ಬೆಂಗಳೂರು ಏರ್‌ಪೋರ್ಟ್‌: 43 ಮಿಲಿಯನ್ ಪ್ರಯಾಣಿಕರ ಸಂಚಾರ, ಸರಕು ಸಾಗಾಣೆಯಲ್ಲೂ ದಾಖಲೆ

ಬೆಂಗಳೂರು: ಜಾಗತಿಕವಾಗಿ ಮೆಚ್ಚುಗೆ ಪಡೆದ ಹಾಗೂ ಹಲವು ಪ್ರಶಸ್ತಿಗಳನ್ನು ಮುಡಿಗೇರಿಸಿಕೊಂಡಿರುವ ಬೆಂಗಳೂರು ಕೆಂಪೇಗೌಡ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣವು 2025 ರಲ್ಲಿ ಪ್ರಯಾಣಿಕ ಮತ್ತು ಸರಕು ಸಾಗಣೆ ಎರಡರಲ್ಲೂ ದಾಖಲೆಯ ಬೆಳವಣಿಗೆ ಸಾಧಿಸಿದೆ. ಅಲ್ಲದೇ ದೇಶಿಯ ವಿಮಾನಗಳ ಸಂಖ್ಯೆ ಹೆಚ್ಚಿಸಿಕೊಳ್ಳುವ ಮೂಲಕ ಮೂರನೇ ಸ್ಥಾನದಿಂದ ಎರಡನೇ ಸ್ಥಾನಕ್ಕೆ ಜಿಗಿದೆ. ಹೀಗೆ ಪ್ರತಿ ವರ್ಷ ಪ್ರಯಾಣಿಕರ ಒತ್ತಡ ಹೆಚ್ಚಾಗುವ ಕಾರಣಕ್ಕೆನೇ ಬೆಂಗಳೂರು ಎರಡನೇ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣ ಯೋಜನೆ ಮುನ್ನೆಲೆ ಬರುತ್ತದೆ.

ದೇವನಹಳ್ಳಿಯ ಬೆಂಗಳೂರು ಏರ್‌ಪೋರ್ಟ್ ನಿಂದ ಕಳೆದ ವರ್ಷ 2025ರಲ್ಲಿ 4.3 ಕೋಟಿ (43.82 ಮಿಲಿಯನ್) ಪ್ರಯಾಣಿಕರು ಸಂಚಾರ ಮಾಡಿದ್ದಾರೆ. ಈ ಮೂಲಕ ವಾರ್ಷಿಕ ಪ್ರಯಾಣಿಕರ ಸಂಖ್ಯೆಯು ಶೇಕಡಾ 8ರಷ್ಟು ಹೆಚ್ಚಾಗಿದೆ. ಒಟ್ಟು ಪ್ರಯಾಣಿಕರದಲ್ಲಿ ಒಂದೇ ವರ್ಷದಲ್ಲಿ ಅಂತಾರಾಷ್ಟ್ರೀಯ ಪ್ರಯಾಣಿಕರ ಸಂಖ್ಯೆ ವರ್ಷದಿಂದ ವರ್ಷಕ್ಕೆ ಶೇಕಡಾ 28.7ರಷ್ಟು ಹೆಚ್ಚಾಗಿದೆ. ಸರಕು ಸಾಗಾಣೆಯಲ್ಲೂ ಮಹತ್ವದ ಮೈಲಿಗಲ್ಲು ಸಾಧಿಸಿದೆ.

ಪ್ರಯಾಣಿಕರ ಸಂಚಾರದ ಜೊತೆಗೆ ಅಂತಾರಾಷ್ಟ್ರೀಯ ನಿರ್ಗಮನಗಳು 38 ರಿಂದ 51ಕ್ಕೆ ಹೆಚ್ಚಾಗಿದೆ. ಅಕ್ಟೋಬರ್ 2025 ರಲ್ಲಿ ದೇಶೀಯ ವಿಮಾನಗಳ ಸಂಖ್ಯೆಯಲ್ಲಿ ಭಾರತೀಯ ವಿಮಾನ ನಿಲ್ದಾಣಗಳಲ್ಲಿ 3 ನೇ ಸ್ಥಾನದಲ್ಲಿ ಕೆಐಎ 2 ನೇ ಸ್ಥಾನಕ್ಕೆ ಜಿಗಿದಿದೆ. ಪ್ರತಿ ವಲಯದಲ್ಲೂ ತನ್ನ ಬೆಳವಣಿಗೆ ದಾಖಲಿಸಿದೆ.

ಒಂದೇ ದಿನ ದಾಖಲೆಯ ಪ್ರಯಾಣಿಕರ ಸಂಚಾರ

2025 ನವೆಂಬರ್ 23 ರಂದು ವರ್ಷದ ಗರಿಷ್ಠ ಪ್ರಯಾಣಿಕರು ಒಂದೇ ದಿನ ಸಂಚಾರ ಮಾಡಿದ್ದಾರೆ. ಅಂದು ಬೆಂಗಳೂರು ಏರ್‌ಪೋರ್ಟ್‌ನಿಂದ ಬರೋಬ್ಬರಿ 1,37,317 ಪ್ರಯಾಣಿಕರು ಸಂಚಾರ ಮಾಡಿದ್ದು ದಾಖಲೆಯಾಗಿದೆ. ಅಕ್ಟೋಬರ್ 19, ಗರಿಷ್ಠ 837 ವಾಯು ಸಂಚಾರ ಚಲನೆಗಳು (ಎಟಿಎಂಗಳು) ಆಗಿವೆ. 520,985 ಟನ್‌ಗಳನ್ನು ನಿರ್ವಹಣೆ ಮೂಲಕ ವರ್ಷದಿಂದ ವರ್ಷಕ್ಕೆ ಶೇಕಡಾ 5ರಷ್ಟು ಬೆಳವಣಿಗೆ ಸಾಧಿಸಲಾಗಿದೆ.

ಸರಕು ಸಾಗಾಣೆಯಲ್ಲಿ ಸಾರ್ವತ್ರಿಕ ದಾಖಲೆ

ಬೆಂಗಳೂರು ಏರ್‌ಪೋರ್ಟ್ ಒಂದೇ ದಿನದಲ್ಲಿ ಸರಕು ಸಾಗಾಣೆಯಲ್ಲೂ ಸಾರ್ವತ್ರಿಕ ದಾಖಲೆ ಬರೆದಿದೆ. ಇದುವರೆಗಿನ ಸರಕು ಸಾಗಾಣೆ ಪೈಕಿ 2025ರಲ್ಲಿ ಅತ್ಯಧಿಕ 2,207 ಟನ್‌ಗಳ ಸರಕು ಸಾಗಣೆ ಮಾಡಲಾಗಿದೆ. ಬೆಂಗಳೂರಿನಿಂದ ಒಟ್ಟು 10 ಹೊಸ ಮಾರ್ಗಗಳಲ್ಲಿ ಹೊಸದಾಗಿ ವಿಮಾನ ಸಂಚಾರ ಮಾಡಲಾಗಿದೆ. ಇದರಲ್ಲಿ 5 ದೇಶೀಯ ಮತ್ತು 5 ಅಂತಾರಾಷ್ಟ್ರೀಯ ಮಾರ್ಗಗಳು ಸೇರಿವೆ.

ಎರಡನೇ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣಕ್ಕೆ ಒತ್ತು

ಹಾಲಿ ಬೆಂಗಳೂರು ವಿಮಾನ ನಿಲ್ದಾಣವು ವಾರ್ಷಿಕವಾಗಿ ಎದುರಿಸುತ್ತಿರುವ ಪ್ರಯಾಣಿಕರ ಒತ್ತಡ ನೋಡಿದರೆ ರಾಜ್ಯ ಸರ್ಕಾರ ಬೆಂಗಳೂರು ಎರಡನೇ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣ (Bengaluru Second International Airport) ಯೋಜನೆಗೆ ಹೆಚ್ಚಿನ ಒತ್ತು ನೀಡಬೇಕಾದ ಅಗತ್ಯತೆ ಎಷ್ಟಿದೆ ಎಂದು ಗೊತ್ತಾಗುತ್ತದೆ. ಪ್ರತಿ ವರ್ಷವು ಪ್ರಯಾಣಿಕರ ಸಂಖ್ಯೆಯಲ್ಲಿ ಹೆಚ್ಚಾಗುತ್ತಿದೆ. ಸರಕು ಸೇವೆ ಇತರ ಸೇವೆಗಳಲ್ಲೂ ಒತ್ತಡ ಎದುರಿಸಿದ್ದು ಮೇಲಿನ ಅಂಕಿ ಸಂಖ್ಯೆಗಳಿಂದ ತಿಳಿದು ಬರುತ್ತದೆ. ಇದನ್ನು ಕಡಿಮೆ ಮಾಡಲೆಂದೆ ರಾಜ್ಯ ಸರ್ಕಾರ ಬೆಂಗಳೂರು ನಗರ ಸಮೀಪವೇ ಭಾಗದಲ್ಲಿ ಎರಡನೇ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣ ನಿರ್ಮಾಣಕ್ಕೆ ಮುಂದಾಗಿದೆ. ಸದ್ಯ ಇದರ ಪ್ರಸ್ತಾವನೆ ಸದ್ಯಕ್ಕಿಲ್ಲ ಎಂದು ಕೇಂದ್ರ ತಿಳಿಸಿದ ಬೆನ್ನಲ್ಲೆ ಯೋಜನೆಗೆ ವೇಗ ತಗ್ಗಿದೆ. ಆದರೆ ರಾಜ್ಯ ಸರ್ಕಾರ ಜಾಗ ಅಂತಿಮಗೊಳಿಸುವಲ್ಲಿ ಕಾರ್ಯ ನಿರತವಾಗಿದೆ.