Tirupati: ತಿರುಪತಿಯಲ್ಲಿ ಡಾಕು ಮಹಾರಾಜ್ ಸಿನಿಮಾ ತೆರೆಗೂ ಮುನ್ನ ಕುರಿ ಶಿರಚ್ಛೇದ- ಆರೋಪಿಗಳ ಬಂಧನ

ತಿರುಪತಿ ಜನವರಿ 18: ತೆಲುಗು ಸಿನಿಮಾ ಡಾಕು ಮಹಾರಾಜ್ ಜನವರಿ 12ರಂದು ತೆರೆ ಕಾಣುವ ಮುನ್ನ ಚಿತ್ರಮಂದಿರದಲ್ಲಿ ಕುರಿ ಶಿರಚ್ಛೇದ ಮಾಡಿದ ಆರೋಪ ಕೇಳಿ ಬಂದಿದೆ. ಈ ಆರೋಪದ ಮೇಲೆ ಆಂಧ್ರಪ್ರದೇಶ ಪೊಲೀಸರು ಐವರನ್ನು ಬಂಧಿಸಿದ್ದಾರೆ. ಈ ಘಟನೆ ನಡೆದ ಬಳಿಕ ಪೀಪಲ್ ಫಾರ್ ದಿ ಎಥಿಕಲ್ ಟ್ರೀಟ್ಮೆಂಟ್ ಆಫ್ ಅನಿಮಲ್ಸ್ (ಪೆಟಾ) ಇಮೇಲ್ ಮೂಲಕ ದೂರು ದಾಖಲಿಸಿತ್ತು. ಇದರನ್ವಯ ಪೊಲೀಸರು ಆರೋಪಿಗಳನ್ನು ಬಂಧಿಸಿದ್ದಾರೆ.

ಚಿತ್ರಮಂದಿರದಲ್ಲಿ ಕುರಿ ತಲೆ ಕತ್ತರಿಸಿ ಅದರ ರಕ್ತವನ್ನು ಚಿತ್ರದಲ್ಲಿ ಪ್ರಮುಖ ಪಾತ್ರ ವಹಿಸಿದ್ದ ನಟ ಎನ್. ಬಾಲಕೃಷ್ಣ ಅವರ ವಾಲ್ ಪೋಸ್ಟರ್ ಮೇಲೆ ಬಳಿಯಲಾಗಿದೆ ಎನ್ನುವ ಆರೋಪ ಇದೆ. ಈ ದೂರಿನ ಆಧಾರದ ಮೇಲೆ ಪೊಲೀಸರು ಶಂಕರಯ್ಯ, ರಮೇಶ್, ಸುರೇಶ್ ರೆಡ್ಡಿ, ಪ್ರಸಾದ್ ಮತ್ತು ಮುಖೇಶ್ ಬಾಬು ಎಂಬುವವರನ್ನು ಬಂಧಿಸಿದ್ದಾರೆ.

ಜನಪ್ರಿಯ ಟಾಲಿವುಡ್ ನಟ ಮತ್ತು ಹಿಂದೂಪುರ ಶಾಸಕ ಬಾಲಕೃಷ್ಣ ಆಂಧ್ರಪ್ರದೇಶ ಮುಖ್ಯಮಂತ್ರಿ ಎನ್. ಚಂದ್ರಬಾಬು ನಾಯ್ಡು ಅವರ ಸೋದರ ಮಾವ. ವಿಶ್ವವಿಖ್ಯಾತ ಪ್ರಸಿದ್ಧ ಧಾರ್ಮಿಕ ಸ್ಥಳವಾದ ತಿರುಪತಿಯಲ್ಲಿ ಜನವರಿ 12ರಂದು ಬಾಲಕೃಷ್ಣ ಅಭಿನಯದ ಡಾಕು ಮಹಾರಾಜ್ ಸಿನಿಮಾ ತೆರೆ ಕಂಡಿದೆ. ಇದಕ್ಕೂ ಮೊದಲು ಅವರ ಅಭಿಮಾನಿಗಳು ಚಿತ್ರಮಂದಿರದಲ್ಲಿ ಕುರಿ ತಲೆ ಕತ್ತರಿಸಿ ಅದರ ರಕ್ತವನ್ನು ಎನ್. ಬಾಲಕೃಷ್ಣ ಅವರ ವಾಲ್ ಪೋಸ್ಟರ್ ಮೇಲೆ ಹಚ್ಚಿ ಸಂಭ್ರಮಿಸಿದ್ದಾರೆ.

ಈ ವಿಷಯ ತಿಳಿದ ಬಳಿಕ ಪೀಪಲ್ ಫಾರ್ ದಿ ಎಥಿಕಲ್ ಟ್ರೀಟ್ಮೆಂಟ್ ಆಫ್ ಅನಿಮಲ್ಸ್ (ಪೆಟಾ) ಸ್ಥಳೀಯ ಪೊಲೀಸರಿಗೆ ಈಮೇಲ್ ಮೂಲಕ ದೂರು ನೀಡಿದೆ. ಜನವರಿ 16ರಂದು ವಿಚಾರಣೆ ನಡೆಸಿ ತಿರುಪತಿ ಪೂರ್ವ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಿಸಲಾಗಿದೆ. ಬಳಿಕ ಐದು ಜನ ಆರೋಪಿಗಳನ್ನು ಬಂಧಿಸಲಾಗಿದೆ.

ಪ್ರಸ್ತುತ ಈ ಪ್ರಾಣಿ ಬಲಿಯಲ್ಲಿ ಭಾಗಿಯಾಗಿದ್ದಾರೆಂದು ಶಂಕಿಸಲಾಗಿರುವ ಇತರ ಜನರಿಗಾಗಿಯೂ ಪೊಲೀಸರು ಹುಡುಕಾಟ ನಡೆಸುತ್ತಿದ್ದಾರೆ ಎಂದು ತಿರುಪತಿ ಪೂರ್ವ ಉಪವಿಭಾಗೀಯ ಪೊಲೀಸ್ ಅಧಿಕಾರಿ ವೆಂಕಟ್ ನಾರಾಯಣ ತಿಳಿಸಿದ್ದಾರೆ.

ಶಿರಚ್ಛೇದನದ ವೀಡಿಯೊ ವೈರಲ್ ಆಗಿದ್ದು, ನೂರಾರು ಪ್ರೇಕ್ಷಕರು ಮತ್ತು ಚಲನಚಿತ್ರ ಪ್ರೇಕ್ಷಕರು ತಮ್ಮ ಸೆಲ್ ಫೋನ್‌ಗಳಲ್ಲಿ ಕೃತ್ಯವನ್ನು ಸೆರೆಹಿಡಿದು ಹರ್ಷೋದ್ಗಾರ ಮಾಡುತ್ತಿರುವುದು ಕಂಡುಬಂದಿದೆ. ಆರೋಪಿಗಳಲ್ಲಿ ಒಬ್ಬರು ಪ್ರಾಣಿಯ ಶಿರಚ್ಛೇದ ಮಾಡಲು ಕುಡಗೋಲು ತಂದಿರುವುದು ಕಂಡು ಬಂದಿದೆ. ಪೊಲೀಸರ ಪ್ರಕಾರ, ಬಾಲಕೃಷ್ಣ ಅಭಿನಯದ ಚಲನಚಿತ್ರ ಬಿಡುಗಡೆಯಾದ ಜನವರಿ 12 ರಂದು ಬೆಳಗಿನ ಜಾವ 3 ಗಂಟೆ ಸುಮಾರಿಗೆ ಕುರಿಯನ್ನು ಬಲಿ ನೀಡಲಾಗಿದೆ.

ಆಂಧ್ರಪ್ರದೇಶ ಪ್ರಾಣಿ ಮತ್ತು ಪಕ್ಷಿ ಬಲಿ ನಿಬಂಧನೆ ಕಾಯ್ದೆ, 1950 ರ ಸೆಕ್ಷನ್ 4 ಮತ್ತು 5, 6 ಮತ್ತು 8 ರ ಅಡಿಯಲ್ಲಿ ಸೆಕ್ಷನ್ 3, ಸೆಕ್ಷನ್ 11 (1) ಎ ಮತ್ತು ಸೆಕ್ಷನ್ 11 (1) ಪ್ರಾಣಿಗಳ ಮೇಲಿನ ಕ್ರೌರ್ಯ ತಡೆ ಕಾಯ್ದೆ, 1960 ರ ಸೆಕ್ಷನ್ 2 ಮತ್ತು ಬಿಎನ್‌ಎಸ್ ಕಾಯ್ದೆಯ ಸೆಕ್ಷನ್ 325 ಮತ್ತು 270 ರ ಅಡಿಯಲ್ಲಿ ಪ್ರಕರಣ ದಾಖಲಿಸಲಾಗಿದೆ. ಆದರೆ ಎಲ್ಲಾ ಐವರಿಗೂ ತಕ್ಷಣ ಜಾಮೀನು ನೀಡಲಾಗಿದೆ ಎಂದು ತಿಳಿದು ಬಂದಿದೆ.

English summary

telugu daaku maharaaj film screening before sheep beheading accused arrested.