ಎಲ್‌ಪಿಜಿ ಪೋರ್ಟಬಲಿಟಿಯೂ ಸಾಧ್ಯ

Published: Thursday, October 3, 2013, 9:51 [IST]

ನವದೆಹಲಿ, ಅ.3 : ಉತ್ತಮ ಸೇವೆ ನೀಡುವ ಮೊಬೈಲ್ ಕಂಪನಿಗಳಿಗೆ ಬದಲಾವಣೆ ಹೊಂದಲು ಪೋರ್ಟಬಲಿಟಿ ಸೇವೆ ಲಭ್ಯವಿದೆ. ಇನ್ನುಮುಂದೆ ಸರಿಯಾಗಿ ಸೇವೆ ನೀಡದ ಗ್ಯಾಸ್‌ ಕಂಪನಿಗಳನ್ನೂ ನೀವು ಗ್ಯಾಸ್‌ ಪೋರ್ಟಬಲಿಟಿ ಯೋಜನೆ ಮೂಲಕ ಬದಲಾವಣೆ ಮಾಡಬಹುದು. ಈ ಯೋಜನೆ ಶೀಘ್ರವೇ ಜಾರಿಗೆ ಬರಲಿದೆ.

ಎಲ್‌ಪಿಜಿ ಪೋರ್ಟಬಲಿಟಿ ಯೋಜನೆ ಬೆಂಗಳೂರು, ಹುಬ್ಬಳ್ಳಿ ಸೇರಿದಂತೆ ದೇಶದ 30 ನಗರಗಳಲ್ಲಿ ಪ್ರಾಯೋಗಿಕವಾಗಿ ಅ.5ರಿಂದ ಜಾರಿಗೆ ಬರಲಿದೆ. ನಿಮ್ಮ ಎಲ್‌ಪಿಜಿ ವಿತರಕರು ಸರಿಯಾದ ಸೇವೆ ನೀಡದಿದ್ದರೆ, ನೀವು ಬೇರೆ ಕಂಪನಿಗೆ ಬದಲಾವಣೆ ಹೊಂದಬಹುದು.

ಸೂಕ್ತ ಸಮಯಕ್ಕೆ ಅಡುಗೆ ಅನಿಲ ಪೂರೈಸುತ್ತಿಲ್ಲ, ಹೆಚ್ಚಿನ ದರ ವಸೂಲಿ ಮಾಡುತ್ತಾರೆ. ಸೂಕ್ತ ಸೇವೆ ನೀಡುವುದಿಲ್ಲ ಎಂಬ ಗ್ರಾಹಕರ ದೂರು ಬಗೆಹರಿಸಲು ಮುಂದಾಗಿರುವ ಕೇಂದ್ರ ಸರ್ಕಾರ 'ಎಲ್‌ಪಿಜಿ ಪೋರ್ಟಬಲಿಟಿ' ಯೋಜನೆ ಜಾರಿಗೆ ತರುತ್ತಿದೆ.

ಈ ಮೂಲಕ ಗ್ರಾಹಕರು ಇನ್ನು ಮುಂದೆ ಸೂಕ್ತ ಸೇವೆ ಒದಗಿಸದ ಡೀಲರ್ ಗಳನ್ನು ಅಥವಾ ಅನಿಲ ಕಂಪನಿಯನ್ನೇ ಬದಲಾಯಿಸಿ, ತಮಗೆ ಬೇಕಾದ ಡೀಲರ್ ಅಥವಾ ಕಂಪನಿಗಳಿಂದ ಸಿಲಿಂಡರ್ ಪಡೆಯಲು ಅವಕಾಶವಿದೆ.

ಪ್ರಾಯೋಗಿಕವಾಗಿ ಕರ್ನಾಟಕದ ಬೆಂಗಳೂರು ಮತ್ತು ಹುಬ್ಬಳ್ಳಿ ಸೇರಿದಂತೆ ದೇಶದ 30 ನಗರಗಳಲ್ಲಿ ಯೋಜನೆ ಜಾರಿಗೆ ಬರುತ್ತಿದೆ. ಯೋಜನೆಗೆ ಸಿಗುವ ಪ್ರತಿಕ್ರಿಯೆ ನಂತರ ದೇಶದ ಇತರ ನಗರಗಳಿಗೂ ಸೇವೆ ವಿಸ್ತರಣೆ ಮಾಡಲು ಪೆಟ್ರೋಲಿಯಂ ಇಲಾಖೆ ನಿರ್ಧರಿಸಿದೆ.

ಪೋರ್ಟಬಲಿಟಿ ಹೇಗೆ : ಈ ಯೋಜನೆ ಮೂಲಕ ವಿತರಕರು ಅಥವಾ ಕಂಪನಿ ಬದಲಾಯಿಸುವ ಗ್ರಾಹಕರು ನೇರವಾಗಿ ವಿತರಕರ ಬಳಿ ತೆರಳಿ ಈ ಕುರಿತು ಅರ್ಜಿ ನೀಡಬಹುದು. ಇಲ್ಲದೇ ಹೋದಲ್ಲಿ ಆನ್‌ಲೈನ್‌ ಮೂಲಕವೇ ಈ ಬೇಡಿಕೆ ಸಲ್ಲಿಸಬಹುದು.

ಆನ್‌ಲೈನ್‌ನಲ್ಲೂ ಡೀಲರ್ ಅಥವಾ ಕಂಪನಿ ಬದಲಿಸುವ ಆಯ್ಕೆಗಳನ್ನು ಒದಗಿಸಲಾಗುತ್ತದೆ. ಅಲ್ಲದೆ ಇಂತಹ ಬೇಡಿಕೆಗಳ ಕುರಿತು ಕಂಪನಿ ಅಥವಾ ಡೀಲರ್ ಗಳು ಯಾವ ಕ್ರಮ ಕೈಗೊಂಡಿದ್ದಾರೆ ಎಂದು ಆನ್‌ಲೈನ್‌ ಮೂಲಕವೇ ಮಾಹಿತಿ ಕಲೆ ಹಾಕಲು ಇಲಾಖೆ ನಿರ್ಧರಿಸಿದೆ.

ಗ್ರಾಹಕರು ಡೀಲರ್ ಅಥವ ಕಂಪನಿಯನ್ನು ಬದಲಾವಣೆ ಮಾಡಲು ಬಯಸಿ ಅರ್ಜಿ ಸಲ್ಲಿಸಿದರೆ, ಅದನ್ನು ತಿರಸ್ಕರಿಸುವಂತಿಲ್ಲ. ಈ ಕುರಿತ ಪ್ರತಿಯೊಂದು ಮಾಹಿತಿಯೂ ಇಲಾಖೆಗೆ ರವಾನೆಯಾಗುತ್ತಿರುತ್ತದೆ. ಹೆಚ್ಚಿನ ಮಾಹಿತಿಗಾರಿ ಪೆಟ್ರೋಲಿಯಂ ಇಲಾಖೆಯ ವೆಬ್ ಸೈಟ್ ಗೆ ಭೇಟಿ ನೀಡಬಹುದು.

Published On October 3, 2013