ಮಂಗಳೂರು: ಛೇ, ಸಾವು ಹೀಗೂ ಬರುತ್ತದಾ?

ಮಂಗಳೂರು, ಫೆ.25: ಛೇ! ಸಾವು ಯಾವ ರೂಪದಲ್ಲಾದರೂ ಬರಬಹುದು ಅನ್ನುವುದಕ್ಕೆ ಇದು ನಿದರ್ಶನ. ಆದರೆ ಅಪ್ಪನ ಎದುರೇ ಆಟವಾಡುತ್ತಿದ್ದ ಮಗು ಸಾವಿಗೀಡಾಗಿರುವುದು ನಿಜಕ್ಕೂ ಹೃದಯಕಲಕುವಂತಿದೆ.

ಕೊಣಾಜೆಯ ಕೈರಂಗಲಾ ಗ್ರಾಮದಲ್ಲಿ ಆನೆಗುಂಡಿ ಸಮೀಪ ಕೃಷಿಕ ಆನಂದ ಮೂಲ್ಯ ಅವರ ತೋಟದಲ್ಲಿ ಭಾನುವಾರ ಈ ದುರಂತ ಸಂಭವಿಸಿದೆ. ಏನಾಯಿತೆಂದರೆ ಆನಂದ್ ತೋಟದಲ್ಲಿ ಹಳೆಯದಾದ ತೆಂಗಿನ ಮರವೊಂದಿತ್ತು. ಅದು ಪೂರ್ತಿ ಒಣಗಿಹೋಗಿತ್ತು.

ಆದರೆ ಆನಂದ್ ಆ ಮರಕ್ಕೆ ಕರಿ ಮೆಣಿಸಿನ ಬಳ್ಳಿಗಳನ್ನು ಹಬ್ಬಿಸಿದ್ದರು. ಸರಿ ನಿನ್ನೆ ಭಾನುವಾರ ಕರಿಮೆಣಸು ಕೀಳೋಣವೆಂದು ಒಣಕಲು ಮರಕ್ಕೆ ಏಣಿ ಹಾಕಿ ಹತ್ತಿದ್ದಾರೆ. ಆದರೆ ಭಾರಕ್ಕೆ ಆ ಮರ ಬಿದ್ದುಹೋಗಿದೆ. ಹಾಗೆ ಬಿದ್ದ ಮರವು ಕೆಳಗೆ ಆಟವಾಡುತ್ತಿದ್ದ ಆನಂದ್ ಅವರ ಆರು ವರ್ಷದ ಪುತ್ರ ವಿಷ್ಣುಪ್ರಸಾದ್ ಮೇಲೆ ಬಿದ್ದಿದೆ. ಮಗುವಿಗೆ ಆ ಹೊಡೆತ ತಾಳಲಾಗಿಲ್ಲ. ಅದು ತೀವ್ರವಾಗಿ ಗಾಯಗೊಂಡಿದೆ.

ತಕ್ಷಣ ಮಗುವನ್ನು ಆಸ್ಪತ್ರೆಗೆ ಸೇರಿಸಿದ್ದಾರೆ. ಆದರೆ ಆ ವೇಳೆಗಾಗಲೆ ಮಗುವಿನ ಪ್ರಾಣಪಕ್ಷಿ ಹಾರಿಹೋಗಿದೆ.

English summary

Mangalore- son Dies after Coconut Tree Falls over as Father Climbs up. In a freak as well as tragic incident, Vishnuprasad (6) died when a coconut tree fell over him on Sunday. The tragedy took place at Anegundi in Kairangala village near Konaje.