ಎಚ್ ಡಿ ಕುಮಾರಸ್ವಾಮಿನ ಕಂಡರೆ ನ್ಯಾ ಹೆಗ್ಡೆಗೆ ಭಯವೇ !?

ಮೈಸೂರು, ನ.16: ಲೋಕಾಯುಕ್ತ ಎಡಿಜಿಪಿ ಗಾವಂಕರ್ ಮತ್ತು ಎಸ್‌ಪಿ ಶಿವಶಂಕರ್ ಅವರಿಗೆ ನೇರವಾಗಿ ಧಮಕಿ ಹಾಕಿರುವ ದೇವೇಗೌಡರ ಬಗ್ಗೆ, ಕೃಷ್ಣಾ ಮೇಲ್ದಂಡೆ ಪ್ರಕರಣದ ಬಗ್ಗೆ ತನಿಖೆ ಆರಂಭಿಸಿದ್ದ ಡಿಜಿಪಿ ಶಂಕರ ಬಿದರಿ ಅವರನ್ನು ಕುಮಾರಸ್ವಾಮಿ ಭೇಟಿಯಾಗಿದ್ದರ ಬಗ್ಗೆ ನಿವೃತ್ತ ಲೋಕಾಯುಕ್ತ ಸಂತೋಷ್‌ ಹೆಗ್ಡೆ ಏಕೆ ಮೌನ ತಾಳಿದ್ದಾರೆ. ದೇವೇಗೌಡರ ಕುಟುಂಬವನ್ನು ಕಂಡರೆ ಭಯವೇ, ಇಲ್ಲವಾದರೆ ಕುಮಾರಸ್ವಾಮಿ ತಮ್ಮ ಜಾತಕ ಬಯಲು ಮಾಡುತ್ತಾರೆಂಬ ಹೆದರಿಕೆಯೇ ಎಂದು ಅಬಕಾರಿ ಸಚಿವ ರೇಣುಕಾಚಾರ್ಯ ಲೇವಡಿ ಮಾಡಿದ್ದಾರೆ.

ಕೇವಲ ರಾಜ್ಯ ಸರಕಾರ ಮತ್ತು ಮಾಜಿ ಸಿಎಂ ಯಡಿಯೂರಪ್ಪ ಅವರನ್ನೇ ಗುರಿಯಾಗಿಸಿಕೊಂಡು ಬಂದಿರುವ ನ್ಯಾ. ಹೆಗ್ಡೆಗೆ ದೇವೇಗೌಡರ ಬಗ್ಗೆ ಮಾತನಾಡಲು ಶಕ್ತಿ ಎಲ್ಲಿದೆ ಎಂದು ಖಾರವಾಗಿ ಟೀಕಿಸಿದರು.

ಕುಮಾರಸ್ವಾಮಿ ಭಯವೇ ಇರಬೇಕು: ಕೆಲವು ದಿನಗಳ ಹಿಂದೆ ನ್ಯಾ. ಸಂತೋಷ್‌ಹೆಗ್ಡೆ ಅವರು ರಾತ್ರಿಯಾದ ನಂತರ ಎಲ್ಲಿ ಹೋಗುತ್ತಾರೆ? ಅವರ ರಾತ್ರಿ ಚಟುವಟಿಕೆಗೆ ಹೇಗೆ ಖರ್ಚು ಮಾಡುತ್ತಾರೆ? ಎಂಬುದು ನನಗೆ ಗೊತ್ತಿದೆ ಎಂದು ಕುಮಾರಸ್ವಾಮಿ ಬಹಿರಂಗವಾಗಿಯೇ ಟೀಕಿಸಿದ್ದರು.

ಬಹುಶಃ ಇದೇ ಕಾರಣಕ್ಕಾಗಿ ದೇವೇಗೌಡರು ಮತ್ತು ಅವರ ಮಕ್ಕಳ ವಿರುದ್ಧ ಯಾವುದೇ ಹೇಳಿಕೆ ನೀಡಲು ಹಿಂದೆ ಬಿದ್ದಿರಬೇಕು. ಹೇಳಿಕೆ ಕೊಟ್ಟರೆ ಎಲ್ಲಿ ತಮ್ಮ ದೌರ್ಬಲ್ಯಗಳು ಬಯಲಿಗೆ ಬರುವುದೋ ಎಂಬ ಆತಂಕ ಕಾಡುತ್ತಿರಬೇಕು ಎಂದು ಅನುಮಾನ ವ್ಯಕ್ತಪಡಿಸಿದರು.

English summary

It seems the upright former Lokayukta Justice Satosh Hegde fears HD Kumaraswamy. Thats why he has kept mum about the corruption allegations against him says Minister Renukacharya.