ಪ್ರಾಂಶುಪಾಲರಿಂದ ಅತ್ಯಾಚಾರ: 10 ಲಕ್ಷ ಪರಿಹಾರಕ್ಕೆ ಹೈಕೋರ್ಟ್ ಆದೇಶ

ಅಗರ್ತಲ, ನ. 8: ತ್ರಿಪುರಾದಲ್ಲಿ ಪ್ರಾಂಶುಪಾಲರಿಂದ ಅತ್ಯಾಚಾರಕ್ಕೆ ಒಳಗಾದ ಶಾಲಾ ಬಾಲಕಿಯೊಬ್ಬಳಿಗೆ 10 ಲಕ್ಷ ರೂಪಾಯಿಗಳ ಪರಿಹಾರ ಪಾವತಿ ಮಾಡುವಂತೆ ಕೇಂದ್ರ ಮಾನವ ಸಂಪನ್ಮೂಲ ಅಭಿವೃದ್ಧಿ ಸಚಿವಾಲಯಕ್ಕೆ ಗುವಾಹತಿ ಹೈಕೋರ್ಟ್ ಆಜ್ಞಾಪಿಸಿದೆ.

ಬಾಲಕಿಯ ಕುಟುಂಬ ಮತ್ತು ತ್ರಿಪುರಾ ಮಹಿಳಾ ಆಯೋಗ ಜಂಟಿಯಾಗಿ ಸಚಿವಾಲಯದಿಂದ 50 ಲಕ್ಷ ರೂಪಾಯಿ ಪರಿಹಾರ ಒದಗಿಸುವಂತೆ ಕೋರಿ ಸಲ್ಲಿಸಿದ್ದ ಅರ್ಜಿಯನ್ನು ಆಲಿಸಿದ ಬಳಿಕ ನ್ಯಾಯಮೂರ್ತಿ ಅರುಣ್ ಚಂದ್ರ ಉಪಾಧ್ಯಾಯ ಅವರು ಈ ಆದೇಶ ನೀಡಿದರು.

ಬಾಲಕಿಯು 1998ರಲ್ಲಿ ದಕ್ಷಿಣ ತ್ರಿಪುರಾ ಜಿಲ್ಲೆಯ ಕಕ್ರಬನ್ ನಲ್ಲಿನ ಜವಾಹರ ನವೋದಯ ವಿದ್ಯಾಲಯದಲ್ಲಿ 8ನೇ ತರಗತಿ ವಿದ್ಯಾರ್ಥಿನಿಯಾಗಿದ್ದಾಗ ಪ್ರಾಂಶುಪಾಲ ಎಚ್.ಎಸ್. ತಿವಾರಿಯಿಂದ ಅತ್ಯಾಚಾರಕ್ಕೆ ಒಳಗಾಗಿದ್ದಳು. ಈ ಘಟನೆಯ ಬಳಿಕ ಆಕೆ ಮಗುವಿಗೆ ಜನ್ಮ ನೀಡಿದ್ದಳು.

ಈ ಅಪರಾಧಕ್ಕಾಗಿ ದಕ್ಷಿಣಾ ತ್ರಿಪುರಾ ಜಿಲ್ಲಾ ಮತ್ತು ಸೆಷನ್ಸ್ ನ್ಯಾಯಾಲಯ ನೀಡಿದ್ದ ಜೀವಾವಧಿ ಸಜೆಯನ್ನು ಗುವಾಹತಿ ಹೈಕೋರ್ಟ್ 2005ರಲ್ಲಿ ಎತ್ತಿ ಹಿಡಿದಿದ್ದು, ತಿವಾರಿ ಪ್ರಸ್ತುತ ಶಿಕ್ಷೆ ಅನುಭವಿಸುತ್ತಿದ್ದಾನೆ.

English summary

The Gauhati High Court has ordered the Union Human Resources Development Ministry to pay a compensation of Rs 10 lakh to a girl who was raped by her school principal HS Tiwari, in 1998 at Jawahar Navodaya Vidyalaya at Kakraban in South Tripura district. The girl had delivered a baby after she was raped by Tiwari.