ಶಿಥಿಲವಾದ ಅಬ್ಬಿ ತೂಗುಸೇತುವೆ, ಭಯದಲ್ಲಿ ಪ್ರವಾಸಿಗರು
ಮಡಿಕೇರಿ, ಡಿಸೆಂಬರ್, 17: ಕೊಡಗಿನ ಮಡಿಕೇರಿ ಬಳಿ ಇರುವ ಅಬ್ಬಿ ಜಲಪಾತ ನೋಡಲು ಎಷ್ಟು ಸುಂದರವಾಗಿದೆಯೋ ಅಷ್ಟೇ ಅನಾಹುತಕಾರಿಯೂ ಆಗುತ್ತಿದೆ. ಮಳೆಗಾಲದಲ್ಲಿ ಉಗ್ರರೂಪ ತಾಳುವ ಜಲಪಾತ ನಂತರದ ದಿನಗಳಲ್ಲಿ ಸೌಮ್ಯರೂಪ ತಾಳುವ ಇದನ್ನು ನೋಡಲು ಜನರು ಆತಂಕ ಪಡುವಂತಾಗಿದೆ.
ದಿವ್ಯ ಮನೋಹರವಾದ ಈ ಜಲಪಾತದ ಸೌಂದರ್ಯ ಸವಿಯಲು ಬರುವ ಸಾವಿರಾರು ಮಂದಿ ಪ್ರವಾಸಿಗರಿಗೆ ಅನುಕೂಲವಾಗಲೆಂದು, ಜಲಪಾತ ವೀಕ್ಷಿಸುವಾಗ ಯಾವುದೇ ತೊಂದರೆ ಸಂಭವಿಸಬಾರದೆಂಬ ಕಾರಣಕ್ಕೆ ನಿರ್ಮಿಸಲಾದ ತೂಗು ಸೇತುವೆ ಶಿಥಿಲಗೊಂಡಿದ್ದು, ಸೇತುವೆ ಮೇಲೆ ನಡೆದಾಡಲು ಜನರು ಹೆದರುತ್ತಿದ್ದಾರೆ.[ಮುಂಗಾರಿನಲ್ಲಿ ನೋಡ ಬನ್ನಿ ಅಬ್ಬಿ ಜಲಪಾತ...]
ಕೆ.ನಿಡುಗಣೆ ಗ್ರಾಮಪಂಚಾಯಿತಿ ವ್ಯಾಪ್ತಿಗೆ ಬರುವ ಅಬ್ಬಿ ಜಲಪಾತದಲ್ಲಿ ಸ್ನಾನ ಮಾಡಲು ಹೋಗಿ ಇದುವರೆಗೆ ಇಲ್ಲಿನ ಸುಳಿಗೆ ಸಿಲುಕಿ ಸುಮಾರು 52 ಮಂದಿ ಸಾವನ್ನಪ್ಪಿದ್ದಾರೆ. ಹಾಗಾಗಿ ಭದ್ರತೆ ದೃಷ್ಠಿಯಿಂದ ಈ ತೂಗು ಸೇತುವೆ ನಿರ್ಮಿಸಲಾಗಿತ್ತು. ಇದೀಗ ಈ ಸೇತುವೆ ಅಪಾಯತಾಣವಾಗಿ ಗೋಚರಿಸುತ್ತಿರುವುದರಿಂದ ಆದಷ್ಟು ಬೇಗ ಇದರ ದುರಸ್ಥಿ ಕಾರ್ಯ ಕೈಗೊಳ್ಳಬೇಕೆಂಬುದು ಹಲವಾರು ಪ್ರವಾಸಿಗರ ಮನವಿಯಾಗಿದೆ.
ಮೋಹಕ ಜಲಪಾತ:
ಮಡಿಕೇರಿಯಿಂದ ಸುಮಾರು 8 ಕಿ.ಮೀ. ದೂರದಲ್ಲಿರುವ ಅಬ್ಬಿ ಜಲಪಾತ ನಿಜಕ್ಕೂ ಒಂದು ಮೋಹಕ ಜಲಪಾತವೇ... ಈ ಜಲಪಾತ ನೆರವಂಡ ನಾಣಯ್ಯ ಎಂಬುವವರ ಕಾಫಿ, ಏಲಕ್ಕಿ ತೋಟಗಳ ನಡುವೆ ನಿರ್ಮಿತಗೊಂಡಿದೆ.
ಸ್ವಾತಂತ್ರ್ಯ ಪೂರ್ವದಲ್ಲಿ ಇಲ್ಲಿಗೆ ಭೇಟಿ ನೀಡಿದ ಬ್ರಿಟೀಷರು ಇದರ ಸೌಂದರ್ಯವನ್ನು ನೋಡಿ ಆನಂದಪಟ್ಟು ಕೊಡಗಿನ ಪ್ರಥಮ ಧರ್ಮಗುರುಗಳ ಮಗಳು ಜೆಸ್ಸಿಯ ಹೆಸರನ್ನು ಈ ಜಲಪಾತಕ್ಕೆ ಇಟ್ಟು 'ಜೆಸ್ಸಿ ಫಾಲ್ಸ್' ಎಂದು ಕರೆದಿದ್ದರು.[ಕೊಡಗಿನಲ್ಲೊಂದು ಗುಡಿಗೋಪುರವಿಲ್ಲದ ದೇಗುಲ!]
ಸ್ಥಳೀಯರು ಹಿಂದೆ ಇದನ್ನು 'ಮಡಿಕೇರಿ ತೊರೆ', 'ಮುತ್ತಾರ್ ಮುಟ್ಟು ತೊರೆ' ಎಂದು ಕರೆಯುತ್ತಿದ್ದರು ಎನ್ನಲಾಗಿದೆ. ಕೊಡವ ಭಾಷೆಯಲ್ಲಿ 'ಅಬ್ಬಿ' ಎಂದರೆ ತೊರೆ ಎಂದರ್ಥ. ಕೊಡವ ಭಾಷೆಯ ಅಬ್ಬಿ ಇಂದು ಅಬ್ಬಿ ಫಾಲ್ಸ್ ಆಗಿದೆ.
Click it and Unblock the Notifications
Sign in with Google