ಅಭಿಷೇಕ್ ಹತ್ಯೆ ಪ್ರಕರಣ; "ಕಿರಿಕಿರಿ ಮಾಡಿದ್ದಕ್ಕೆ ಕೊಂದೆ" ಎಂದ ಆರೋಪಿ
ಮೈಸೂರು, ಡಿಸೆಂಬರ್ 2: ಅಮೆರಿಕದಲ್ಲಿ ಮೈಸೂರಿನ ವಿದ್ಯಾರ್ಥಿ ಅಭಿಷೇಕ್ನನ್ನು ಗುಂಡಿಕ್ಕಿ ಹತ್ಯೆ ಮಾಡಿದ ಆರೋಪಿಯನ್ನು ಪೊಲೀಸರು ಬಂಧಿಸಿದ್ದಾರೆ. ಆರೋಪಿಯು ಆಫ್ರಿಕಾ ಮೂಲದ ಎರಿಕ್ ಡೆವನ್ ಟರ್ನರ್ (42) ಎಂದು ತಿಳಿದು ಬಂದಿದೆ.
ನವೆಂಬರ್ 28ರಂದು ತನ್ನ ಕೆಲಸ ಮುಗಿಸಿ ಹೋಟೆಲ್ನಿಂದ ತೆರಳುವ ಮುನ್ನ, ಸಮಯ ಮೀರಿದ್ದರಿಂದ ರೂಂ ಖಾಲಿ ಮಾಡುವಂತೆ ಆ ಹೋಟೆಲ್ನಲ್ಲಿ ರೂಂ ಬಾಡಿಗೆಗೆ ಪಡೆದಿದ್ದ ಆರೋಪಿಗೆ ಅಭಿಷೇಕ್ ಇಂಟರ್ ಕಾಮ್ ಫೋನ್ ಮೂಲಕ 2 ರಿಂದ 3 ಬಾರಿ ತಿಳಿಸಿದ್ದ. ಆದರೂ ಎರಿಕ್ ಡೆವನ್ ಟರ್ನರ್ ರೂಂ ಖಾಲಿ ಮಾಡಿರಲಿಲ್ಲ. ಇದರಿಂದ ಅಭಿಷೇಕ್, ರೂಮಿನ ಬಳಿ ಬಂದು ಬೆಲ್ ಮಾಡಿದ್ದರು. ಇದರಿಂದ ಕೋಪಗೊಂಡ ಈತ ಕಿರಿಕಿರಿ ಮಾಡುತ್ತೀಯಾ ಎಂದು ಏಕಾಏಕಿ ಅಭಿಷೇಕ್ ಗೆ ಗುಂಡು ಹೊಡೆದು ಪರಾರಿಯಾಗಿದ್ದ. ಈತನನ್ನು ಪೊಲೀಸರು ಬಂಧಿಸಿರುವುದಾಗಿ ತಿಳಿದುಬಂದಿದೆ. ಕಿರಿಕಿರಿ ಮಾಡಿದ್ದಕ್ಕೆ ಗುಂಡಿಕ್ಕಿ ಹತ್ಯೆ ಮಾಡಿದ್ದೇನೆ ಎಂದು ಬಂಧಿತ ಆರೋಪಿ ಹೇಳಿಕೆ ನೀಡಿದ್ದಾನೆ.
ಗುರುವಾರ ಅಭಿಷೇಕ್ ತಂದೆ, ತಾಯಿ ಹಾಗೂ ಸೋದರ ಅಮೆರಿಕದ ಸ್ಯಾನ್ ಬರ್ನಾಡಿನೋಗೆ ತಲುಪಲಿದ್ದು, ಅಲ್ಲಿಯೇ ಮರಣೋತ್ತರ ಪರೀಕ್ಷೆ ನಂತರ ಅಂತ್ಯಕ್ರಿಯೆ ನಡೆಸಲು ಸಿದ್ಧತೆ ಮಾಡಿಕೊಂಡಿದ್ದಾರೆ. ಈ ಮಧ್ಯೆ ಆರ್ಥಿಕ ಸಂಕಷ್ಟದಲ್ಲಿರುವ ಅಭಿಷೇಕ್ ಕುಟುಂಬಕ್ಕೆ ಅಮೆರಿಕದ ಸ್ನೇಹಿತರು, ಸಂಬಂಧಿಕರು ಹಾಗೂ ಕಾಲೇಜಿನ ಕಡೆಯಿಂದ ದೇಣಿಗೆ ರೂಪದಲ್ಲಿ ಹಣ ಸಂಗ್ರಹ ಮಾಡಲಾಗುತ್ತಿದೆ ಎಂದು ಮೂಲಗಳು ಖಚಿತಪಡಿಸಿವೆ.
Click it and Unblock the Notifications
Sign in with Google