ಪಾಳಿ ಬದಲಾಯಿಸಿದರೆ ಮಿದುಳು ಮುದಿಯಾಗುತ್ತೆ

ಕಚೇರಿಯಲ್ಲಿ ನಿರಂತರವಾಗಿ ಕೆಲಸದ ಪಾಳಿ ಬದಲಾಯಿಸುತ್ತಿದ್ದೀರಾ? ಹಾಗಿದ್ದರೆ ನಿಮ್ಮ ಮಿದುಳು ನೈಜ ವಯಸ್ಸಿಗಿಂತ 6.5 ವರ್ಷ ಹೆಚ್ಚು ಮುದಿಯಾಗುತ್ತದೆ..!

ಆತಂಕವಾಯಿತೇ..? ಹೌದು, ಅಧ್ಯಯನವೊಂದರ ಪ್ರಕಾರ ಕಚೇರಿಯಲ್ಲಿ ಕನಿಷ್ಠ 10 ವರ್ಷಗಳ ಕಾಲ ನಿರಂತರವಾಗಿ ಕೆಲಸದ ಪಾಳಿ ಬದಲಾಯಿಸುವವರು ಮಾನಸಿಕ ಸಂವೇದನಾ ಶಕ್ತಿ ಹಾಗೂ ದೈಹಿಕ ಆರೋಗ್ಯವನ್ನು ವೇಗವಾಗಿ ಕಳೆದುಕೊಳ್ಳುತ್ತಿದ್ದಾರೆ. ಅಲ್ಲದೆ, ಇಂತವರಿಗೆ ಕ್ಯಾನ್ಸರ್, ಹೃದಯಾಘಾತ, ಪಾರ್ಶ್ವವಾಯು, ಆಲ್ಸರ್, ಡಯಾಬಿಟೀಸ್ ಸೇರಿದಂತೆ ಅಜೀರ್ಣ ಸಮಸ್ಯೆ ಹೆಚ್ಚಾಗುತ್ತಿದೆ.

ಈ ಕುರಿತು ಫ್ರಾನ್ಸ್ ದೇಶದ ವಿಶ್ವವಿದ್ಯಾಲಯವೊಂದರ ವಿದ್ಯಾರ್ಥಿಗಳು ಮೂರು ಸಾವಿರ ಜನರನ್ನು 1996, 2001 ಹಾಗೂ 2006ರಲ್ಲಿ ಅಧ್ಯಯನಕ್ಕೊಳಪಡಿಸಿದ್ದು, ಮಿದುಳಿನ ಆರೋಗ್ಯದ ಕುರಿತು ಎಚ್ಚರಿಕೆ ನೀಡಿದೆ.

ರಾತ್ರಿ ಅಥವಾ ಬೆಳಗ್ಗಿನ ಪಾಳಿಯಲ್ಲಿ ದುಡಿದವರಲ್ಲಿ ನೆನಪಿನ ಶಕ್ತಿ ಹಾಗೂ ಯೋಚಿಸುವ ವೇಗ ಸೇರಿದಂತೆ ಒಟ್ಟು ಮಿದುಳಿನ ಸಾಮರ್ಥ್ಯವು ಸಾಮಾನ್ಯ ಪಾಳಿ (ಬೆಳಗ್ಗೆ 8ರಿಂದ ಸಂಜೆ 6)ಯಲ್ಲಿ ಕೆಲಸ ಮಾಡಿದವರಿಗಿಂತ ಕಡಿಮೆ ಕಂಡುಬಂದಿದೆ. ಅಲ್ಲದೆ, ಆಗಾಗ ಬೆಳಗ್ಗೆ, ಸಾಮಾನ್ಯ ಹಾಗೂ ರಾತ್ರಿ ಪಾಳಿಯನ್ನು ನಿರಂತರವಾಗಿ 10 ವರ್ಷ ಬದಲಾಯಿಸುತ್ತ ಕೆಲಸ ಮಾಡಿದವರಲ್ಲಿಯೂ ಈ ಸಮಸ್ಯೆ ಕಂಡುಬಂದಿದೆ.

ಅಷ್ಟೇ ಅಲ್ಲ, ಅನಿಯಮಿತ ಪಾಳಿಯಲ್ಲಿ ಕೆಲಸ ಮಾಡಿದವರು ಸಾಮಾನ್ಯ ಸಮಯಕ್ಕೆ ಬದಲಾದರೂ ಸುಧಾರಿಸಿಕೊಳ್ಳಲು ಕನಿಷ್ಠ ಐದು ವರ್ಷಗಳೇ ಬೇಕಾದವು. ಪಾಳಿ ಕೆಲಸ ಬದಲಾವಣೆಯಿಂದ ವೈಯಕ್ತಿಕ ಆರೋಗ್ಯವಷ್ಟೇ ಅಲ್ಲದೆ, ಸಮಾಜದಲ್ಲಿಯೂ ಅಸಹನೆ ಹೆಚ್ಚಾಗುತ್ತಿದೆ ಎಂದು ಸಮೀಕ್ಷೆಯಲ್ಲಿ ಭಾಗವಹಿಸಿದವರು "Occupational and Environmental Medicine" ಜರ್ನಲ್ ನಲ್ಲಿ ತಿಳಿಸಿದ್ದಾರೆ.

English summary

Regularly changing the work shift may reduce the power memory, speed of processing information and overall brain power. One of the university of France made research for a decade and proved the affect.