Ind vs NZ: ಫೀಲ್ಡಿಂಗ್ ಮಾಡುವಾಗ ಗಾಯ! ಕೋಪಗೊಂಡ ರೋಹಿತ್ ಶರ್ಮಾ
ಭಾನುವಾರ ಧರ್ಮಶಾಲಾದ ಹೆಚ್ಪಿಸಿಎ ಕ್ರೀಡಾಂಗಣದಲ್ಲಿ ಭಾರತ ನ್ಯೂಜಿಲೆಂಡ್ ಪಂದ್ಯದ ಸಂದರ್ಭದಲ್ಲಿ ರೋಹಿತ್ ಶರ್ಮಾ ಗಂಭೀರ ಗಾಯಗೊಳ್ಳುವ ಅಪಾಯದಿಂದ ಅದೃಷ್ಟವಶಾತ್ ಪಾರಾಗಿದ್ದಾರೆ. ಭಾರತ ತಂಡದ 10ನೇ ಓವರ್ ನಲ್ಲಿ ಈ ಘಟನೆ ನಡೆಯಿತು.
ಮಿಡ್ ಆಫ್ನಲ್ಲಿ ಫೀಲ್ಡಿಂಗ್ ಮಾಡುತ್ತಿದ್ದ ಅವರು ಚಂಡನ್ನು ನಿಲ್ಲಿಸಲು ಡೈವ್ ಮಾಡಿದ ಸಂದರ್ಭದಲ್ಲಿ ಅವರ ಬೆರಳು ದೇಹ ಮತ್ತು ಅಂಗಳದ ನಡುವೆ ಸಿಕ್ಕಿಕೊಂಡಿತು. ನಂತರ ಅವರು ಔಟ್ಫೀಲ್ಡ್ ಬಗ್ಗೆ ಅಸಮಾಧಾನಗೊಂಡಿದ್ದು ಸ್ಪಷ್ಟವಾಗಿ ಕಾಣಿಸಿತು. ತಕ್ಷಣ ಅವರು ಚಿಕಿತ್ಸೆ ಪಡೆಯಲು ಮೈದಾನದಿಂದ ಹೊರಗಡೆ ನಡೆದರು, ಅವರ ಅನುಪಸ್ಥಿತಿಯಲ್ಲಿ ವಿಕೆಟ್ಕೀಪರ್ ಕೆಎಲ್ ರಾಹುಲ್ ನಾಯಕತ್ವದ ಜವಾಬ್ದಾರಿಯನ್ನು ವಹಿಸಿಕೊಂಡರು. ಎರಡು ಓವರ್ಗಳ ನಂತರ ರೋಹಿತ್ ಮೈದಾನಕ್ಕೆ ಮರಳಿದರು.
ಏಕದಿನ ವಿಶ್ವಕಪ್ನಲ್ಲಿ ಔಟ್ಫೀಲ್ಡ್ ಬಗ್ಗೆ ಈಗಾಗಲೇ ಟೀಕೆ ವ್ಯಕ್ತವಾಗುತ್ತಿದೆ. ಹಲವು ಆಟಗಾರರು ಮೈದಾನದಲ್ಲಿ ಜಾರಿ ಬಿದ್ದು ಗಾಯಗೊಂಡಿದ್ದಾರೆ. ಅದೃಷ್ಟವಶಾತ್ ಯಾರಿಗೂ ಹೆಚ್ಚಿನ ಗಾಯಗಳಾಗಿಲ್ಲ, ಆದರೂ ಆಟಗಾರರು ಮೈದಾನದಲ್ಲಿ ಚೆಂಡನ್ನು ತಡೆಯಲು ಡೈವ್ ಹೊಡೆಯಲು ಭಯಪಡುವಂತಾಗಿದೆ.
Rohit not happy with Dharmshala outfield. pic.twitter.com/zuAZMnPZuM
— Cricketsuperrrfan (@Cricketsup54280) October 22, 2023
ಮೈದಾನದಲ್ಲಿ ಹೆಚ್ಚಿನ ಪ್ರಮಾಣದಲ್ಲಿ ಮರಳು ಬಳಸಿದ್ದು, ಹುಲ್ಲಿನ ಪ್ರಮಾಣ ಕಡಿಮೆಯಿರುವ ಕಾರಣ ಈ ರೀತಿ ಆಗುತ್ತಿದೆ ಎಂದು ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ. ಆದರೂ, ಏಕದಿನ ವಿಶ್ವಕಪ್ನಂತಹ ಪಂದ್ಯಾವಳಿಗಳಲ್ಲಿ ಈ ರೀತಿ ಮಾಡಿದ್ದು, ಟೀಕೆಗೆ ಗುರಿಯಾಗಿದೆ.
ಅದ್ಭುತ ಕ್ಯಾಚ್ ಪಡೆದ ಶ್ರೇಯಸ್ ಅಯ್ಯರ್
ಇನ್ನು ನ್ಯೂಜಿಲೆಂಡ್ ವಿರುದ್ಧದ ಪಂದ್ಯದಲ್ಲಿ ಶ್ರೇಯಸ್ ಅಯ್ಯರ್ ಅದ್ಭುತ ಕ್ಯಾಚ್ ಹಿಡಿದು ಗಮನ ಸೆಳೆದರು. ನ್ಯೂಜಿಲೆಂಡ್ನ ಆರಂಭಿಕ ಆಟಗಾರ ಡಿವಾನ್ ಕಾನ್ವೆ ಅವರನ್ನು ಔಟ್ ಮಾಡಲು ಅಯ್ಯರ್ ಭರ್ಜರಿ ಕ್ಯಾಚ್ ಹಿಡಿದರು. ಅದ್ಭುತ ಕ್ಯಾಚ್ ಹಿಡಿದಿದ್ದಲ್ಲದೆ ರವೀಂದ್ರ ಜಡೇಜಾ ಅವರ 'ಪದಕ' ಸಂಭ್ರಮವನ್ನೂ ಅನುಕರಿಸಿದರು.
ಪಂದ್ಯದ 4ನೇ ಓವರ್ನಲ್ಲಿ ಈ ಘಟನೆ ನಡೆಯಿತು, ಮೊಹಮ್ಮದ್ ಸಿರಾಜ್ ಅವರು ಸ್ಟಂಪ್ನಲ್ಲಿ ಲೆಂಗ್ತ್ ಬಾಲ್ ಬೌಲ್ ಮಾಡಿದರು ಮತ್ತು ಕಾನ್ವೇ ಅದನ್ನು ಫ್ಲಿಕ್ ಮಾಡಲು ಪ್ರಯತ್ನಿಸಿದರು ಆದರೆ ಅದು ಗಾಳಿಯಲ್ಲಿ ಹೋದಾಗ ಫಾರ್ವರ್ಡ್ ಸ್ಕ್ವೇರ್ ಲೆಗ್ನಲ್ಲಿ ಬಲಕ್ಕೆ ಡೈವಿಂಗ್ ಮಾಡಿದ ಅಯ್ಯರ್ ಅದನ್ನು ಹಿಡಿದರು.
ರವೀಂದ್ರ ಜಡೇಜಾ ಅವರು ಬಾಂಗ್ಲಾದೇಶದ ವಿರುದ್ಧದ ಪಂದ್ಯದಲ್ಲಿ ಅದ್ಭುತವಾದ ಕ್ಯಾಚ್ ಪಡೆದ ನಂತರ ವಿಶಿಷ್ಟವಾದ 'ಪದಕ' ಸಂಭ್ರಮವನ್ನು ತಂದರು. ಅವರ ಸಂಭ್ರಮಾಚರಣೆಯು ಭಾರತೀಯ ಡ್ರೆಸ್ಸಿಂಗ್ ರೂಮ್ನಲ್ಲಿ ಇತ್ತೀಚಿನ ಅಭ್ಯಾಸವನ್ನು ಉಲ್ಲೇಖಿಸುತ್ತದೆ, ಅಲ್ಲಿ ಪಂದ್ಯದ ಅತ್ಯುತ್ತಮ ಫೀಲ್ಡರ್ಗೆ ಫೀಲ್ಡಿಂಗ್ ಕೋಚ್ನಿಂದ ಪದಕವನ್ನು ನೀಡಲಾಗುತ್ತದೆ.
ಇದುವರೆಗೆ ವಿರಾಟ್ ಕೊಹ್ಲಿ, ಶಾರ್ದೂಲ್ ಠಾಕೂರ್, ಕೆಎಲ್ ರಾಹುಲ್ ಈ ಪದಕ ಗೆದ್ದಿದ್ದಾರೆ. ಇದೀಗ ಶ್ರೇಯಸ್ ಪದಕದ ಹುಡುಕಾಟದಲ್ಲಿದ್ದಾರೆ.
ಉಭಯ ತಂಡಗಳ ಆಡುವ ಬಳಗ
ಭಾರತ: ರೋಹಿತ್ ಶರ್ಮಾ (ನಾಯಕ), ಶುಭಮನ್ ಗಿಲ್, ವಿರಾಟ್ ಕೊಹ್ಲಿ, ಶ್ರೇಯಸ್ ಅಯ್ಯರ್, ಕೆಎಲ್ ರಾಹುಲ್ (ವಿಕೆಟ್ ಕೀಪರ್), ಸೂರ್ಯಕುಮಾರ್ ಯಾದವ್, ರವೀಂದ್ರ ಜಡೇಜಾ, ಕುಲದೀಪ್ ಯಾದವ್, ಜಸ್ಪ್ರೀತ್ ಬುಮ್ರಾ, ಮೊಹಮ್ಮದ್ ಶಮಿ, ಮೊಹಮ್ಮದ್ ಸಿರಾಜ್
ನ್ಯೂಜಿಲೆಂಡ್ : ಡೆವೊನ್ ಕಾನ್ವೇ, ವಿಲ್ ಯಂಗ್, ರಚಿನ್ ರವೀಂದ್ರ, ಡೇರಿಲ್ ಮಿಚೆಲ್, ಟಾಮ್ ಲ್ಯಾಥಮ್ (ನಾಯಕ/ ವಿಕೆಟ್ ಕೀಪರ್), ಗ್ಲೆನ್ ಫಿಲಿಪ್ಸ್, ಮಾರ್ಕ್ ಚಾಪ್ಮನ್, ಮಿಚೆಲ್ ಸ್ಯಾಂಟ್ನರ್, ಮ್ಯಾಟ್ ಹೆನ್ರಿ, ಲಾಕಿ ಫರ್ಗುಸನ್, ಟ್ರೆಂಟ್ ಬೌಲ್ಟ್.
Click it and Unblock the Notifications
Sign in with Google