ತ್ವರಿತ ಅಲರ್ಟ್ ಗಳಿಗಾಗಿ
ನೋಟಿಫಿಕೇಷನ್ ಅನುಮತಿಸಿ  
For Daily Alerts
Oneindia App Download

ವಿಚಿತ್ರ ಪ್ರೇಮಿಯ ವಿಶಿಷ್ಟ ವಿಭಿನ್ನ ದುರಂತಮಯ ಕಥೆ!

By Prasad
|
Google Oneindia Kannada News

ಲಂಡನ್, ನ. 25 : ಈ ಪ್ರೇಮ ಕಥಾನಕ ನಾವು ಚಿಕ್ಕಂದಿನಲ್ಲಿ ಅಜ್ಜ ಅಜ್ಜಿಯರಿಂದ ಕೇಳಿದಂತಹ ಅಥವಾ ಚಂದಮಾಮಾ ಪುಸ್ತಕದಲ್ಲಿ ಓದಿದಂತಹ ರಾಜ ರಾಣಿಯರ ಕಥೆಗಿಂತ ಭಿನ್ನವಾಗಿಲ್ಲ. ಆದರೆ, ಹೃದಯಕದ್ದ ರಾಣಿಯನ್ನು ಭೇಟಿ ಮಾಡಲು ಸಾವಿರಾರು ಕಿ.ಮೀ. ದೂರ ಕ್ರಮನಿಸಿ ಬಂದ ಪ್ರಣಯರಾಜನ ಕಥೆ ಮಾತ್ರ ದುರಂತದಲ್ಲಿ ಅಂತ್ಯವಾಗಿದೆ.

ಇದು ವಿಶಿಷ್ಟ, ವಿಭಿನ್ನ, ದುರಂತಮಯ ಕಥೆ. 38 ವರ್ಷದ ರಮಾಜಾನ್ ನೋಯನ್ ಕುಲುಂ ತನ್ನ ಕನಸಿನ ಕನ್ಯೆಯನ್ನು ನೋಡಲೆಂದು, ಆಕೆಯ ವಿಳಾಸ ಹುಡುಕಿ, ಏಳು ತಿಂಗಳುಗಳ ಕಾಲ 2,500 ಕಿ.ಮೀ ದೂರ ಸಮುದ್ರದಲ್ಲಿ ಕ್ರಮಿಸಿ ಬಂದಿದ್ದಾನೆ. ಇಷ್ಟು ದೂರ ಬಂದ ಪ್ರಣಯರಾಜನಿಗೆ ಕಡೆಗೆ ಸಿಕ್ಕಿದ್ದೇನು? ಪಾಸ್ಪೋರ್ಟ್, ವೀಸಾ ಇಲ್ಲದ್ದರಿಂದ ಜೈಲುವಾಸ ಮತ್ತು 'ಇವ ಯಾವ ಸೀಮೆ ರಾಜ' ಎಂಬ ಕನಸಿನ ಕನ್ಯೆಯ ತಿರಸ್ಕಾರ!

ಮೊಬೈಲ್ ಫೋನ್ ಗೇಮ್ ಕಂಪನಿಯ ಸಿಇಓ ಆಗಿರುವ ಕುಲಂ, ಏಳು ವರ್ಷಗಳ ಹಿಂದೆ ಸೈಪ್ರಸ್‌ನಲ್ಲಿ ರಜೆಗೆಂದು ಕಾಲ ಕಳೆಯಲು ಬಂದಾಗ, ಹೋಟೆಲಿನಲ್ಲಿ ಸರ್ವ್ ಮಾಡುತ್ತಿದ್ದ ಕರ್ಟ್ನಿ ಮರ್ರಿ ಎಂಬ ಸುಂದರಿಯನ್ನು ನೋಡಿ ಸೋತುಹೋಗಿದ್ದಾನೆ. ಪ್ರೇಮಿಸಿದರೆ ಅಥವಾ ಮದುವೆಯಾದರೆ ತನ್ನ ಕನಸಿನ ಕನ್ಯೆ ಕರ್ಟ್ನಿಯನ್ನೇ ಮದುವೆಯಾಗಬೇಕು ಎಂದು ಆತ ಆಗಲೇ ನಿರ್ಧರಿಸಿದ್ದ.

ಕೆಲ ದಿನಗಳಲ್ಲಿ ಆಕೆ ಬ್ರಿಟನ್ನಿಗೆ ಮರಳಿದ್ದಾಳೆ. ಆದರೆ, ಈತ ಬಿಡಬೇಕಲ್ಲ. ಆಕೆಯನ್ನು ಹುಡುಕಲು ಪ್ರಾರಂಭಿಸಿದ್ದಾನೆ. ಕೊನೆಗೆ, ಎಲ್ಲ ವ್ಯಕ್ತಿಗಳ ಅಲ್ಟಿಮೇಟ್ ತಾಣವಾಗಿರುವ ಫೇಸ್‌ಬುಕ್‌ನಲ್ಲಿ ಆಕೆಯನ್ನು ಹುಡುಕಿಬಿಟ್ಟಿದ್ದಾನೆ. ಆಗ ಆತನ ಆನಂದಕ್ಕೆ ಪಾರವೇ ಇರಲಿಲ್ಲ. ಫೇಸ್ ಬುಕ್ ನಲ್ಲಿ ತನ್ನ ಕನಸಿನ ಕನ್ಯೆಯ ವಿಳಾಸ ದೊರೆಯದಿದ್ದರೂ ಇವನು ಬಿಟ್ಟಿಲ್ಲ.

'ಕರ್ಟ್ನಿ ಮರ್ರಿಗಾಗಿ ಉಪವಾಸ ಸತ್ಯಾಗ್ರಹ' ಎಂಬ ಶೀರ್ಷಿಕೆಯ ಬ್ಲಾಗ್ ರಚಿಸಿದ್ದಾನೆ. ಅಲ್ಲಿ ತನ್ನ ಫೋಟೋ ಹಾಕಿಕೊಂಡು, "ಐ ಲವ್ ಯೂ ಮರ್ರಿ, ನನ್ನನ್ನು ಮದುವೆಯಾಗ್ತೀಯಾ?" ಎಂದು ಪ್ರಶ್ನಿಸಿ ಸಂದೇಶವನ್ನೂ ಹಾಕಿದ್ದ. ಕುಲಂನ ಸ್ನೇಹಿತರು, ಸಂಬಂಧಿಗಳು ಇಂಥ ಹುಚ್ಚಾಟ ಬಿಡು, ಆಕೆ ನಿನ್ನನ್ನು ಎಂದೂ ಮದುವೆಯಾಗುವುದಿಲ್ಲ ಎಂದು ಬೈದು ಹೇಳಿದರೂ ಈತ, ಸತ್ತರೂ ಬ್ರಿಟನ್ನಿನಲ್ಲಿಯೇ ಆಕೆಗಾಗಿ ಸಾಯುತ್ತೇನೆ ಎಂದು ಅಮರಪ್ರೇಮಿಯಾಗಲು ಪ್ರತಿಜ್ಞೆ ತೊಟ್ಟುಬಿಟ್ಟಿದ್ದ.

ತನ್ನ ಛಲವನ್ನು ಬಿಡದ ಕುಲಂ, ಏಳು ತಿಂಗಳ ಪಯಣದಲ್ಲಿ ಆಹಾರ ಖಾಲಿಯಾದರೂ, ಸಾಗರದಲ್ಲಿ ಅನೇಕ ವೈಪರೀತ್ಯಗಳನ್ನು ಎದುರಿಸಿದರೂ ಧೈರ್ಯಗುಂದದೆ ಒಂದು ದಿನ ಬ್ರಿಟನ್ ತಲುಪಿದ್ದಾನೆ. ಸದ್ಯಕ್ಕೆ ಆತ ಸಾಗಿಬಂದ ಬೋಟನ್ನು ಸಸೆಕ್ಸ್ ಪೊಲೀಸರು ವಶಪಡಿಸಿಕೊಂಡಿದ್ದಾರೆ. ನನಗೂ ಆತನಿಗೂ ಯಾವುದೇ ಸಂಬಂಧ ಇಲ್ಲ ಎಂದು ಕರ್ಟ್ನಿ ಮರ್ರಿಯೂ ಆತನನ್ನು ತಿರಸ್ಕರಿಸಿದ್ದಾಳೆ. ಇಷ್ಟು ಸಾಲದೆಂಬಂತೆ, ಇನ್ನು ಇಸ್ತಾನ್‌ಬುಲ್‌ಗೆ ಮರಳಿ ಬರಬೇಡ, ಹುಡುಗಿ ಸಿಗಲಿಲ್ಲವೆಂದರೆ ಸಮುದ್ರದಲ್ಲಿಯೇ ಮುಳುಗಿ ಸಾಯಿ ಎಂದು ಆತನ ಸ್ನೇಹಿತರು, ಬಂಧುಗಳು ಕಟ್ಟಪ್ಪಣೆ ಮಾಡಿದ್ದಾರೆ. ಈಗ ಆತ ಏನು ಮಾಡಬೇಕು ಹೇಳಿ?

English summary
This is an unusual and tragic story of a lover, who sailed through 2,500 KMs for 7 long months to meet his dream girl, only to be arrested by customs officials in Britain for having no passport and visa, and finally to be rejected by the girl.
ತಾಜಾ ಸುದ್ದಿ ತಕ್ಷಣ ಪಡೆಯಿರಿ
Enable
x
Notification Settings X
Time Settings
Done
Clear Notification X
Do you want to clear all the notifications from your inbox?
Settings X