ಮದುವೆ ಮನೆಯಲ್ಲಿ ಭಾರೀ ಅಗ್ನಿದುರಂತ, 28 ಸಾವು

ರಿಯಾದ್, ಅ. 31 : ಮದುವೆ ಮನೆಯಲ್ಲಿ ಮಂಗಳವಾರ ರಾತ್ರಿ ಸಂಭವಿಸಿದ ಭೀಕರ ಅಗ್ನಿ ದುರಂತದಲ್ಲಿ 28 ಮಂದಿ ಅಸುನೀಗಿ, 30ಕ್ಕೂ ಹೆಚ್ಚು ಜನರು ಗಾಯಗೊಂಡಿದ್ದಾರೆ. ಈ ದುರ್ಘಟನೆ ನಡೆದಿರುವುದು ಸೌದಿ ಅರೇಬಿಯಾದ ಪೂರ್ವ ಭಾಗದಲ್ಲಿರುವ ಧಹರನ್-ದಮ್ಮಮ್-ಖೋಬರ್ ಮೆಟ್ರೋಪಾಲಿಟನ್ ನಗರದಿಂದ 60 ಕಿ.ಮೀ. ದೂರದಲ್ಲಿರುವ ಅಬಕೈದ್ ಎಂಬ ಪ್ರದೇಶದಲ್ಲಿ.

ಸಾವಿಗೀಡಾದವರಲ್ಲಿ ಹೆಂಗಸರು ಮತ್ತು ಮಕ್ಕಳೇ ಹೆಚ್ಚು. ಮಂಗಳವಾರ ಮದುವೆಯ ಸಂತಸ ಮುಗಿಲುಮುಟ್ಟಿದ ಸಂದರ್ಭದಲ್ಲಿ ವಿದ್ಯುತ್ ಕೇಬಲ್ ಕಟ್ಟಾಗಿ ಈ ದುರಂತ ಸಂಭವಿಸಿದೆ. ಮದುವೆ ನಡೆಯುತ್ತಿದ್ದ ಕಟ್ಟಡದ ಒಂದೇ ಬಾಗಿಲಿನಿಂದ ಎಲ್ಲರೂ ಹೊರಹೋಗಲು ಯತ್ನಿಸಿದಾಗ ಈ ದುರಂತ ಘಟಿಸಿದೆ. ಅದೇ ಸ್ಥಳದಲ್ಲಿ ವಿದ್ಯುತ್ ಕೇಬಲ್ ಬಿದ್ದಿದ್ದರಿಂದ ಅದನ್ನು ಸ್ಪರ್ಶಿಸಿ ಹೆಚ್ಚಿನವರು ಸತ್ತಿದ್ದಾರೆ.

ಸಂತೋಷಕೂಟದಲ್ಲಿ ಭಾಗಿಯಾಗಿದ್ದ ಕೆಲವರು ಸಂಸತದಲ್ಲಿ ಗುಂಡು ಹಾರಿಸಿದ್ದರಿಂದ ಹೈ ವೋಲ್ಟೇಜ್ ವಿದ್ಯುತ್ ತಂತಿ ಕಟ್ಟಾಗಿ ಕಟ್ಟಡದ ಮೇಲಿ ಬಿದ್ದಿದೆ. ಆಗ ತೀವ್ರ ಗಲಿಬಿಲಿಯುಂಟಾಗಿ ನೂಕುನುಗ್ಗಲು ಸಂಭವಿಸಿದೆ. ಬಾಗಿಲು ಕೂಡ ಕಬ್ಬಿಣದಾಗಿದ್ದು, ಹೊರಹೋಗುತ್ತಿರುವವರು ಅದನ್ನು ಸ್ಪರ್ಶಿಸಿದ್ದರಿಂದ ಹೆಚ್ಚಿನ ಅವಘಡ ಸಂಭವಿಸಿದೆ ಎಂದು ಅರೇಬಿಕ್ ದಿನಪತ್ರಿಕೆ ಅಲ್ ರಿಯಾದ್ ವರದಿ ಮಾಡಿದೆ.

2009ರಲ್ಲಿ ಕುವೈತ್‌ನಲ್ಲಿ ಇದಕ್ಕಿಂತ ದೊಡ್ಡ ದುರಂತ ಸಂಭವಿಸಿತ್ತು. ಆಗ ಮದುವೆ ಮನೆಯಲ್ಲಿ ಉಂಟಾಗಿದ್ದ ಅಗ್ನಿ ಅನಾಹುತದಲ್ಲಿ 57 ಹೆಂಗಸರು ಮತ್ತು ಮಕ್ಕಳು ಸುಟ್ಟು ಭಸ್ಮವಾಗಿದ್ದರು. 23 ವರ್ಷದ ಮಹಿಳೆಯೊಬ್ಬಳು ತನ್ನ ಗಂಡನ ಎರಡನೇ ಮದುವೆಯನ್ನು ತಪ್ಪಿಸುವ ದೃಷ್ಟಿಯಿಂದ ಉದ್ದೇಶಪೂರ್ವಕವಾಗಿ ಬೆಂಕಿ ಹಚ್ಚಿದ್ದಳು. ಸೌದಿ ಅರೇಬಿಯಾದಲ್ಲಿ ಸಾವಿಗೀಡಾದವರ ಗುರುತು ಇನ್ನೂ ಸಿಕ್ಕಿಲ್ಲ.

English summary

Huge fire accident at a wedding hall in Saudi Arabia has killed 28 people on Tuesday night. More than 30 people have been injured in the incident. The tragedy happened when high voltage electric cable snapped and fell on the building.