2015ರಿಂದ ಎಸೆಸ್ಸೆಲ್ಸಿಯಲ್ಲಿ 'ಕ್ಲಾಸ್' ಬದಲಿಗೆ 'ಗ್ರೇಡ್'

ಬೆಂಗಳೂರು, ಜ.2: ಎಸ್.ಎಸ್.ಎಲ್.ಸಿ ಪರೀಕ್ಷೆಯಲ್ಲಿ ಇನ್ಮುಂದೆ ಫಸ್ಟ್, ಸೆಕೆಂಡು, ಥರ್ಡ್ ಕ್ಲಾಸ್ ತೆಗೆದುಕೊಳ್ಳಲು ಸಾಧ್ಯವಿಲ್ಲ. ಇಡೀ ವ್ಯವಸ್ಥೆಯನ್ನು ಕರ್ನಾಟಕ ರಾಜ್ಯ ಪರೀಕ್ಷಾ ಮಂಡಳಿ(ಕೆಎಸ್ ಇಇಬಿ) ಬದಲಾಯಿಸಲು ನಿರ್ಧರಿಸಿದೆ. ಕ್ಲಾಸ್ ಬದಲಿಗೆ ಗ್ರೇಡಿಂಗ್ ವ್ಯವಸ್ಥೆ ಇನ್ಮುಂದೆ ಜಾರಿಯಲ್ಲಿರುತ್ತದೆ.

2015ರಿಂದ ಎಸ್ ಎಸ್ ಎಲ್ ಸಿ ವಿದ್ಯಾರ್ಥಿಗಳಿಗೆ ಪ್ರಥಮ ದರ್ಜೆ ಬದಲಿಗೆ ಶ್ರೇಣಿಗಳನ್ನು ನೀಡಲಾಗುತ್ತದೆ. ಮಾರ್ಚ್ 30 ರಿಂದ ಏಪ್ರಿಲ್ 13, 2015ರ ತನಕ ಪರೀಕ್ಷೆಗಳು ನಡೆಯಲಿದೆ. [ಎಸ್‌ಎಸ್ಎಲ್‌ಸಿ ಪರೀಕ್ಷೆ ವೇಳಾಪಟ್ಟಿ ಪ್ರಕಟ]

ಇನ್ಮುಂದೆ A+, A, B+, B, C+ ಹಾಗೂ C ಎಂದು ಸಿಬಿಎಸ್ ಸಿ ಹಾಗೂ ಐಸಿಎಸ್ ಇ ಮಾದರಿಯಲ್ಲೇ ಶ್ರೇಣಿಗಳನ್ನು ನೀಡಲಾಗುತ್ತದೆ. ಈಗಾಗಲೇ ಕರ್ನಾಟಕದಲ್ಲಿ ಶ್ರೇಯಾಂಕ(rank) ಪದ್ಧತಿ ರದ್ದಾಗಿದೆ. ಹೊಸ ಗ್ರೇಡಿಂಗ್ ಪದ್ಧತಿಗೆ ಸರ್ಕಾರ ಒಪ್ಪಿಗೆ ಸೂಚಿಸಿದೆ.

ಮತ್ತೊಂದು ವ್ಯವಸ್ಥೆ: ಪರೀಕ್ಷಾ ಕ್ರಮದ ಪರಿಷ್ಕರಣೆಗೆ ಬೆಂಗಳೂರಿನ ಎಂ.ಇ.ಎಸ್ ಶಿಕ್ಷಕರ ಕಾಲೇಜಿನ ಪ್ರಾಂಶುಪಾಲ ಡಾ.ಗಣೇಶ್ ಭಟ್ ನೇತೃತ್ವದ ತಜ್ಞರ ಉಪಸಮಿತಿಯನ್ನು ಸರ್ಕಾರ ರಚಿಸಿತ್ತು.

10 ಜನರನ್ನೊಳಗೊಂಡ ಈ ಸಮಿತಿ ಎಸ್.ಎಸ್.ಎಲ್.ಸಿಯ ಆರು ವಿಷಯಗಳಿಗೆ ಇರುವ 625 ಅಂಕಗಳಲ್ಲಿ ಶೇ.80ರಷ್ಟು ಅಂಕಗಳಿಗೆ ಮಾತ್ರ ಲಿಖಿತ ಪರೀಕ್ಷೆ ನಡೆಸಿ ಉಳಿದ ಶೇ.20 ಅಂಕಗಳಿಗೆ ಇಂಟರ್ನಲ್ ನಡೆಸುವಂತೆ ಶಿಫಾರಸು ಮಾಡಿತ್ತು. ಹೀಗಾಗಿ, 2015ನೇ ಸಾಲಿನಿಂದ ಎಸ್.ಎಸ್.ಎಲ್.ಸಿಗೆ 80 ಅಂಕಗಳ ಪರೀಕ್ಷೆ ನಡೆಯಲಿದ್ದು, ಇನ್ನುಳಿದ 20 ಅಂಕಗಳಿಗೆ ಆಂತರಿಕ ಮೌಲ್ಯಮಾಪನ(ಇಂಟರ್ನಲ್) ನಡೆಯಲಿದೆ. [ಹೊಸ ಪರೀಕ್ಷಾ ಪದ್ದತಿ ವರದಿಯಲ್ಲೇನಿದೆ?]

ಗ್ರೇಡ್‌ ಹೇಗೆ ನೀಡಲಾಗುತ್ತದೆ ?
100 ಅಂಕ ಮತ್ತು 125 ಅಂಕಗಳಿಗೆ ಈ ಕೆಳಕಂಡಂತೆ ಗ್ರೇಡ್ ನೀಡಲಾಗುತ್ತದೆ. ಆವರಣದ ಒಳಗಡೆ ಇರುವುದು 125 ಅಂಕಗಳ ಗ್ರೇಡ್‌‌. 90-100 (112-125) ಅಂಕಗಳಿಗೆ 'ಎ+' ಗ್ರೇಡ್‌, 80-89 (100-111) ಅಂಕಗಳಿಗೆ 'ಎ' ಗ್ರೇಡ್‌, 70-79 (87-99) ಅಂಕಗಳಿಗೆ 'ಬಿ+' ಗ್ರೇಡ್‌‌, 60-69(75-86) ಅಂಕಗಳಿಗೆ ' ಬಿ' ಗ್ರೇಡ್‌, 50-59(62-74) ಅಂಕಗಳಿಗೆ 'ಸಿ+' ಗ್ರೇಡ್‌, 30-49(38-61) ಅಂಕಗಳಿಗೆ 'ಸಿ' ಗ್ರೇಡ್‌ ನೀಡಲಾಗುತ್ತದೆ.

562- 625 ಅಂಕಗಳಿಗೆ 'ಎ+' ಗ್ರೇಡ್‌, 500-561 ಅಂಕಗಳಿಗೆ 'ಎ' ಗ್ರೇಡ್‌, 437-499 ಅಂಕಗಳಿಗೆ 'ಬಿ+' ಗ್ರೇಡ್‌‌, 375-436 ಅಂಕಗಳಿಗೆ ' ಬಿ' ಗ್ರೇಡ್‌, 312-374 ಅಂಕಗಳಿಗೆ 'ಸಿ+' ಗ್ರೇಡ್‌, 219-311 ಅಂಕಗಳಿಗೆ 'ಸಿ' ಗ್ರೇಡ್‌ ನೀಡಲಾಗುತ್ತದೆ.

English summary

Karnataka Secondary Education Examination Board (KSEEB), Bengaluru has decided to introduce grading system for Secondary School Leaving Certificate (SSLC) examinations from 2015.