮಾನಸಿಕ ಸ್ಪಷ್ಟತೆಯ ಮೇಲೆ ಊಹಿಸುವುದಕ್ಕಿಂತ ಹೆಚ್ಚಿನ ಪರಿಣಾಮ ಬೀರುತ್ತದೆ.
ಅಸ್ತವ್ಯಸ್ತತೆ ಕೇವಲ ಚಂದ ಕಾಣಿಸಿಕೊಳ್ಳುವ ಸಮಸ್ಯೆಯಲ್ಲ, ಅದು ನಮ್ಮ ದೃಷ್ಟಿಗಮನಕ್ಕಾಗಿ ಸ್ಪರ್ಧಿಸುವ ವಿಷಯವಾಗಿದೆ. ಸಿಂಕ್ ತುಂಬಿಕೊಂಡಿರುವಾಗ, ಮೆದುಳು ಅಡುಗೆ ಹಂತಗಳು, ಟೈಮರ್ಗಳು ಮತ್ತು ಸಂಗ್ರಹವಾಗುತ್ತಿರುವ ಅಸ್ತವ್ಯಸ್ತತೆಯ ದೃಶ್ಯ ಗದ್ದಲವನ್ನು ಒಂದೇ ಸಮಯದಲ್ಲಿ ಅನುಸರಿಸುತ್ತಿರುತ್ತದೆ. ಈ ವಿಭಜಿತ ಗಮನವು ಕಡಿಮೆ ಮಟ್ಟದ ಜ್ಞಾನಾತ್ಮಕ ಭಾರವನ್ನು ಉಂಟುಮಾಡುತ್ತದೆ.
ಅಡುಗೆ ಮಾಡುತ್ತಲೇ ಸ್ವಚ್ಛಗೊಳಿಸುವುದು ಸ್ಪಷ್ಟವಾದ ಕಾರ್ಯಸ್ಥಳವನ್ನು ಸೃಷ್ಟಿಸುತ್ತದೆ. ಸ್ಪ್ಯಾಚುಲಾ ಎಲ್ಲಿದೆ ಎಂದು ನಿಖರವಾಗಿ ತಿಳಿದಿರುವುದು, ಮುಂದಿನ ಪಾತ್ರೆಗೆ ಜಾಗ ಮಾಡಿ ಕೊಡುವುದು ಇವೆಲ್ಲಾ ನಿರ್ಧಾರ ತೆಗೆದುಕೊಳ್ಳುವಾಗ ಆಗುವ ದಣಿವನ್ನು ನಿಯಂತ್ರಿಸುತ್ತದೆ.
ಪ್ರಾರಂಭಿಸಲು ಸರಳ ವಿಧಾನ:
ಈ ಅಭ್ಯಾಸಕ್ಕೆ ವ್ಯಕ್ತಿತ್ವದ ಸಂಪೂರ್ಣ ಬದಲಾವಣೆ ಅಥವಾ ಯಾವಾಗಲೂ ಹೊಳೆಯುವ ಅಡುಗೆಮನೆಯ ಅಗತ್ಯವಿಲ್ಲ. ಇದು ಕೇವಲ ಒಂದು ಸೂಚನೆಯಿಂದ ಆರಂಭವಾಗುತ್ತದೆ. ಪಾಸ್ತಾ ನೀರು ಕುದಿಯಲು ಬರುತ್ತಿರುವ ಕ್ಷಣದಂತಹ ಒಂದು ಅಡುಗೆ ಸಮಯವನ್ನು ಆಯ್ಕೆಮಾಡಿ, ಅದನ್ನು ಒಂದು ಮೇಲ್ಮೈ ಸ್ವಚ್ಛಗೊಳಿಸಲು ಅಥವಾ ಒಂದು ಉಪಕರಣವನ್ನು ತೊಳೆಯಲು ಬಳಸಿರಿ. ಅಷ್ಟೇ ಸಾಕು.
ಮೆದುಳಿಗೆ ದೊಡ್ಡ ಬದಲಾವಣೆಯ ಅಗತ್ಯವಿಲ್ಲ. ಸೂಚನೆಯೊಂದಿಗೆ ಕೆಲಸವನ್ನು ಮಾಡುತ್ತಾ ಬಂದರೆ ಕಾಲಕ್ರಮೇಣ, ಆ ಒಂದು ಸೂಚನೆ-ಆಧಾರಿತ ಕ್ರಿಯೆ ಸ್ವಯಂಚಾಲಿತವಾಗುತ್ತದೆ ಮತ್ತು ಉಳಿದ ಅಭ್ಯಾಸವು ಸಹಜವಾಗಿ ಅದರ ಸುತ್ತ ಬೆಳೆಯುತ್ತದೆ.
ಏನೇ ಆಗಲಿ, ಅಡುಗೆ ಮಾಡುವಾಗ ಕಿಚನ್ ಗಲೀಜು ಆಗಿಯೇ ಆಗುತ್ತದೆ. ಆದರೆ ಅಡುಗೆ ಮಾಡುತ್ತಾ ಮಾಡುತ್ತಾ ಕ್ಲೀನಿಂಗ್ ಕೆಲಸವೂ ಮುಗಿದರೆ ಮನಸ್ಸು ಶಾಂತವಾಗಿಯೂ ಇರುವುದು. ಮಿಕ್ಕ ಕೆಲಸಗಳಿಗೆ ಸಮಯವೂ ಸಿಗುವುದು.
(ಬರಹ: ರಂಜಿತಾ ಆರ್.ಕೆ.)
Click it and Unblock the Notifications
Sign in with Google