ನೀನಲ್ಲವೇ ?

ಸುಧೆಯನು ಉಣಿಸಿ,
ಲಾಲಿಸಿ ಪಾಲಿಸಿ
ಎತ್ತಿ ಮುದ್ದಾಡಿದವಳು
ನೀನಲ್ಲವೇ ?

ಕಥೆಯನು ಹೇಳುತ
ನೀತಿಯ ಕಲಿಸಿದ
ಮೊಟ್ಟ ಮೊದಲ ಗುರು
ನೀನಲ್ಲವೇ ?

ವಾತ್ಸಲ್ಯದಡಿಯಲಿ
ಪ್ರೀತಿ ಭಾವದಲಿ
ನಕ್ಕು ನಗಿಸಿದವಳು
ನೀನಲ್ಲವೇ ?

'ಸತ್ಯಮೇವ ಜಯತು"
ಸಹನೆಯಿಂದ ಒಳಿತು ಎಂದು
ನುಡಿದವಳು ನೀನಲ್ಲವೇ ?
ನಿನ್ನ ಸಿಹಿ ಜೇನಿನ ಸವಿ
ನಾನಲ್ಲವೇ !!

ನಿನಗೆ ಇದೋ ವಂದನೆ

ಕಣ್ಣು ತೆರೆವ ಮೊದಲೆ ನಿನ್ನ
ಕೂಗಿ ಕರೆದೆ ' ಅಮ್ಮ"
ಕರೆದ ಒಡನೆ ಮಡಿಲಿಗಿರಿಸಿ
ಮುದ್ದಿಸಿದಳು ಅಮ್ಮ

ಜಗದ ಬೆಳಕ ಕಂಡ ಒಡನೆ
ಪುಳಕಗೊಂಡೆ ಅಮ್ಮ
ಬಾಳದಾರಿ ದೀಪವದು
ಬೆದರದಿರೆಂದಳಮ್ಮ

ಎದ್ದು ಬಿದ್ದು ಹೆಜ್ಜೆ ಇಡುತ
ನಡಿಗೆ ಕಲಿತೆ ಅಮ್ಮ
ಏಳು ಬೀಳು ಬಾಳ ಗೆಲವು
ಒಲವಿನಿಂದ ನಕ್ಕಳಮ್ಮ.

***

ಅಮ್ಮ ನೀನು ನೀಲಿ ಬಾನು
ಅಮ್ಮ ನೀನು ಹಾಲು ಜೇನು
ಅಮ್ಮ ನೀನು ಕಾಮಧೇನು
ಸದಾ ಬೇಕು ನನಗೆ ನೀನು
ನಿನಗೆ ಇದೋ ವಂದನೆ

ವಿಶಾಲ ರಂಗಸ್ವಾಮಿ, ಜೆ.ಪಿ. ನಗರ, ಬೆಂಗಳೂರು