#ಉತ್ತರಕೊಡಿಬಿಎಸ್‌ವೈ : ಸಿದ್ದರಾಮಯ್ಯರಿಂದ ಸಾಲು-ಸಾಲು ಪ್ರಶ್ನೆ!

ಬೆಂಗಳೂರು, ಅಕ್ಟೋಬರ್ 30 : ಬಿ.ಶ್ರೀರಾಮುಲು, ಪ್ರತಾಪ್ ಸಿಂಹ, ಜನಾರ್ದನ ರೆಡ್ಡಿ ಬಳಿಕ ಮಾಜಿ ಮುಖ್ಯಮಂತ್ರಿ ಸಿದ್ದರಾಮಯ್ಯ ಬಿ.ಎಸ್.ಯಡಿಯೂರಪ್ಪ ಅವರನ್ನು ತರಾಟೆಗೆ ತೆಗೆದುಕೊಂಡಿದ್ದಾರೆ. ಕೇಂದ್ರ ಸರ್ಕಾರ ರಾಜ್ಯಕ್ಕೆ ನೀಡಿದ ಕೊಡುಗೆ ಬಗ್ಗೆ ಪ್ರಶ್ನೆಗಳನ್ನು ಕೇಳಿದ್ದಾರೆ.

ಸಿದ್ದರಾಮಯ್ಯ ಅವರು ಮಂಗಳವಾರ ತಮ್ಮ @siddaramaiah ಟ್ವಿಟರ್ ಖಾತೆಯಲ್ಲಿ #ಉತ್ತರಕೊಡಿಬಿಎಸ್‌ವೈ ಎಂಬ ಅಭಿಯಾನ ಆರಂಭಿಸಿದ್ದು, ಯಡಿಯೂರಪ್ಪ ಅವರಿಗೆ ಸಾಲು-ಸಾಲು ಪ್ರಶ್ನೆಗಳನ್ನು ಹಾಕಿದ್ದಾರೆ.

ಉಪ ಚುನಾವಣಾ ಕಾರ್ಯದಲ್ಲಿ ಬ್ಯುಸಿಯಾಗಿರುವ ಸಿದ್ದರಾಮಯ್ಯ ಅವರು ಸಾಮಾಜಿಕ ಜಾಲತಾಣಗಳ ಮೂಲಕವೂ ವಿರೋಧ ಪಕ್ಷದವರಿಗೆ ಉತ್ತರ ಕೊಡುತ್ತಿದ್ದಾರೆ. ಸೋಮವಾರದಿಂದ ಮಾಜಿ ಸಚಿವ ಜನಾರ್ದನ ರೆಡ್ಡಿ ಅವರ ಜೊತೆ ಜಟಾಪಟಿ ನಡೆಸುತ್ತಿದ್ದಾರೆ.

ಕಳೆದ ವಾರ ಶಿವಮೊಗ್ಗದಲ್ಲಿ ಮಧು ಬಂಗಾರಪ್ಪ ಅವರ ಪರವಾಗಿ ಪ್ರಚಾರ ನಡೆಸಿದ್ದ ಸಿದ್ದರಾಮಯ್ಯ ಅವರು, ಯಡಿಯೂರಪ್ಪ ತವರು ನೆಲದಲ್ಲಿ ನಿಂತು, 'ಸುಳ್ಳೇ ಯಡಿಯೂರಪ್ಪ ಮನೆ ದೇವರು' ಎಂದು ಟೀಕಿಸಿದ್ದರು. ಈಗ ಟ್ವಿಟರ್‌ನಲ್ಲಿ ಪ್ರಶ್ನೆಗಳ ಬಾಣ ಬಿಟ್ಟಿದ್ದಾರೆ....

ಕೇಂದ್ರ ಸರ್ಕಾರದ ಎಸ್‌ಡಿಆರ್‌ಎಫ್‌ ಕರ್ನಾಟಕದಲ್ಲಿ ಬರಪರಿಹಾರಕ್ಕಾಗಿ ೫ ವರ್ಷಗಳ ಅವಧಿಗೆ ನಿಗದಿಪಡಿಸಿದ್ದು ಕೇವಲ ರೂ.೧೫೨೭ ಕೋಟಿ, ಮಹಾರಾಷ್ಟ್ರಕ್ಕೆ ರೂ.೮೧೯೫ ಕೋಟಿ,ರಾಜಸ್ತಾನಕ್ಕೆ ರೂ.೬೦೯೪ ಕೋಟಿ, ಮಧ್ಯಪ್ರದೇಶಕ್ಕೆ ರೂ.೪೮೪೭ ಕೋಟಿ, ಗುಜರಾತ್‌ಗೆ ರೂ.೩೩೯೪ ಕೋಟಿ. ಯಾಕೆ ಈ ತಾರತಮ್ಯ @BSYBJP ?#ಉತ್ತರಕೊಡಿಬಿಎಸ್‌ವೈ @INCKarnataka

— Siddaramaiah (@siddaramaiah) October 30, 2018

ಸಿದ್ದರಾಮಯ್ಯ ಪ್ರಶ್ನೆ - 1

ಬರಪರಿಹಾರ ನೀಡುವ ವಿಚಾರದಲ್ಲಿ ಕೇಂದ್ರ ಸರ್ಕಾರ ತಾರತಮ್ಯ ಮಾಡುವುದು ಏಕೆ?, ರಾಜಸ್ಥಾನ, ಗುಜರಾತ್, ಮಹಾರಾಷ್ಟ್ರಕ್ಕೆ ನೀಡಿದ ಅನುದಾನ ಎಷ್ಟು?, ರಾಜ್ಯಕ್ಕೆ ನೀಡಿದ್ದೆಷ್ಟು?

ರೈತರ ಬೆಳೆಯ ಉತ್ಪಾದನಾ ವೆಚ್ಚದ ಮೇಲೆ ಶೇಕಡಾ 50ರಷ್ಟು ಲಾಭ ಬರುವಂತಹ ಬೆಂಬಲ ಬೆಲೆ ನೀಡುವುದಾಗಿ @BJP4India ಲೋಕಸಭಾ‌ ಚುನಾವಣೆಯ ಪ್ರಣಾಳಿಕೆಯಲ್ಲಿ ಘೋಷಿಸಿತ್ತಲ್ಲಾ? ಯಾವ ರೈತರಿಗೆ ಆ ಬೆಲೆ ಸಿಕ್ಕಿದೆ 'ರೈತನಾಯಕ' ಯಡಿಯೂರಪ್ಪನವರೇ?#ಉತ್ತರಕೊಡಿಬಿಎಸ್‌ವೈ @INCKarnataka

— Siddaramaiah (@siddaramaiah) October 30, 2018

ಸಿದ್ದರಾಮಯ್ಯ ಪ್ರಶ್ನೆ - 2

ಲೋಕಸಭಾ ಪ್ರಣಾಳಿಕೆಯಲ್ಲಿ ಘೋಷಿಸಿದ ಬೆಲೆ ಯಾವ ರೈತರಿಗೆ ಸಿಕ್ಕಿದೆ? ರೈತ ನಾಯಕ ಯಡಿಯೂರಪ್ಪ ಅವರೇ ಎಂದು ಯಡಿಯೂರಪ್ಪ ಅವರನ್ನು ಸಿದ್ದರಾಮಯ್ಯ ಪ್ರಶ್ನಿಸಿದ್ದಾರೆ.

ರಾಷ್ಟ್ರೀಕೃತ ಬ್ಯಾಂಕ್‌ಗಳಲ್ಲಿನ ರೈತರ ಸಾಲ ಮನ್ನಾ‌ಮಾಡಿ, ಮಹದಾಯಿ ವಿವಾದ ಬಗೆಹರಿಸಿ, ತಾರತಮ್ಯ‌ಮಾಡದೆ ನಮಗೆ ಬರಪರಿಹಾರ ನೀಡಿ ಎಂದೆಲ್ಲಾ @PMIndiia ಅವರನ್ನು ಕೇಳಿಕೊಂಡೆವು. ಯಾವುದನ್ನೂ ಮಾಡಲಿಲ್ಲ. ಆಗ ಲೋಕಸಭಾ ಸದಸ್ಯರಾಗಿದ್ದ @BSYBJP ನೀವೇನು ಮಾಡಿದ್ದೀರಿ? #ಉತ್ತರಕೊಡಿಬಿಎಸ್‌ವೈ @INCKarnataka

— Siddaramaiah (@siddaramaiah) October 30, 2018

ಸಿದ್ದರಾಮಯ್ಯ ಪ್ರಶ್ನೆ - 3

ರಾಷ್ಟ್ರೀಕೃತ ಬ್ಯಾಂಕ್ ಸಾಲ ಮನ್ನಾ, ಮಹದಾಯಿ ವಿವಾದ, ಬರಪರಿಹಾರ ಯಾವ ವಿಚಾರದಲ್ಲೂ ಸಹಾಯ ಮಾಡಲಿಲ್ಲ. ಸಂಸದರಾಗಿ ನಿವೇನು ಮಾಡಿದ್ದೀರಿ? ಎಂದು ಸಿದ್ದರಾಮಯ್ಯ ಪ್ರಶ್ನೆ ಮಾಡಿದ್ದಾರೆ.

ಪುಸ್ತಕವನ್ನು ಓದಿಕೊಂಡು ಬನ್ನಿ

ಸೋಮವಾರದಿಂದ ಜನಾರ್ದನ ರೆಡ್ಡಿ ಅವರಿಗೆ ಹಲವು ಪ್ರಶ್ನೆಗಳನ್ನು ಸಿದ್ದರಾಮಯ್ಯ ಕೇಳಿದ್ದರು. ಮಂಗಳವಾರವೂ ಮತ್ತೊಂದು ಪ್ರಶ್ನೆ ಕೇಳಿದ್ದಾರೆ.

ಬಿಜೆಪಿ ಕಿತ್ತೊಗೆಯಲು ಕರೆ

ಕೇಂದ್ರದಲ್ಲಿ ಅಧಿಕಾರದಲ್ಲಿರುವ ಬಿಜೆಪಿಯನ್ನು ಕಿತ್ತೊಗೆಯುವ ಹೋರಾಟವನ್ನು ಶಿವಮೊಗ್ಗದ ನೆಲದಿಂದಲೇ ಆರಂಭಿಸೋಣ ಎಂದು ಸಿದ್ದರಾಮಯ್ಯ ಜನರಿಗೆ ಕರೆ ನೀಡಿದ್ದಾರೆ.

English summary

In a series of tweet Former Chief Minister of Karnataka Siddaramaiah asked questions to Karnataka BJP President B.S.Yeddyurappa about central government contribution to state.