ನೀರಿನ ಬೆಲೆ ಏರಿದೆ, ವಿವರಗಳು ಇಲ್ಲಿದೆ

ಬೆಂಗಳೂರು, ನ.3 : ಬೆಂಗಳೂರು ನೀರು ಸರಬರಾಜು ಮತ್ತು ಒಳಚರಂಡಿ ಮಂಡಳಿ ಭಾನುವಾರ ನೀರಿನ ದರವನ್ನು ತಕ್ಷಣದಿಂದ ಜಾರಿಗೆ ಬರುವಂತೆ ಏರಿಕೆ ಮಾಡಿ ಆದೇಶ ಹೊರಡಿಸಿದೆ. ಶಾಪಿಂಗ್ ಮಾಲ್‌ಗಳಿಗೆ ಮತ್ತು ಸೂಪರ್ ಬಜಾರ್‌ಗಳಿಗೆ ವಿಶೇಷ ಒಳಚರಂಡಿ ಶುಲ್ಕಗಳನ್ನು ವಿಧಿಸಲಾಗಿದೆ.

ಬೆಂಗಳೂರು ಜಲಮಂಡಳಿ ಕಳೆದ ಕೆಲವು ತಿಂಗಳ ಹಿಂದೆ ಸಲ್ಲಿಸಿದ್ದ ದರ ಏರಿಕೆ ಪ್ರಸ್ತಾಪಕ್ಕೆ ರಾಜ್ಯ ಸರ್ಕಾರ ಒಪ್ಪಿಗೆ ನೀಡಿದೆ. ಆದ್ದರಿಂದ ಗೃಹಪಯೋಗಿ ಮತ್ತು ವಾಣಿಜ್ಯ ಉದ್ದೇಶ ಬಳಸುವ ನೀರಿನ ದರವನ್ನು ತಕ್ಷಣದಿಂದಲೇ ಜಾರಿಗೆ ಬರುವಂತೆ ಏರಿಕೆ ಮಾಡಲಾಗಿದೆ. [ಕಾವೇರಿ ನೀರಿನ ದರ ಏರಿಕೆ ಶಾಕ್]

ನೀರಿನ ದರದ ಜೊತೆಗೆ ಒಳಚರಂಡಿ ದರವನ್ನು ಪರಿಷ್ಕರಣೆ ಮಾಡಲಾಗಿದೆ. ಮೊದಲ ಬಾರಿಗೆ ಶಾಪಿಂಗ್ ಮಾಲ್‌ಗಳು ಮತ್ತು ಸೂಪರ್‌ ಬಜಾರ್‌ಗಳಿಗೆ ವಿಶೇಷ ಒಳಚರಂಡಿ ದರಗಳನ್ನು ವಿಧಿಸಲಾಗಿದೆ. ಹೋಟೆಲ್‌ಗಳು ಪ್ರತಿ ತಿಂಗಳು 500 ರೂ. ಬದಲು 2000 ರೂ.ಗಳ ವಿಶೇಷ ಒಳಚರಂಡಿ ಶುಲ್ಕಗಳನ್ನು ಪಾವತಿ ಮಾಡಬೇಕಾಗಿದೆ.

ಕಳೆದ ಒಂಬತ್ತು ವರ್ಷಗಳ ಬಳಿಕ ದರ ಏರಿಕೆ ಮಾಡಿರುವ ತನ್ನ ನಿರ್ಧಾರವನ್ನು ಜಲಮಂಡಳಿ ಸಮರ್ಥಿಸಿಕೊಂಡಿದ್ದು, ವಿದ್ಯುತ್ ದರ ಏರಿಕೆ, ಕಾಮಗಾರಿಗಳಿಗೆ ಅನುದಾನದ ಅಗತ್ಯವಿರುವ ಹಿನ್ನಲೆಯಲ್ಲಿ ದರ ಏರಿಕೆ ಅನಿವಾರ್ಯವಾಗಿತ್ತು ಎಂದು ಹೇಳಿದೆ.

ಗೃಹ ಬಳಕೆ ನೀರಿನ ದರ ಪಟ್ಟಿ
ಬಳಕೆ ಪ್ರಮಾಣ	ಹಳೇ ದರ	ಹೊಸ ದರ
0-8000 ಲೀಟರ್	6 ರೂ.	7 ರೂ.
8000-25000	9 ರೂ.	11 ರೂ.
25000-50000	15 ರೂ.	26 ರೂ.
50000-75000	30 ರೂ.	45 ರೂ.
ಗೃಹೇತರ ನೀರಿನ ಬಳಕೆ ದರ
0-10000 ಲೀ	36 ರೂ.	50 ರೂ.
10000-25000 ಲೀ	39 ರೂ.	57 ರೂ.
25000-50000 ಲೀ	44 ರೂ.	65 ರೂ.
50000-75000 ಲೀ	51 ರೂ.	76 ರೂ.
75000 ಲೀ ನಂತರ	57 ರೂ.	87 ರೂ.

ಒಳಚರಂಡಿ ದರ
ಬಳಕೆ ಪ್ರಮಾಣ	ಹಳೇ ದರ	ಹೊಸ ದರ
ಎಲ್ಲಾ ರೀತಿಯ ಹೋಟೆಲ್	500 ರೂ.	2000 ರೂ.
ದರ್ಶಿನಿ, ಕೆಫೆಟೇರಿಯಾ, ಕಾಫಿಬಾರ್	500 ರೂ.	1000 ರೂ.
51ರಿಂದ 100 ಕೊಠಡಿಯ ಸ್ಟಾರ್ ಹೋಟೆಲ್	10000 ರೂ.	15000 ರೂ.
50ಕ್ಕಿಂತ ಕಡಿಮೆ ಕೊಠಡಿಗಳ ಹೋಟೆಲ್‌ ದರಗಳಲ್ಲಿ ಯಾವುದೇ ಬದಲಾವಣೆ ಇಲ್ಲ
100ಕ್ಕಿಂತ ಹೆಚ್ಚು ಕೊಠಡಿಗಳು	10000 ರೂ.	20000 ರೂ.

English summary

After 9 years The Bangalore Water Supply and Sewerage Board (BWSSB) increased water and sanitary charges. New tariff of both domestic and commercial connections come to effect form November 2.